Eksodus 25 - An Bibel Kernewek 20234 (Kernewek Kemmyn)

Rohow dhe'n Tabernakel

¹ An Arloedh a leveris dhe Moyses,

² Kows orth mebyon Ysrael may trollons offrynn dhymm; a bub den bolonjedhek yn y golonn ty a wra degemmeres an offrynn dhymm.

³ Ha hemm yw an offrynn a dhegemmerydh anedha: owr, arghans, ha brons,

⁴ pann glas ha purpur ha kogh, sendal, ha blew gever,

⁵ kreghyn rudhhes a hordhes, kreghyn morhoghes ha prenn shittim,

⁶ oyl dhe'n lugern, spisyow rag oyl an untyans ha'n ynkys hweg,

⁷ meyn onyks, ha meyn rag desedha y'n efod hag y'n lurik.

⁸ Ha gas i dhe wul dhymm sentri may trikkiv yn aga mysk.

⁹ Herwydh pup-tra a dhiskwedhav dhis a-dro dhe batron an tabernakel, ha'y vebel, yndella ty a'n gwra.

Argh an Dustuni

¹⁰ I a wra argh a brenn shittim; dew gevelin ha hanter a vydh hy hys, kevelin ha hanter hy les, ha kevelin ha hanter hy ughelder.

¹¹ Ha ty a wra hy gorowra gans owr pur, a-ji hag a-ves ty a wra hy gorowra, ha ty a wra gorra kylgh owr a-dro dhedhi.

¹² Ha ty a wra teudhi rygdhi peder lagasenn owr ha'ga gorra war hy feswar troes, diw lagasenn a'n eyl tu dhedhi, ha diw lagasenn a'y gila.

¹³ Ha ty a wra gwelynni a brenn shittim ha'ga gorowra.

¹⁴ Ha ty a worr an gwelynni a-ji dhe'n lagasennow war denwennow an argh, dredha dhe dhoen an argh.

¹⁵ An gwelynni a wra gortos yn lagasennow an argh; ny vydhons kemmerys dhiworti.

¹⁶ Hag y'n argh ty a wra gorra an dustuni a rov dhis.

¹⁷ Ena ty a wra tregeredhva a owr pur, dew gevelin ha hanter a vydh hy hys, ha kevelin ha hanter hy les.

¹⁸ Ha ty a wra dew jerub a owr; a vortholweyth ty a's gwra, dhe dhew benn an dregeredhva.

¹⁹ Gwra unn cherub dhe'n eyl penn hag unn cherub dh'y gila; yn unn rann gans an dregeredhva ty a wra an jerubim dh'y dhew benn.

²⁰ An jerubim a wra lesa aga eskelli war-vann, ow korskeusi an dregeredhva gans aga eskelli, aga fas an eyl war-tu ha'y gila; war-tu ha'n dregeredhva y fydh fasow an jerubim.

²¹ Ha ty a wra gorra an dregeredhva war an argh; hag y'n argh, ty a wra gorra an dustuni a rov dhis.

²² Ena my a wra metya genes, hag a-ugh an dregeredhva, ynter an dhew jerub usi war argh an dustuni, my a gews genes a-dro dhe bup-tra a worhemmynnav dhis rag mebyon Ysrael.

Moes an Bara

²³ Ha ty a wra moes a brenn shittim; dew gevelin a vydh hy hys, kevelin hy les, ha kevelin ha hanter hy ughelder.

²⁴ Ty a wra hy gorowra gans owr pur, ha gul kylgh a owr a-dro dhedhi.

²⁵ Ha ty a wra a-dro dhedhi fram, dornva y hys, ha gul kylgh a owr a-dro dhe'n fram.

²⁶ Ha ty a wra rygdhi peder lagasenn a owr, ha kelmi an lagasennow dhe'n beder kornell orth y beder garr.

²⁷ Ogas dhe'n fram y hwra growedha an lagasennow avel dalghennow dhe'n gwelynni rag doen an voes.

²⁸ Ty a wra an gwelynni a brenn shittim, ha'ga gorowra gans owr, ha'n voes a vydh degys dredha.

²⁹ Ha ty a wra hy flatyow ha'y skudellow ha'y hostrels ha'y bollow dhe dhiveri offrynnow diwes; a owr pur ty a's gwra.

³⁰ Ha ty a wra settya bara an wolok war an voes a-ragov pup-prys.

An Kantoler

³¹ Ha ty a wra dhymm kantoler a owr pur. Troes ha gwelenn an kantoler a vydh gwrys a vortholweyth; y hanafow, y dalbennow, ha'y vleujennow a vydh unn rann ganso,

³² hag y fydh hwegh skorrenn ow mos yn-mes a'y denwennow, teyr skorrenn an kantoler yn-mes a unn tenewen anodho ha teyr skorrenn an kantoler yn-mes a'n tenewen arall;

³³ tri hanaf gwrys avel alamandow, peub gans talbenn ha bleujenn, war an unn skorrenn, ha tri hanaf gwrys avel alamandow, peub gans talbenn ha bleujenn, war an skorrenn arall – hag yndella dhe'n hwegh skorrenn ow mos yn-mes a'n kantoler;

³⁴ ha war an kantoler y honan peswar hanaf gwrys avel alamandow, ha gansa aga thalbennow ha'ga bleujennow;

³⁵ y fydh talbenn a unn rann ganso yn-dann an kynsa par a skorrennow, talbenn a unn rann ganso yn-dann an nessa par a skorrennow ha talbenn a unn rann ganso yn-dann an diwettha par a skorrennow, rag an hwegh skorrenn ow mos yn-mes a'n kantoler.

³⁶ Aga thalbennow ha'ga skorrennow a vydh unn rann ganso, an oll anodho unn rann a vortholweyth a owr pur.

³⁷ Ha ty a wra an seyth lugarn ragdho; ha'n lugern a vydh settys may rollons golow war an spas a-ragdho.

³⁸ Y evelyow ha'y badellow-tan a vydh a owr pur.

³⁹ A dalent a owr pur y fydh gwrys, gans oll an daffar ma.

⁴⁰ Ha gwayt aga gul war-lergh an patron ragdha, a veu diskwedhys dhis war an menydh.