Efesianys 3 - An Bibel Kernewek 20234 (Kernewek Kemmyn)

Menystrans Powl dhe'n Jentilys

¹ Rag hemma, my, Powl, prisner Krist Yesu ragowgh hwi, an Jentilys –

² mar klewsowgh a'n charj dhe venystra gras Duw a veu res dhymmo ragowgh,

³ fatell veu notys dhymm an mysteri dre dhiskwedhyans, kepar dell skrifis dhywgh kyns war verr lavarow.

⁴ Ow redya hemma, hwi a woer konvedhes ow skians yn mysteri Krist,

⁵ na veu notys dhe vebyon den yn henedhow erell, kepar dell yw diskwedhys lemmyn dh'y abesteli sans, ha'y brofoesi y'n Spyrys,

⁶ an Jentilys dhe vos kes-heryon ha keskorf, ha kevrennoryon a'n ambos yn Krist Yesu der an aweyl.

⁷ Ha my eth ha bos gwas war-lergh ro an ras a Dhuw, res dhymm war-lergh oberyans y alloes.

⁸ Dhymmo vy, yw le ages an lyha a'n syns oll, y feu res an ras ma dhe bregoth dhe'n Jentilys an rychys a Grist yw dres hwithra,

⁹ ha golowi dhe bub den towl an mysteri kudhys dres an oesow yn Duw neb a wrug pup-tra,

¹⁰ may fe deklarys lemmyn dhe'n prynsipatys ha'n potestatys y'n tylleryow nevek, der an eglos, furneth Duw, meur hy diverseth,

¹¹ war-lergh towl an oesow a wrug ev yn Krist Yesu agan Arloedh,

¹² yn neb y'gan beus kolonnekter ha fordh dhodho yn trest dre fydh ynno.

¹³ Rag hemma, my a'gas pys na gemmerrowgh digolonn y'm galarow ragowgh hwi; agas glori yns i.

Godhvos Kerensa Krist

¹⁴ Ytho, my a bleg an dhewlin a-dherag an Tas,

¹⁵ mayth yw henwys warnodho pub teylu yn nev ha nor,

¹⁶ may rollo dhywgh hwi, war-lergh rychys y splannder, dhe vos krevhes gans galloes der y Spyrys y'n den pervedhel,

¹⁷ may trikko Krist, dre fydh, yn agas kolonn, gwreydhys ha selys yn kerensa,

¹⁸ ma'gas bo nerth dhe gonvedhes gans oll an syns, pyth yw an les ha'n hys ha'n ughelder ha'n downder,

¹⁹ ha dhe aswonn kerensa Krist a dremen dres aswonnvos, may fewgh lenwys a oll leunder Duw.

²⁰ Lemmyn, dhe neb a yll gul dres pup-tra yn pals dres eghenn moy es dell bysyn na brederyn, war-lergh an galloes a ober ynnon ni,

²¹ dhodho ev re bo gordhyans y'n eglos hag yn Krist Yesu dres oll henedhow, trank heb worfenn. Amen.