Eksodus 11 - An Bibel Kernewek 20234 (Kernewek Kemmyn)

Moyses a Dhargan Mernans an Re Gynsa-genys

¹ Ha'n Arloedh a leveris dhe Moyses, ‘Hwath unn pla moy y trov war Faro ha war Ejyp; a-wosa ev a as dhedha mones alemma; pan y'gas gas dhe vones, ev a wra agas gorra dhe-ves yn tien.

² Kows lemmyn yn klewans an bobel may hwovynnons pub den a'y gentrevek ha pub benyn a'y hentrevoges, tegennweyth a arghans hag owr.’

³ Ha'n Arloedh a ros gras dhe'n bobel yn golok an Ejyptianys. Dhe voy, Moyses o gour pur veur yn pow Ejyp, yn golok servysi Faro hag yn golok an bobel.

⁴ Ha Moyses a leveris, ‘Yndellma y lever an Arloedh: A-dro dhe hanter-nos, yth av yn-rag der Ejyp oll;

⁵ ha pub kynsa-genys yn pow Ejyp a wra merwel, a'n kynsa-genys a Faro esedhys war y dron, hwath dhe gynsa-genys an vaghteth usi a-dryv an velin; ha kynsa-genys an gwarthek oll.

⁶ Hag y fydh kri meur dre bow Ejyp oll, a'n eghenn na veu bythkweth kyns, na ny vydh nevra arta.

⁷ Mes erbynn mebyon Ysrael, ny wra ki grommya, erbynn den na best; may hwodhvowgh an Arloedh dhe dhissernya ynter an Ejyptianys hag Ysrael.

⁸ Hag oll dha servysi ma a wra diyskynna dhymm, hag omblegya dhymm, ow leverel, “Kewgh dhe-ves, ha'n bobel oll a'th hol.” Ha wosa henna yth av yn-mes.’ Hag ev eth a-dhiworth Faro yn sorr toemm.

⁹ Ena an Arloedh a leveris dhe Moyses, ‘Ny wra Faro koela orthis: may fo liesplekhes ow anethow yn pow Ejyp.’

¹⁰ Moyses hag Aron a wrug oll an marthusyon ma a-rag Faro; ha'n Arloedh a galeshas kolonn Faro, ha ny asas mebyon Ysrael dhe vones yn-mes a'y dir.