Eksodus 12 - An Bibel Kernewek 20234 (Kernewek Kemmyn)

An Pask

¹ An Arloedh a leveris dhe Moyses hag Aron yn pow Ejyp,

² An mis ma a vydh dhywgh dalleth an misyow; y fydh an kynsa mis a'n vlydhen dhywgh.

³ Leverewgh dhe oll kuntelles Ysrael, Yn degves dydh an mis ma, kemmeres pubonan oen herwydh chi aga thasow, oen dhe bub chi;

⁴ ha mars yw an diogeth re vyghan rag oen, ena ev ha'y gentrevek nessa dh'y ji a wra kemmeres herwydh an niver a dus; herwydh an pyth a allo peub dybri, hwi a reken rag an oen.

⁵ Agas oen a vydh heb namm, gorow, unn bloedh; hwi a'n kemmer dhiworth an deves po dhiworth an gever;

⁶ ha hwi a'n gwith bys yn peswardhegves dydh an mis ma, pan wra kemmynieth kuntelles Ysrael oll y ladha gorthugherweyth.

⁷ Ena i a wra kemmeres rann a'n goes ha'y worra war an dhew bost-daras ha war benn an daras a'n chiow le ma's debrons.

⁸ I a wra dybri an kig an nos na, rostys dre dan; gans bara heb goell hag erbys hwerow i a wra y dhybri.

⁹ Na dhybrewgh rann anodho kriv po bryjys yn dowr, mes rostys, y benn ha'y arrow ha'y bottys.

¹⁰ Ha ny wrewgh gasa rann anodho dhe wortos bys y'n myttin; an rann anodho a worta hwi a wra leski.

¹¹ Y'n vaner ma hwi a wra y dhybri: grogysys agas diwglun, agas sandalyow war agas treys ha'gas gwelenn yn agas dorn; ha hwi a wra y dhybri yn unn fyski. Pask an Arloedh yw.

¹² Rag my a wra tremena dres pow Ejyp an nos na, ha my a wra gweskel pub kynsa-genys yn pow Ejyp, ha den ha best; ha war dhuwow Ejyp my a wra breus: my yw an Arloedh.

¹³ An goes a vydh tokyn dhywgh, war an chiow le mayth esowgh; ha pan welav an goes, my a wra tremena dresowgh, ha ny goedh pla vyth warnowgh dh'agas distrui, pan waskav pow Ejyp.

Goel an Bara Heb Goell

¹⁴ An jydh ma a vydh dydh kovadh dhywgh, ha hwi a wra y witha avel goel dhe'n Arloedh; der agas henedhow hwi a wra y witha avel ordenans bys vykken.

¹⁵ Seyth dydh hwi a wra dybri bara heb goell; y'n kynsa dydh hwi a wra gorra goell yn-mes a'gas chiow, rag mar teppro nebonan goell, a'n kynsa dydh dhe'n seythves, an den na a vydh treghys dhiworth Ysrael.

¹⁶ Y'n kynsa dydh hwi a wra synsi kuntelles sans, hag y'n seythves dydh kuntelles sans; ober kammenn ny vydh gwrys ynna; mes an pyth a goedh dhe bub huni y dhybri, henna unnsel a vydh pareusys genowgh.

¹⁷ Ha hwi a wra goelya goel an bara heb goell, rag an keth jydh ma my a dhros agas luyow yn-mes a bow Ejyp: rakhenna hwi a wra goelya an jydh ma, der agas henedhow, avel ordenans bys vykken.

¹⁸ Y'n kynsa mis, yn peswardhegves dydh an mis gorthugherweyth, hwi a wra dybri bara heb goell, hag y'n kynsa dydh warn ugens a'n mis gorthugherweyth.

¹⁹ Dre seyth dydh ny vydh kevys goell vyth yn agas chiow; rag mar teppro nebonan neppyth gans goell, an den na a vydh treghys a guntelles Ysrael, kyn fo alyon po genesik a'n tir.

²⁰ Ny dhebrowgh travyth gans goell; yn agas annedhow oll, hwi a wra dybri bara heb goell.

An Kynsa Pask

²¹ Ena Moyses a elwis henavogyon Ysrael, ha leverel dhedha, ‘Kewgh dhe gyrghes agas eyn herwydh agas teyluyow, ha ladha an pask.

²² Kemmerewgh tyskenn hyssop ha'y troghya y'n goes usi y'n skudell, ha tochya penn an daras ha'n dhew bost-daras gans neppyth a'n goes usi y'n skudell; ha ny wra nagonan ahanowgh mos yn-mes a dharas y ji bys y'n myttin.

²³ Rag an Arloedh a wra tremena dhe weskel an Ejyptianys, ha pan wel goes war benn an daras ha'n dhew bost-daras, an Arloedh a wra tremena dres an daras, ha ny wra gasa an distruer dhe entra agas chiow dh'agas gweskel.

²⁴ Hwi a wra goelya an dra ma avel ordenans ragos ha rag dha vebyon bys vykken.

