Ebrowyon 10 - An Bibel Kernewek 20234 (Kernewek Kemmyn)

¹ Rag an lagha, na'n jeves marnas skeus a'n traow mas dhe dhos a-der an purra imaj a'n traow ma, ny yll nevra, der an keth sakrifisow yw offrynnys blydhen wosa blydhen heb lett, perfydhhe an re a dheu nes.

² Poken a ny wrussens hedhi a vos offrynnys? Mar pe glanhes an re ow kormel unnweyth rag oll, ny's tevia aswonnvos pegh.

³ Mes y'n sakrifisow ma yma arta kov pegh pub blydhen.

⁴ Rag ny yll goes terewi na gever dilea peghosow.

⁵ Hemm yw prag, pan dheuth Krist dhe'n bys, ev a leveris, ‘A sakrifis hag offrynn, ny' feu hwans, mes korf re bareussys ragov;

⁶ yn offrynnow leskys hag offrynnow pegh ny' feu plesour.

⁷ Ena y leveris vy, “Otta, deuvev, may hwrylliv dha vodh, a Dhuw”, dell yw skrifys ahanav yn rol an lyver.’

⁸ Pan leveris yndellma, ‘Ny' feu na hwans na plesour yn sakrifisow hag offrynnow hag offrynnow leskys hag offrynnow pegh’ (an re ma yw offrynnys herwydh an lagha),

⁹ ena y keworras, ‘Otta, deuvev may hwrylliv dha vodh.’ Ev a dhile an kynsa rag sevel an nessa.

¹⁰ Ha der an bodh na, ni re beu sanshes, der offrynn korf Yesu Krist unnweyth rag oll.

¹¹ Ha pub oferyas a sev pub-dydh ow menystra, owth offrynna menowgh an keth sakrifisow na yllons nevra dilea peghosow.

¹² Mes pan offrynnsa Krist unn sakrifis rag peghosow bys vykken, ‘ev a esedhas orth leuv dhyghow Duw’,

¹³ ow kortos ena ‘erna vo gorrys y eskerens avel skavell yn-dann y dreys.’

¹⁴ Rag der unn offrynn ev re berfydhhas bys vykken an re yw sanshes.

¹⁵ Ha'n Spyrys Sans a dheg dustuni dhyn: rag wosa leverel,

¹⁶ ‘Hemm yw an kevambos a wrav gansa wosa an dydhyow na, yn-medh an Arloedh; my a worr ow laghow yn aga holonn, ha'ga skrifa yn aga brys’,

¹⁷ ena ev a geworr, ‘A'ga feghosow ha'ga oberow dilagha ny borthav kov namoy.’

¹⁸ Ple mayth eus gevyans a'n re ma, ny vydh edhomm na fella a offrynn rag peghosow.

Keskyans ha Gwarnyans

¹⁹ Ytho, breder, a-ban y'gan beus fydhyans dhe entra dhe'n sentri dre woes Yesu,

²⁰ der an fordh vew nowydh a igoras ev der an vayl, henn yw der y gig,

²¹ hag a-ban y'gan beus oferyas meur war ji Duw,

²² nesyn gans kolonn wir yn surneth leun a fydh, agan kolonn purhes glan a debelgowses ha'gan korf golghys gans dowr pur.

²³ Synsyn fast dhe brofessyans agan govenek fyrv, rag lel yw ev neb a ambosas;

²⁴ hag ombrederyn fatell ynniyn an eyl y gila dhe gerensa hag oberow mas,

²⁵ heb forsakya agan kuntellyans agan honan, dell yw an usadow gans rann, mes kennertha an eyl y gila, ha seul voy dell welowgh an Jydh ow nesa.

²⁶ Rag mar peghyn a'gan bodh wosa degemmeres aswonnvos leun a'n gwiryonedh, nyns eus gesys namoy sakrifis rag peghosow,

²⁷ mes neb gwaytyans ownek a vreus, ha konnar an tan a wra lenki an eskerens.

²⁸ Neb re dhenaghas lagha Moyses a verow heb truedh ‘war dhustuni dew po tri dustunier.’

²⁹ Pygemmys gweth an kessydhyans, tybi a wrewgh, a vydh breusys gwiw dhe neb a stank war Vab Duw ha synsi dhe vos avlan goes an kevambos dredho may feu sanshes, hag arvedh an Spyrys a ras?

³⁰ Rag ni a'n aswonn neb a leveris, ‘Dhymmo vy yw an dial; my a attal.’ Hag arta, ‘An Arloedh a wra breusi y bobel.’

³¹ Tra euthyk yw koedha yntra diwleuv an Duw bew.

³² Mes perthewgh kov a'n dydhyow kyns wosa hwi dhe vos enowys, hwi a wodhevi strif kales a boenow,

³³ treweythyow ow kodhevel tebel dhyghtyans ha galar a-wel tus, treweythyow ow pos kevrennoryon a'n re dyghtys yndella.

³⁴ Rag yn hwir hwi a geskodhevis gans an brisnoryon, ha hwi a wodhevis yn lowen ravnans agas pythow, a-ban wodhyewgh bos genowgh pythow gwell hag a bes.

³⁵ Na dewlewgh dhe-ves ytho agas fydhyans, hag a'n jeves pewas meur.

³⁶ Rag hwi a'gas beus edhomm a berthyans, may hwryllowgh bodh Duw ha kavoes an pyth yw ambosys.

³⁷ Rag ‘hwath unn pols pur vyghan ha neb a vydh ow tos a dheu, ha ny wra strechya;

³⁸ mes ow den gwiryon a wra bewa dre fydh, ha mar kildenn, ny gemmer ow enev plesour ynno.’

³⁹ Mes nyns on ni a'n re a gildenn ha mos dhe goll, mes a'n re a's teves fydh ha gwitha aga enev.