Ebrowyon 12 - An Bibel Kernewek 20234 (Kernewek Kemmyn)

Dyskybleth an Arloedh

¹ Ytho, ni ynwedh, a-ban eus kommolenn mar veur a dhustunioryon a-dro dhyn, tewlyn a-denewen pub ankombrans ha pegh hag a len mar ogas, ha dre bargh, resyn an resegva yw settys a-dheragon,

² ow mires war-tu ha Yesu, awtour ha perfydhder agan fydh, rag an lowender settys a-ragdho ev neb a borthas an grows, ow tispresya an meth, ha neb re esedhas orth leuv dhyghow tron Duw.

³ Prederewgh anodho neb a borthas kemmys kedrynn a beghadoryon er y bynn, ma na vowgh skwith na digolonnek.

⁴ Yn agas strif erbynn pegh, ny omledhsowgh na hwath bys yn skoellya goes.

⁵ Hag a ankevsowgh an ger a gonfort a gews orthowgh avel mebyon? ‘Ow Mab, na wra dispresya dyskybleth an Arloedh, na bos digolonnek pan vi keskys ganso.

⁶ Rag an Arloedh a gesk neb yw kerys ganso, ha skorjya peub a dhegemmer avel mab.’

⁷ Duryewgh yn-dann an dhyskybleth. Yma Duw orth agas dyghtya avel mebyon. Rag py mab yma na'n keredh y das?

⁸ Mars owgh heb dyskybleth may kevrennsowgh oll ynno, nyns owgh mebyon mes bastardyon.

⁹ Pella, ni a'gan bo tasow war-lergh an kig dh'agan keredhi ha ni a wre vri anedha. A ny vydhyn hwath moy gostydh dhe Das an spyrysyon, ha bewa?

¹⁰ Rag i a'gan kessydhyas rag nebes dydhyow herwydh aga bodh, mes ev a'gan kessydh dh'agan les may kevrennyn yn y sansoleth.

¹¹ Rag a-lemmyn pub dyskybleth a hevel ken a dhuwon, a-der ken a lowena; wortiwedh y teg frut a gres hag a ewnder dhe'n re yw dyskys ganso.

¹² Ytho krevhewgh an dhiwdhorn ydhil ha'gas dewlin dhifreth,

¹³ ha gwrewgh hynsyow kompes dh'agas treys, ma na vo treylys dhe-ves an pyth yw evredhek, mes kynsa bos yaghhes.

Gwarnyans erbynn Nagha Gras Duw

¹⁴ Hwilewgh kres gans an dus oll ha'n sansoleth, ma na wra denvyth gweles an Arloedh hebdhi.

¹⁵ Gwaytyewgh ma na fallo nagonan a gavoes gras Duw; ma na eginno gwreydhenn hwerowder ha gul kedrynn, dredhi may teffo lies ha bos defolys;

¹⁶ ma na vo nagonan plosek nag ansans avel Esaw a werthas y wir-genesik rag unn prys boes.

¹⁷ Rag hwi a woer pan vynna erita an bennath, neghys veu a-wosa, rag ny gavas spas a edrega kyn y'n hwilas gans dagrow.

¹⁸ Rag ny nessowgh dhe neppyth a yll bos tochys, tan ow tewi, ha tewlder, ha tewlwolow, ha korwyns,

¹⁹ ha son an hirgorn, ha lev geryow a wra dhe'n gleworyon pysi na vo kewsys dhedha pella geryow.

²⁰ Rag ny borthsons an gorhemmynn a veu res, ‘Hwath enyval mar toch an menydh y fydh labydhys.’

²¹ Yn hwir, mar euthyk o an wolok may leveris Moyses, ‘Krena a wrav der own.’

²² Mes hwi re dheuth dhe venydh Sion ha sita an Duw bew, Yerusalem an nevek, ha dhe eledh dres niver yn kuntelles solem,

²³ ha dhe eglos an re gynsa-genys omrolys yn nev, ha dhe Dhuw, an breusydh a bup-tra, ha dhe spyrysyon tus ewnhynsek gwrys perfydh,

²⁴ ha dhe Yesu, mayn an kevambos nowydh, ha dhe'n goes skoellys a gews tra well ages goes Abel.

²⁵ Gwaytyewgh na'n nagghewgh neb a gews. Rag mar ny wrussons an re na dhiank pan naghsons neb a's gwarnyas war an nor, hwath dhe le y hwren ni diank anodho neb a'gan gwarn a nev.

²⁶ Ena y lev a wrug dhe'n dor krena; mes lemmyn ev re ambosas, ow leverel, ‘Unnweyth moy ny wrav unnsel an nor dhe dhegrena mes an nev ynwedh.’

²⁷ An lavar ma, ‘Unnweyth moy’, a dhiskwa treuskorrans an pythow yw kryghyllys, henn yw an pythow re beu gwrys, may pessyo an pythow na yll bos kryghyllys.

²⁸ Ytho godhvydhyn gras a dhegemmeres ruvaneth na yll degrena, ha rakhenna profyn dhe Dhuw gordhyans plegadow yn revrons hag agha;

²⁹ rag agan Duw yw tan a gowllesk.