Eksodus 35 - An Bibel Kernewek 20234 (Kernewek Kemmyn)

Rewlys an Sabot

¹ Moyses a guntellas an kuntelles oll a vebyon Ysrael, ha leverel dhedha, An re ma yw an taklow re worhemmynnis an Arloedh dhywgh dh'aga gul.

² Hwegh dydh y fydh ober gwrys, mes y'n seythves dydh y'gas bydh sabot sans a bowes dhe'n Arloedh; piwpynag a wrello ober vyth ynno a vydh gorrys dhe'n mernans;

³ ny wrewgh hwi enowi tan vyth yn agas annedhow dydh an sabot.

Offrynnow an Tabernakel

⁴ Moyses a leveris dhe'n kuntelles oll a vebyon Ysrael, Hemm yw an dra re worhemmynnis an Arloedh.

⁵ Kemmerewgh a-dhiworthowgh offrynn dhe'n Arloedh; neb a'n jeffo kolonn volonjedhek, gas ev dhe dhri offrynn an Arloedh: owr, arghans ha brons;

⁶ pann glas ha purpur ha kogh ha sendal, ha blew gaver,

⁷ kreghyn rudhhes a hordhes, kreghyn morhoghes ha prenn shittim,

⁸ oyl dhe'n lugarn, spisyow rag oyl an untyans ha rag an ynkys hweg,

⁹ meyn onyks ha meyn rag desedha, rag an efod ha rag an lurik.

Gweyth rag an Tabernakel

¹⁰ Ha pub krefter konnyk yntredhowgh dens ha gwruthyl oll re worhemmynnis an Arloedh:

¹¹ an tabernakel, y dylda ha'y gudhans, y higennow ha'y framyow, y varrow, y golovenyow ha'y selveyn;

¹² an argh ha'y gwelynni, an dregeredhva ha vayl an groglenn;

¹³ an voes gans hy gwelynni ha'n toulow oll ha bara an wolok;

¹⁴ an kantoler ynwedh rag an golow, ha'y dhaffar oll ha'y lugern, ha'n oyl rag an lugarn;

¹⁵ hag alter an ynkys, gans hy gwelynni, hag oyl an untyans ha'n ynkys hweg, ha'n groglenn rag an daras, dhe borth an tabernakel;

¹⁶ alter an offrynn leskys, gans y rastell a vrons, hy gwelynni ha'y daffar oll, an wolghell ha'y sel;

¹⁷ kroglennow an klos, y golovenyow ha'ga selveyn, ha'n groglenn rag porth an klos;

¹⁸ ebilyer an tabernakel hag ebilyer an klos, ha'ga hordennow;

¹⁹ an gwiskasow fin plethys rag menystra y'n tyller sans, an gwiskasow sans rag Aron an oferyas, ha gwiskasow y vebyon, rag aga gonis avel oferysi.

Offrynnow an Bobel

²⁰ Ena kuntelles mebyon Ysrael oll a dhibarthas a wolok Moyses.

²¹ Hag y teuthons, pubonan kolonnek, ha pubonan gans spyrys bolonjedhek, ha dri offrynn an Arloedh rag ober tylda an kuntelles, ha rag oll y wonis, ha rag an gwiskasow sans.

²² Yndellma y teuthons, ha gwer ha benynes; oll a golonn volonjedhek a dhros brochys ha bysowyer ha bysowyer-sel ha tergh, pub eghenn a daklow owrek, peub owth offrynna offrynn a owr dhe'n Arloedh.

²³ Ha pubonan a veu kevys ganso pann glas po purpur po kogh po sendal po kreghyn rudhhes a hordhes po kreghyn morhoghes, a's dros.

²⁴ Peub a ylli offrynna offrynn a arghans po brons a'n dros yn offrynn dhe'n Arloedh; ha pub den a veu kevys ganso prenn shittim 'vas dhe'n ober, a'n dros.

²⁵ Ha'n benynes oll a veu abel a nedhas gans aga diwdhorn ha dri an pyth re nedhsons, pann glas ha purpur ha kogh ha sendal;

²⁶ ha'n benynes oll ha'ga holonn movyes gans galloes a nedhas blew an gever.

²⁷ Ha'n hembrenkysi a dhros meyn onyks ha meyn dhe vos desedhys, rag an efod ha rag an lurik,

²⁸ ha spisyow hag oyl rag an golow, ha rag oyl an untyans, ha rag an ynkys hweg.

²⁹ An wer ha'n benynes oll, mebyon Ysrael, ha'ga holonn movyes dhe dhri neppyth rag an ober re worhemmynnsa an Arloedh dre leuv Moyses dhe vos gwrys, a'n dros avel aga offrynn bolonjedhek dhe'n Arloedh.

Kreftoryon an Tabernakel

³⁰ Ha Moyses a leveris dhe vebyon Ysrael, Mirewgh, an Arloedh re elwis dre hanow Besalel mab Uri, mab Hur, a loeth Yuda;

³¹ hag ev re'n lenwis gans Spyrys Duw, gans furneth ha konvedhes, gans skians ha gans kreftweyth a bub eghenn,

³² dhe dhevisya patronyow konnyk, dhe weytha yn owr hag arghans ha brons,

³³ dhe dreghi meyn dh'aga desedha, ha dhe gervya prenn, rag gweyth yn pub kreft konnyk.

³⁴ Hag ev re worras yn y golonn an galloes dhe dhyski, hag ev hag Oholiab mab Ahisamak a loeth Dan.

³⁵ Ev re's lenwis gans galloes dhe wul pub eghenn a ober gwrys gans krefter po gweythor kweth po brosyer yn pann glas ha purpur ha kogh ha sendal, po gans gwiader; oberoryon yn kreftweyth a bub eghenn, ha gweythoryon kweth a dhevisyow konnyk.