Eksodus 18 - An Bibel Kernewek 20234 (Kernewek Kemmyn)

Yethro a Dheu dhe Weles Moyses

¹ Yethro, oferyas Midyan, hwegron Moyses, a glewas a bup-tra re wrussa Duw rag Moyses ha rag Ysrael y bobel, fatell dhrossa an Arloedh Ysrael yn-mes a Ejyp.

² Ha Yethro, hwegron Moyses, re gemmersa Sippora, gwreg Moyses, wosa ev dh'y dannvon dhe-ves,

³ ha'y dew vab, ha hanow an eyl Gershom (rag y leveris ‘My re beu alyon yn tir estren’),

⁴ ha hanow y gila, Eliezer (rag y leveris ‘An Arloedh Duw o ow gweres hag a'm livras a gledha Faro’).

⁵ Ha Yethro, hwegron Moyses, a dheuth gans y vebyon ha'y wreg dhe Moyses y'n gwylvos le may kampya ryb menydh Duw.

⁶ Ha pan veu leverys dhe Moyses, ‘Otta, yma dha hwegron Yethro ow tos dhis gans dha wreg ha'y dew vab gensi.’

⁷ Moyses eth yn-rag dhe dhyerbynna y hwegron hag omblegya a-ragdho hag amma dhodho; hag i a salusis an eyl y gila ha mos a-ji dhe'n tylda.

⁸ Ena Moyses a leveris dh'y hwegron pup-tra a wrussa an Arloedh dhe Faro ha dhe Ejyp a-barth Ysrael, oll an anken re dhothya warnedha war an hyns ha fatell y's liv'sa an Arloedh.

⁹ Ha Yethro a lowenhas rag oll an dader re wrussa an Arloedh dhe Ysrael, orth aga livra yn-mes a dhorn a'n Ejyptianys.

¹⁰ Ha Yethro a leveris, ‘Benniges re bo an Arloedh re'gas livras yn-mes a leuv an Ejyptianys hag yn-mes a dhorn Faro, drefenn ev dhe livra an bobel a-dhann dhorn an Ejyptianys.

¹¹ Lemmyn my a woer bos an Arloedh brassa ages duwow oll, ow kul yndella erbynn seul a's dyghtyas yn howtyn.’

¹² Ha Yethro, hwegron Moyses, a offrynnas offrynn leskys ha sakrifisow dhe Dhuw, hag Aron a dheuth gans oll an henavogyon a Ysrael dhe dhybri bara gans hwegron Moyses a-rag Duw.

Ordenans an Vreusysi

¹³ An vorow Moyses a esedhas dhe vreusi an bobel, ha'n bobel a sevi a-dro dhe Moyses a'n myttin dhe'n gorthugher.

¹⁴ Pan welas hwegron Moyses oll a wre ev rag an bobel, ev a leveris ‘Pandra yw a wredh rag an bobel? Prag yth esos esedhys dha honan, hag oll an bobel sevys a-dro dhis a'n myttin dhe'n gorthugher?’

¹⁵ Ha Moyses a leveris dh'y hwegron, ‘Rag an bobel dhe dhos dhymm dhe hwilas mynnas Duw;

¹⁶ pan vydh kedrynn dhedha, y tons dhymm ha my a vreus yntra den ha'y gentrevek, ha my a wra dhedha aswonn ordenansow Duw ha'y laghys.’

¹⁷ Hwegron Moyses a leveris dhodho, ‘Nyns yw 'vas an pyth a wredh.

¹⁸ Ty ha'n bobel genes a wra omskwitha, rag an dra yw re boes ragos, ha ny yllydh y wul dha honan.

¹⁹ Goslow lemmyn orth ow lev; my a re dhis kusul, ha Duw re bo genes! Ty a vydh kannas an bobel a-rag Duw ha dri aga henyow dhodho;

²⁰ ha ty a wra dyski dhedha an ordenansow ha'n laghys, ha gul dhedha aswonn an fordh a dal dhedha kerdhes ynni, ha'n pyth a goedh dhedha y wul.

²¹ Dhe voy, dewis gwer abel yn-mes a'n bobel oll, neb a berth own Dhuw, gwer a yllir aga threstya ha kas gansa falswober; ha gorr gwer a'n par ma a-ugh an bobel avel rewloryon a vilyow, a gansow, a hanter-kansow hag a dhegow.

²² Ha breusens an bobel pup-prys; pub negys bras i a wra dri dhis, mes negys byghan pynag i a wra breusi aga honan; may fydh esya ragos, hag i a wra doen an begh genes.

²³ Mar kwredh hemma, ha Duw mara'th ergh yndellma, ena ty a yll durya, hag oll an bobel ma ynwedh a yll mos dh'aga le yn kres.’

²⁴ Ytho Moyses a goelas orth lev y hwegron ha gul pup-tra re lavarsa.

²⁵ Moyses a dhewisas gwer abel yn-mes a oll Ysrael, ha gul dhedha bos pennow war an bobel, rewloryon a vilyow, a gansow, a hanter-kansow hag a dhegow.

²⁶ Hag i a vreusi an bobel pup-prys; negysyow kales i a dhri dhe Moyses, mes negys byghan pynag i a vreusi aga honan.

²⁷ Ena Moyses a asas y hwegron dhe dhibarth hag ev eth war y hyns dh'y vro y honan.