Eksodus 22 - An Bibel Kernewek 20234 (Kernewek Kemmyn)

Lagha a-dro dhe Attyli

¹ Gour mar lader ojyon po davas, ha'y ladha po y wertha, ev a wra tyli pymp ojyon rag ojyon ha peder davas rag davas.

² Mars yw kevys lader ow terri yn chiow, hag yw gweskys may ferow, ny vydh kabel-goes ragdho.

³ Mars yw sevys an howl warnodho y fydh kabel-goes ragdho. Ev a wra daskorrans; mar ny'n jeves travyth ena ev a vydh gwerthys drefenn y ladrynsi.

⁴ Mars yw kevys an best yn few yn-dann y berghennogeth, kyn fo ojyon po asen po davas, ev a wra tyli dewblekkweyth.

⁵ Gour pan as y enyvales dhe beuri yn gwel po gwinlann, po gasa y vest dhe beuri yn pras ken den, ev a wra daskorrans a'n gwella a'y bras y honan hag a'n gwella a'y winlann y honan.

⁶ Pan dardh tan ha kavoes spern may fydh leskys bern a vanalow po an ys po an gwel, ev neb a enowis an tan a wra daskorrans leun.

⁷ Gour mar re dh'y gentrevek arghans po gwara dhe witha, hag y fydh ledrys dhiworth chi an gour, ena, mar pydh kevys an lader, ev a wra tyli dewblekkweyth.

⁸ Mar ny vydh kevys an lader, perghennek an chi a nes dhe Dhuw, rag diskwedhes mar korras y dhorn dhe wara y gentrevek po na.

⁹ Rag pub kas a berghennogeth disputys, kyn fo rag ojyon, asen, davas, dillas po tra gellys pynag, anodho may lever onan ‘Hemm yw an dra’, ken an dhew du a wra dos a-rag Duw; ev neb a wra Duw y dhampnya a wra tyli dewblekkweyth dh'y gentrevek.

¹⁰ Gour mar re dh'y gentrevek asen po ojyon po davas po best pynag dhe witha, hag y ferow po yw shyndys po kemmerys dhe-ves, heb denvyth orth y weles,

¹¹ ena y fydh ti re'n Arloedh yntredha, na worras y dhorn dhe byth y gentrevek, ha'n perghennek a wra degemmeres an ti, ha ny wra daskorrans.

¹² Mes mar pydh ledrys dhiworto, ev a wra daskorrans dh'y berghennek.

¹³ Mar pydh skwardys gans bestes, gas ev dh'y dhri yn dustuni; ny wra daskorrans rag an pyth re beu skwardys.

¹⁴ Gour mar chevis best dhiworth y gentrevek, ha'n best yw shyndys po a verow, ha'n perghennek heb bos ganso, ev a wra daskorrans leun.

¹⁵ Mars yw an perghennek ganso ny wra daskorrans; mars yw arvethys, y teu yn pris y arveth.

Laghys Devosel

¹⁶ Gour mar tyn gwyrghes nag yw ambosys, ha growedha gensi, ev a re an ro demmedhyans rygdhi, ha gul dhedhi bos y wreg.

¹⁷ Mar nagh hy thas yn tien hy ri dhodho, ev a wra tyli arghans par dhe ro demmedhyans rag gwyrghesow.

¹⁸ Ny esydh pystriores dhe vewa.

¹⁹ Piwpynag a gosko gans best a vydh gorrys dhe'n mernans.

²⁰ Piwpynag a offrynno dhe neb duw marnas dhe'n Arloedh, a vydh sakrys dhe dhistruyans.

²¹ Ny wredh kammdhyghtya alyon na'y arwaska, drefenn hwi dhe vos alyons yn pow Ejyp.

²² Ny wrewgh tebeldhyghtya gwedhwes vyth po omdhivas.

²³ Mar kwredh aga thebeldhyghtya, hag i a gri warnav, my a wra klewes aga kri yn sur,

²⁴ hag ow sorr a wra leski, ha my a'gas ladh dre gledha, ha'gas gwragedh a vydh gwedhwesow ha'gas mebyon a vydh omdhivasow.

²⁵ Mar prestydh arghans dhe nebonan a'm pobel genes neb yw boghosek, ny vydhydh dhodho avel kresysor, ha ny wovynnydh oker anodho.

²⁶ Mar kemmerydh dillas dha gentrevek yn goestel, ty a wra y dhaskorr dhodho kyns sedhes an howl;

²⁷ rag henn yw y unn ballenn, yth yw kudhans rag y groghen; yn pandra ken y hwra ev koska? Ha mar kri warnav, my a wra klewes, rag ow bos grassyes.

²⁸ Ny wredh milliga Duw, na mollethi rewler dha bobel.

²⁹ Ny wredh strechya offrynna dhiworth leunder dha drevas na a sugen dha winwaskow. Kynsa-genys dha vebyon ty a re dhymm.

³⁰ Ty a wra yndellma ynwedh gans dha oghen ha gans dha dheves: seyth dydh y fydh gans y vamm; y'n ethves dydh ty a wra y ri dhymm.

³¹ Hwi a vydh gwer sakrys dhymm; yndellma ny wrewgh dybri kig vyth yw skwardys gans bestes an gwel; hwi a'n tewl dhe'n keun.