Eksodus 15 - An Bibel Kernewek 20234 (Kernewek Kemmyn)

Kan Moyses

¹ Ena Moyses ha mebyon Ysrael a ganas an gan ma dhe'n Arloedh, ow leverel, ‘Kana a wrav dhe'n Arloedh, rag ev re dryghis yn splann; an margh ha'y varghek ev re dewlis y'n mor.

² An Arloedh yw ow nerth ha'm kan, hag ev res eth ha bos ow selwyans; hemm yw ow Duw ha'y wordhya a wrav, Duw ow thas, ha my a'n ughelha.

³ An Arloedh yw breselyas; an Arloedh yw y hanow.

⁴ ‘Charettow Faro ha'y lu ev a dewlis y'n mor ha'n gwella a'y benngasoryon yw sedhys y'n Mor Rudh.

⁵ An livow a's kudh; i a sedhis y'n downder avel men.

⁶ ‘Dha leuv dhyghow, A Arloedh, yw gormelys yn nerth, dha leuv dhyghow, A Arloedh, a vrew an eskar.

⁷ Yn braster dha veuredh ty a dewl dhe'n dor neb a sev er dha bynn; ty a dhannvon yn-rag dha sorr hag a's devor avel sowl.

⁸ Orth hwyth dha dhewfrik an dowrow a hwythfis yn-bann, an livow a sevis yn graghell; an downderyow a gowlas yn kolonn an mor.

⁹ ‘An eskar a leveris, “My a wra siwya, my a wra tremena, my a rann an preydh, ow hwans a vydh lenwys gansa. My a denn ow kledha, ow dorn a wra aga distrui.”

¹⁰ Ty a hwythas gans dha wyns, an mor a's kudhas; i a sedhis avel plomm y'n dowrow bras.

¹¹ ‘Piw yw haval dhis, A Arloedh, yn mysk an duwow? Piw yw haval dhis, meur yn sansoleth, euthyk yn gwriansow splann, ow kul marthusyon?

¹² Ty a ystynnas dha leuv dhyghow, an dor a's lonkas.

¹³ ‘Ty re hembronkas y'th tregeredh an bobel re dhasprensys, ty re's kevarwoedhas dre dha nerth dhe'th trigva sans.

¹⁴ An poblow re glewas; i a gren; gloesow re dhalghennas trigoryon Filistia.

¹⁵ Lemmyn pennternedh Edom yw dyegrys; ledyoryon Moab yw dalghennys yn kren; oll annedhysi Kanan re deudhis dhe-ves;

¹⁶ own hag euth a goedh warnedha; drefenn meuredh dha vregh, i yw kosel avel men, erna dremenno dha bobel, A Arloedh, erna dremenno dha bobel re brensys.

¹⁷ Ty a wra aga dri a-ji, ha'ga flansa war venydh dha ertach, an tyller, A Arloedh, re wrussys rag dha drigva, an sentri, A Arloedh, re fastyas dha dhiwleuv.

¹⁸ An Arloedh a reyn bys vykken ha bynnari.’

Kan Miryam

¹⁹ Rag mergh Faro a dheuth gans y jarettow ha'y varghogyon y'n mor, an Arloedh a dhros dowrow an mor arta warnedha, mes mebyon Ysrael a gerdhas war dhor sygh yn mysk an mor.

²⁰ Ena Miryam, an brofoeses, hwoer Aron, a gemmeras tabourik yn hy leuv ha'n benynes oll eth war hy lergh gans tabourigow ha gans donsyow.

²¹ Ha Miryam a worthybis dhedha, ‘Kenewgh dhe'n Arloedh rag ev a dryghis yn splann, an margh ha'y varghek ev re dewlis y'n mor.’

An Dowr Trenk

²² Ena Moyses a hembronkas Ysrael a'n Mor Rudh hag i eth yn gwylvos Shur; i eth tri dydh y'n gwylvos ha ny gavsons dowr.

²³ Pan dheuthons bys yn Mara, ny yllens eva dowr Mara, rag y vos trenk; rakhenna y feu gelwys Mara.

²⁴ Ha'n bobel a grodhvolas war Moyses, ow leverel, ‘Pandr'a evyn?’

²⁵ Hag ev a grias war an Arloedh; ha'n Arloedh a dhiskwedhas dhodho gwydhenn hag ev a's tewlis y'n dowr, ha'n dowr eth ha bos hweg. Ena an Arloedh a wrug dhedha ordenans ha lagha hag ena ev a's provas,

²⁶ ow leverel, ‘Mar mynnowgh goslowes yn tiwysyk orth lev an Arloedh agas Duw, ha gul an pyth yw ewn yn y dhewlagas, ha koela orth y worhemmynnow ha gwitha oll y ordenansow, ny worrav warnowgh nagonan a'n klevesow a worris war an Ejyptianys; rag my yw an Arloedh agas sawyer.’

²⁷ Ena y teuthons dhe Elim le mayth esa dewdhek fenten dhowr ha deg palmwydhenn ha tri-ugens; hag i a gampyas ena ryb an dowr.