Ekklesiastes 3 - An Bibel Kernewek 20234 (Kernewek Kemmyn)

Yma Prys Gwiw rag Pup-tra

¹ Dhe bup-tra yma termyn ordenys ragdho ha prys gwiw dhe bub ober yn-dann an nevow.

² Prys dineythi ha prys merwel; prys plansa ha prys diwreydhya an pyth yw plynsys.

³ Prys ladha ha prys sawya; prys terri dhe'n leur ha prys drehevel.

⁴ Prys dagrewi ha prys hwerthin; prys kyni ha prys donsya.

⁵ Prys skoellya meyn a-les, ha prys aga bernya; prys byrla ha prys skonya a vyrla.

⁶ Prys hwilas, ha prys kelli; prys gwitha ha prys tewlel dhe-ves.

⁷ Prys frega ha prys gwrias; prys tewel ha prys kewsel.

⁸ Prys kara ha prys kasa; prys bresel ha prys kres.

⁹ Pana wayn a gyv an oberer der oll y lavur?

¹⁰ My re welas an ober re ros Duw dhe vebyon den, gans meur a daklow dhe wul.

¹¹ Duw re wrug pup-tra dhe vos teg yn y brys gwiw, mes ynwedh ev re worras konvedhes yn kolonn mebyon den a dermyn ow tremena trank heb worfenn, ma na allons i diskudha an ober a wrug Duw a-dhiworth an dalleth bys yn diwedh aga bewnans.

¹² My re wodhva nag eus travyth da rag mebyon den marnas bos heudhik ha gul da hedre vons bew,

¹³ pub den dhe dhybri hag eva, ha bos lowen yn oll y lavur; hemm yw ro Duw.

¹⁴ My re wodhva pup-tra a wra Duw dhe dhurya bynitha. Ny yll bos travyth keworrys dhodho, na ny yll bos travyth kemmerys dhe-ves dhiworto. Yndella re wrug Duw, rag may hwrello tus perthi own anodho.

¹⁵ An pyth re hwarva, an keth henna re beu gwrys kyns; ha'n pyth a hwyrvydh, an keth henna re beu gwrys kyns, rag Duw a hwila an pyth re beu kelys.

Gwirvreus hag Anewnder

¹⁶ My a welas neppyth ken yn-dann an howl. Yn le gwirvreus yth esa sherewneth, hag yn le ewnder yth esa kammhynseth.

¹⁷ My a leveris y'm kolonn, ‘Duw a vreus ha'n re wiryon ha'n debeles; rag yma termyn gwiw rag pub ober, ha prys breus rag pub gwrians.’

¹⁸ My a leveris y'm kolonn, ‘Hemm yw a-barth mebyon den, may hallo Duw aga frevi, ha diskwedhes dhedha aga bos aga honan haval dhe'n bestes.’

¹⁹ Drefenn an keth tra yw tenkys mebyon den ha tenkys bestes. Kepar ha dell verow an eyl, yndella y ferow y gila; an dhew a'n jeves an keth anall. Nyns eus gwayn dhe vebyon den war an bestes, rag bos pup-tra euveredh.

²⁰ An dhew a dhe'n keth tyller: an dhew a dheu dhiworth an doust, ha dhe'n doust an dhew a dhehwel.

²¹ Piw a woer spyrys mebyon den dhe yskynna yn-bann, ha spyrys an bestes dhe dhiyskynna yn-nans y'n dor?

²² Ytho my a welas nag eus travyth gwell rag den ages lowenhe yn y lavur, rag bos henna y rann; rag piw a yll diskwedhes dhodho an pyth a hwyrvydh wosa y dermyn ev?