Ebrowyon 4 - An Bibel Kernewek 20234 (Kernewek Kemmyn)

¹ Ytho, ha'n ambos hwath gesys dhe entra dh'y bowesva, perthyn own na vo nagonan ahanowgh breusys a fyllel dh'y attaynya.

² Rag devri an nowodhow da a dheuth dhyn ni par dell wrug dhedha i ynwedh; mes an negys a glewsons, ny veu dh'aga les, drefenn na vons kesunys yn fydh gans an re a glewas.

³ Rag ni, re gryssyn, a dheu a-ji dhe'n bowesva, dell leveris, ‘Dell wrugavy ti y'm sorr, “Ny wrons entra y'm powesva” ’, kyn feu gorfennys y oberow a-dhia wrians an bys.

⁴ Rag ev re gewsis yndellma yn neb le a-dro dhe'n seythves dydh, ‘Ha Duw a bowesas y'n seythves dydh a'y oberow oll.’

⁵ Hag arta y'n tyller ma, y leveris, Nevra ny dhons a-ji dhe'm powesva.

⁶ A-ban yw gesys ytho rag re dhe entra ynni, ha'n re a dhegemmeras an nowodhow da seulabrys a fyllis entra drefenn diwostytter,

⁷ arta ev a sett neb unn jydh, ‘Hedhyw’, ow leverel dre Davydh wosa termyn mar hir y'n geryow devynnys kyns, ‘Hedhyw, pan glewowgh y lev, na galeshewgh agas kolonn.’

⁸ Rag mar rolla Yoshua powes dhedha, ny gowssa Duw a-wosa a gen dydh.

⁹ Ytho yma powes an sabot gesys hwath rag pobel Duw;

¹⁰ rag piwpynag a dheffo a-ji dhe bowesva Duw, henna a hedh a'y oberow, dell wrug Duw a'y oberow ev.

¹¹ Bedhes mall genen ytho a entra y'n bowesva na, ma na goettho nagonan dre dhiwostytter a'n keth par.

¹² Rag ger Duw yw effeythus ha lymma ages pub kledha dewvinyek, ow kwana erna ranno enev ha spyrys, mellow ha mer, hag a yll breusi tybyansow ha mynnas an golonn.

¹³ Hag a-ragdho ev, nyns yw kudhys kreatur vyth, mes oll yw noeth hag igor dh'y dhewlagas ev, may tal dhyn gul akont dhodho.

Yesu an Arghoferyas Meur

¹⁴ Ytho, a-ban y'gan beus arghoferyas meur re dremenas der an nevow, Yesu, Mab Duw, synsyn fast agan professyans.

¹⁵ Rag ny'gan beus arghoferyas na yll keskodhevel gans agan gwannder, mes onan neb re beu temptys avelon yn pub tremmynn, heb pegha hogen.

¹⁶ Nesyn ytho gans fydhyans dhe'n tron a ras, may tegemmerryn tregeredh ha kavoes gras dhe weres yn termyn edhomm.