²⁵ Ha pan dhewgh dhe'n tir a wra an Arloedh ri dhywgh, dell dhedhewis, hwi a wra gwitha an gonis ma.

²⁶ Ha pan lever dhywgh agas fleghes, “Pandra yw an gonis ma genowgh?”

²⁷ hwi a lever, “Yth yw sakrifis pask an Arloedh, rag ev a dremenas dres chiow mebyon Ysrael yn Ejyp, pan weskis an Ejyptianys, mes gasa agan chiow.” ’ Ha'n bobel a omblegyas ha gordhya.

²⁸ Ena mebyon Ysrael eth ha gul par dell worhemmynnsa Duw dhe Moyses hag Aron, yndella y hwrussons.

Mernans an Re Gynsa-genys

²⁹ Dhe hanter-nos an Arloedh a weskis pub kynsa-genys yn pow Ejyp, a gynsa-genys Faro esedhys war y dron dhe gynsa-genys an prisner esa y'n dhorvagh, ha kynsa-genys oll an gwarthek.

³⁰ Ha Faro a sevis y'n nos, ev ha'y servysi oll, hag Ejyp oll; hag yth esa kri meur yn Ejyp, rag nyns esa chi ma nag esa onan marow.

³¹ Hag ev a elwis Moyses hag Aron y'n nos, ha leverel, ‘Sevewgh, kewgh yn-rag a-dhiworth ow fobel, ha hwi ha mebyon Ysrael; ha kewgh dhe servya an Arloedh par dell leversowgh.

³² Kemmerewgh agas greow ha'gas oghen, dell leversowgh, ha kewgh dhe-ves; ha bennigewgh vy ynwedh!’

³³ Ha'n Ejyptianys a ynnias war an bobel ma's tannvonens yn-mes a'n tir yn fysk; rag i a leveris, ‘Tus varow on ni oll.’

³⁴ Ytho an bobel a gemmeras aga thoes kyns bos goell ynno, ha'ga newyow-toesa kelmys yn aga mantelli war aga skoedh.

³⁵ Mebyon Ysrael re wrussa ynwedh par dell leveris Moyses dhedha, rag i re wovynnsa orth an Ejyptianys tegennweyth a arghans hag owr, ha dillas;

³⁶ Ha'n Arloedh re rosa gras dhe'n bobel yn golok an Ejyptianys, hag i ros dhedha an pyth a vynnsons. Ytho i a byllas an Ejyptianys.

Mebyon Ysrael a Dhiberth a Ejyp

³⁷ Ha mebyon Ysrael eth yn-rag a Rameses dhe Sukkoth, neb hwegh kans mil wour war droes, heb rekna an fleghes.

³⁸ Lu kemmyskys eth gansa ynwedh, ha pur lies gwarthek, hag oghen ha greow.

³⁹ Hag i a bebis torthow heb goell gans an toes re dhrosens a Ejyp, rag y vos heb goell, drefenn aga bos herdhys yn-mes a Ejyp ha ny yllons strechya, na ny bareussens sosten dhedha aga honan.

⁴⁰ An termyn mayth esa mebyon Ysrael trigys yn Ejyp o peswar kans ha deg blydhen warn ugens.

⁴¹ Ha dhe benn an peswar kans ha deg blydhen warn ugens, y'n jydh na poran, oll luyow an Arloedh eth yn-mes a bow Ejyp.

⁴² Nos a woel o dhe'n Arloedh, dh'aga dri yn-mes a bow Ejyp; ytho an keth nos ma yw nos woelya gwithys dhe'n Arloedh gans mebyon Ysrael oll, dres aga henedhow.

Rewlys an Pask

⁴³ Ha'n Arloedh a leveris dhe Moyses hag Aron, Hemm yw ordenans an pask: ny wra estren dybri anodho.

⁴⁴ Mes pub keth prenys der arghans a yll dybri anodho wosa hwi dh'y drodreghi.

⁴⁵ Ny goedh dybri anodho godriger vyth na gwas arvethys.

⁴⁶ Yn unn chi y fydh dybrys; ny wrewgh hwi doen kig vyth yn-mes a'n chi; ha ny wrewgh hwi terri askorn anodho.

⁴⁷ Ha kuntelles Ysrael oll a wra y witha.

⁴⁸ Ha pan wra alyon godriga genowgh hag a vynn gwitha pask dhe'n Arloedh, bedhes oll y re worow trodreghys, ena ev a yll dos nes dh'y witha; ev a vydh avel genesik an tir. Mes ny wra dybri anodho den antrodreghys.

⁴⁹ Y fydh unn lagha rag an genesik ha rag an alyon usi trigys yntredhowgh.

⁵⁰ Yndella y hwrug mebyon Ysrael oll; dell worhemmynnis an Arloedh dhe Moyses hag Aron, yndella i a wrug.

⁵¹ Ha dhe'n keth jydh na an Arloedh a dhros mebyon Ysrael yn-mes a bow Ejyp herwydh aga luyow.