Ekklesiastes 12 - An Bibel Kernewek 20234 (Kernewek Kemmyn)

¹ Porth kov a'th Kreador yn dydhyow dha yowynkneth, kyns dos an drog dhydhyow, ha'n blydhynyow may leverydh, ‘Ny'm beus plesour ynna’;

² kyns bos tewlhes an howl ha'n golow ha'n loer ha'n ster, ha'n kommol a dhehwel wosa an glaw;

³ y'n jydh may kren gwithysi an chi, ha gwarrgromm yw an wer grev, ha'n valoryon a hedh drefenn i dhe dhos ha bos boghes, ha'n re a vir yn-mes der an fenestri yw tewlhes,

⁴ ha deges yw an darasow y'n stret, pan yw isel tros an melyas, hag ev a sev yn-bann orth son an edhen, hag iselhes yw oll myrghes an gan;

⁵ hag ynwedh i a berth own a'n dra yw ughel hag a beryllow y'n fordh; ha'n alamandwydhenn a vleujyow, ha'n kulyek-reden a dheu ha bos syger, ha frut an kaper a gyll y nerth; pan vydh den ow mos dh'y ji heb diwedh, ha'n gynoryon a wra mos a-derdro y'n stret;

⁶ kyns bos an gordenn arghansek treghys, ha'n bolla owrek terrys, ha'n pycher brewys ryb an fenten, ha'n ros dhowr terrys ryb an puth,

⁷ ha'n doust a dhehwel dhe'n dor kepar dell o, ha'n spyrys a dhehwel dhe Dhuw neb a'n ros.

⁸ Euveredh a euveredh, yn-medh an Pregowther, pup-tra yw euveredh.

Epilog

⁹ Ha dres henna, drefenn bos an Pregowther fur, ev a besyas dyski godhvos dhe'n bobel, ha ri skovarn, ha hwilas; ev a restras lies lavar.

¹⁰ An Pregowther a hwilas kavoes geryow hweg, ha skrifa yn ewn lavarow a wiryonedh.

¹¹ Geryow tus fur yw kepar ha pigeryow, ha lavarow kuntellys yw kepar ha kentrow takkys fast; i re beu res gans unn bugel.

¹² Bydh gwarnys, ow mab, erbynn moy es an re ma; nyns eus diwedh dhe wul lies lyver, ha meur a studhya yw skwithter dhe'n kig.

¹³ Diwedh an mater, wosa klewes pup-tra, yw hemma: Porth own a Dhuw, ha gwith y worhemmynnow, drefenn bos hemma dever pub den oll.

¹⁴ Rag Duw a dhre pub gwrians dhe vreus, hwath pup-tra yw kelys, po da po drog.