Ebrowyon 8 - An Bibel Kernewek 20234 (Kernewek Kemmyn)

Arghoferyas Kevambos Nowydh ha Gwell

¹ Lemmyn war verr lavarow, an pyth a leveryn yw hemma: ni a'gan beus arghoferyas, onan neb a esedhas orth leuv dhyghow tron Meuredh an nevow,

² menyster y'n sentri ha'n gwir dabernakel, nag yw drehevys gans den mes gans an Arloedh.

³ Rag pub oferyas yw ordenys dhe offrynna rohow ha sakrifisow; yndellma yth yw res bos gans an oferyas ma neppyth dhe offrynna.

⁴ Ytho, mar pe war an nor, ny via oferyas vyth, a-ban eus oferysi a offrynn rohow herwydh an lagha.

⁵ I a serv yn ensampel ha skeus a'n sentri nevek; rag pan o Moyses parys dhe dhrehevel an tabernakel, gwarnys veu gans Duw, ow leverel, ‘Gwith may hwrylli pup-tra herwydh an patron a veu diskwedhys dhis war an menydh.’

⁶ Mes lemmyn, Krist re gavas menystrans hag yw hwath bryntinna ages an onan koth a-ban yw ev an mayn a gevambos gwell, selys war ambosow gwell.

⁷ Rag mar pe an kynsa kevambos na dinamm, ny via tyller rag an nessa.

⁸ Rag ev a gyv fowt ynna pan lever, ‘An dydhyow a dheu, yn-medh an Arloedh, may hwrav kevambos nowydh gans chi Ysrael ha gans chi Yuda;

⁹ dihaval dhe'n kevambos a wrug gans aga thasow y'n jydh ma's kemmeris er an dhorn ha'ga hembronk yn-mes a bow Ejyp; rag ny drigsons y'm kevambos hag yndella ny wrug vri anedha, yn-medh an Arloedh.

¹⁰ Hemm yw an kevambos hag a wrav gans chi Ysrael wosa an dydhyow na, yn-medh an Arloedh; my a worr ow laghow yn aga brys, ha'ga skrifa war aga holonn, ha my a vydh aga Duw, hag i a vydh ow fobel.

¹¹ Ha ny wrons i dyski pub huni y gentrevek po pub huni y vroder, ow leverel, “Aswonn an Arloedh”, rag pubonan a wra ow aswonn, a'n lyha anedha dhe'n moyha.

¹² Rag my a vydh tregeredhus a'ga drogoberow, ha ny wrav perthi kov namoy a'ga feghosow.’

¹³ Ow kewsel a gevambos nowydh, ev re dheklaryas an kynsa dhe vos koth. Ha'n pyth yw deklarys koth ha gyllys koth yw ogas dhe vones dhe goll.