Ebrowyon 9 - An Bibel Kernewek 20234 (Kernewek Kemmyn)

Sentri an Nor ha Sentri Nev

¹ Lemmyn, hwath an kynsa kevambos a'n jevo ordenansow rag gordhyans ha sentri y'n bys.

² Rag tabernakel a veu pareusys, an onan war-ves, hag ynno an kantoler ha'n voes ha ragworrys torthow an wolok – hemm yw henwys an Sentri;

³ hag a-dryv an nessa kroglenn y sev tabernakel – hemm yw henwys Sans a'n Sansow –

⁴ a'n jevo ynno an alter owrek a ynkys hag argh an kevambos kudhys pub tenewen gans owr, hag ynni seth owrek a synsi an manna, ha gwelenn Aron hag a eginas, ha leghennow an kevambos;

⁵ a-ughto yth esa cherubim an golewder ow korskeusi an dregeredhva. A'n traow ma nyns eus lemmyn kewsel yn funys.

⁶ An darbarow ma gwrys yndellma, yth a an oferysi pup-prys y'n kynsa tabernakel rag gul aga gwasonieth;

⁷ mes a-ji dhe'n nessa, nyns a marnas an arghoferyas, hag ev marnas unnweyth y'n vlydhen, ha nyns a heb kemmeres goes hag a offrynn ragdho y honan, ha rag peghosow an bobel gwrys dre wall.

⁸ Yndellma an Spyrys Sans a dhiskwa nag yw igerys hwath fordh dhe'n sentri, hedre vo an kynsa tabernakel hwath ow sevel

⁹ (hag yw parabolenn rag an oes a-lemmyn). Herwydh hemma, rohow ha sakrifisow yw offrynnys na yllons perfydhhe kowses an gordhyer,

¹⁰ marnas dyghtya boes ha diwes hag omwolghans liesek, ordenansow an kig, gorrys warnedha bys termyn dasfurvyans.

¹¹ Mes pan omdhiskwedhas Krist avel arghoferyas an traow mas dhe dhos, ena der an tabernakel moyha ha perfyttha (na veu gwrys gans leuv, henn yw nag yw a'n kreasyon ma)

¹² ev a entras, unnweyth rag oll, dhe'n tyller sans le na gemmeras goes gever na leughi, mes y woes y honan, yndellma ow kavoes daspren bys vykken.

¹³ Rag mar kyll goes gever ha terewi, ha lusu lejek skoellys war dus dhefolys, sanshe dhe lanheans an kig,

¹⁴ pygemmys moy y hwra goes Krist, neb a omoffrynnas heb namm dhe Dhuw der an Spyrys nevra a dhur, golghi agas kowses dhiworth oberow marow dhe servya an Duw bew.

¹⁵ Yndella ev yw mayn an kevambos nowydh, may hwrello an re yw gelwys degemmeres an eretons ambosys bys vykken, a-ban mernans dhe hwarvos rag aga daspren a'n peghadow yn-dann an kynsa kevambos.

¹⁶ Rag pan vo kemmynnskrif, mernans an kemmynner a dal bos prevys.

¹⁷ Rag kemmynnskrif ny dhalleth kyns mernans, rag nevra ny'n jeves fors hedre vo bew neb a'n gwrug.

¹⁸ Yndella, hwath ny veu an kynsa kevambos gwrys heb goes.

¹⁹ Rag pan veu leverys gans Moyses pub gorhemmynn a'n lagha dhe'n bobel oll, ev a gemmeras goes leughi ha gever, gans dowr ha gwlan kogh ha hyssop, ha skoellya goes ha war an lyver y honan ha war an bobel oll,

²⁰ ow leverel, ‘Ottomma goes an kevambos a worhemmynnis Duw dhywgh.’

²¹ Ha war an tabernakel ha'n lestri oll devnydhys yn gordhyans ev a skoellyas goes keffrys.

²² Yn hwir, herwydh an lagha ogas pub tra yw glanhes gans goes, ha heb skoellya goes ny vydh dehwelyans peghosow.

Pegh Dileys der Sakrifis Krist

²³ Ytho y feu res, a'n unn tu, bos glanhes toknys an traow nevek y'n gis ma, mes an traow nevek aga honan gans sakrifisow gwell ages an re ma.

²⁴ Rag nyns yw a-ji dhe sentri gwrys gans leuv, tokyn an gwir sentri, mayth entras Krist, mes a-ji dhe nev y honan, lemmyn dhe omdhiskwedhes ragon a-rag fas Duw.

²⁵ Ha nyns o dhe omoffrynna menowgh, par dell enter an arghoferyas a-ji dhe'n Tyller Sans pub blydhen gans goes dhiworth re erell;

²⁶ rag ena y tegoedhvia dhodho godhevel menowgh a-dhia wrians an bys. Mes lemmyn ev re omdhiskwedhas unnweyth, dhe dhiwedh an oesow, ha dilea peghosow der omsakrifia.

²⁷ Ha poran dell yw ordenys dhe dus merwel unnweyth, ha wosa henna breus,

²⁸ yndellma Krist, wosa bos offrynnys unnweyth dhe berthi peghosow lies huni, a wra omdhiskwedhes rag nessa gweyth, na vydh rag dilea pegh, mes rag selwyans dhe'n re a wra y waytyas gans mall.