Ebrowyon 7 - An Bibel Kernewek 20234 (Kernewek Kemmyn)

Ordyr Melkisedek

¹ Rag an ‘Melkisedek ma, myghtern Salem, oferyas Duw an Ughella, a dheuth erbynn Abraham ow tehweles a-dhiworth ladhva an vyghternedh, ha'y venniga’;

² ha dhodho Abraham a gevrennas ‘degves rann a bup-tra.’ Ev yw kynsa, dre dreylyans y hanow, ‘myghtern ewnder’, hag ena ynwedh, myghtern Salem, henn yw ‘myghtern kres.’

³ Ev yw heb tas na mamm nag aghskrif ha ny'n jeves na dallethvos dydhyow na diwedh bewnans, mes, haval dhe Vab Duw, ev a bes yn oferyas bys vykken.

⁴ Mir ha meur yw! Abraham an ugheldas ynwedh a ros dhodho dega a'n preydh.

⁵ Ha'n vebyon na a Levi, neb a dhegemmer an soedh a oferyas, a's teves gorhemmynn an lagha dhe gemmeres dega a'n bobel, henn yw a'ga breder, kynth yw an re ma ynwedh a dhiwglun Abraham.

⁶ Mes an den ma, na veu sevys a'ga linyeth, a dhegemmeras dega a Abraham, ha'y venniga ev, neb a'n jevo an ambosow.

⁷ Ha heb kontradia, neb yw le yw bennigys gans neb yw gwell.

⁸ Y'n eyl kas dega yw degemmerys gans tus varwel; y'n kas arall, gans onan, a neb yw destys anodho ev dhe vos yn few.

⁹ Yn ken lavarow, Levi y honan, neb a dhegemmer degow, a dyli degow dhe Abraham,

¹⁰ rag hwath yth esa yn diwglun y das pan dheuth Melkisedek er y bynn.

¹¹ Ytho, mar teuth perfydhder der oferyaseth leviek (rag yn-danno an bobel a dhegemmeras dega an lagha), ena pana edhomm eus a gen oferyas dhe sevel war-lergh ordyr Melkisedek, a-der war-lergh ordyr Aron?

¹² Rag pan vo chanj yn oferyaseth, yma res a janj y'n lagha ynwedh.

¹³ Rag neb anodho y kewsir an traow ma, a dheuth a gen loeth, ha ny servyas nagonan anodho orth an alter.

¹⁴ Rag pur gler yw y sevis agan Arloedh a Yuda hag a'n loeth na ny leveris Moyses travyth a-dro dhe oferysi.

¹⁵ Ha klerra hwath yw pan saffo ken oferyas yn hevelep Melkisedek

¹⁶ neb na dheuth ha bos oferyas herwydh edhomm an lagha a-dro dhe'n kig, mes dre nerth bewnans andhistruadow.

¹⁷ Rag dustuniys yw, ‘Ty yw oferyas bys vykken, war-lergh ordyr Melkisedek.’

¹⁸ A'n eyl dorn, gorhemmynn koth yw settys a-denewen rag y vos gwann ha heb les

¹⁹ (rag ny wrug an lagha travyth perfydh); a'y gila, govenek gwell yw dres, dredho may teun nes dhe Dhuw.

²⁰ Ha nyns o heb ti. Re erell a dheuth ha bos oferysi heb ti,

²¹ mes neb a veu gwrys oferyas gans ti – Duw a leveris dhodho, ‘An Arloedh re dos ha ny vynn treylya y vrys, “Ty yw oferyas bys vykken.” ’

²² Hemma a wra Yesu an mewghyer a gevambos gwell.

²³ An oferysi kyns o lies aga niver, drefenn aga bos lettys dre vernans a besya yn aga oferyaseth;

²⁴ mes ev a syns y soedh bys vykken, rag ev dhe besya bys vykken.

²⁵ Yndellma, ev a yll selwel, rag oll termyn, an re a nes dhe Dhuw dredho, rag ev a vew prest dhe bysi ragdha.

²⁶ Rag gwiw o bos dhyn arghoferyas a'n par na, sans, divlam, andhefolys, diberthys a'n beghadoryon, ughelhes a-ugh an nevow.

²⁷ Ny'n jevo edhomm, avel an arghoferysi na, a offrynna sakrifis pub-dydh, kynsa rag y beghosow ev hag ena rag peghosow an bobel; ev a wrug hemma unnweyth pan omoffrynnas y honan.

²⁸ Rag an lagha a orden tus yn aga gwannder avel arghoferysi, mes ger an ti, hag a dheuth diwettha ages an lagha, a apoynt Mab re beu gwrys perfydh bys vykken.