Ekklesiastes 1 - An Bibel Kernewek 20234 (Kernewek Kemmyn)

Prolog: Pup-tra yw Euver

¹ Geryow an Pregowther, mab Davydh, myghtern yn Yerusalem.

² Euveredh a euveredh, yn-medh an Pregowther, euveredh a euveredh, pup-tra yw euver.

³ Pandr'yw an gwayn dhe vebyon den der oll aga ober kales a wrons i dhe oberi omma yn-dann an howl?

⁴ Henedh a dremen ha henedh a dheu, mes an norvys a dhur bynitha.

⁵ An howl a dhrehav ha'n howl a sedh, ev a fisten dh'y le may trehav anodho arta.

⁶ Dhe'n dhyghowbarth y hwyth an gwyns, hag a dreyl dhe'n gledhbarth; a-dro hag a-dro y treyl, ha dehweles, ow mos a-dro arta yn y hynsyow.

⁷ An goverow oll a res dhe'n mor, byttegyns nyns yw an mor leun nevra: dhe'n tyller may hwre an goverow resek anedha kyns, y hwrons i resek arta

⁸ Oll an taklow ma yw skwithus: ny yll denvyth kewsel a-dro dhedha. Nyns yw an lagas gwalghys gans gweles, na'n skovarn gorlenwys gans klewes.

⁹ An pyth re hwarva, an keth henna a hwyrvydh arta; ha'n pyth re beu gwrys, an keth henna a vydh gwrys arta, ha nyns eus travyth nowydh yn-dann an howl.

¹⁰ Eus neppyth may hyllir leverel a-dro dhodho, ‘Otta, nowydh yw hemma’? Nag eus, seuladhydh ev re beu, pell kyns agan oes ni.

¹¹ Nyns eus kov a'n taklow usi passyes; na ny vydh a'n taklow hwath dhe dhos, ny vydhons i kovhes gans an re a dheu a-wosa.

Raglavar

¹² My, an Pregowther, my re beu myghtern war Ysrael, yn Yerusalem,

¹³ ha my a settyas ow brys yn furneth dhe hwilas ha hwithra pup-tra re beu gwrys yn-dann nev. Beghus yw an ober re ros Duw dhe vebyon den, gans meur a daklow dhe wul.

¹⁴ My re welas pup-tra yw gwrys yn-dann an howl: hag otta, yth yw oll hemma euveredh ha chasya war-lergh an gwyns.

¹⁵ An pyth yw kamm ny yllir y wul kompes: an pyth a fyll ny yllir y rekna.

¹⁶ My a leveris y'm kolonn, ‘My re dheuth ha bos meur, ha furra ages oll an re esa dres Yerusalem kyns ow thermyn vy: ow holonn re brederis a furneth ha skians.’

¹⁷ Ytho my a settyas ow brys dhe wodhvos furneth ha dhe gonvedhes muskokter ha follneth; ha my a wodhva hemma ynwedh dhe vos yeuni war-lergh an gwyns.

¹⁸ Rag yn palster a furneth yma meur a dhuwon, ha seul a guntell godhvos a guntell poen.