Ebrowyon 1 - An Bibel Kernewek 20234 (Kernewek Kemmyn)

Duw re Gewsis der y Vab

¹ Yn lies fordh hag yn lies gis, Duw a gewsis y'n kothenep dh'agan tasow der an brofoesi;

² mes y'n dydhyow diwettha ma ev re gewsis dhyn dre Vab, neb a wrug y ordena an her a bup-tra, dredho ynwedh may hwrug an oesow,

³ neb yw dewynnyans golewder Duw ha gwir imaj y substans, ow mentena traow oll der an ger a'y nerth. Pan wrussa glanheans peghosow, ev a esedhas orth leuv dhyghow an Meuredh y'n tylleryow ughel,

⁴ ow tos ha bos kemmys gwell ages an eledh, par dell yw an hanow a eritas bryntinna agessa i.

An Mab Ughella ages an Eledh

⁵ Rag dhe by el y leveris Duw bythkweth, ‘Ty yw ow Mab; hedhyw my re'th tineythis’? Po arta, ‘My a vydh Tas dhodho, hag ev a vydh dhymm Mab’?

⁶ Hag arta, pan dhre ev y'n bys an kynsa-genys, y lever, ‘Eledh Duw oll, gordhyens ev.’

⁷ Hag a-dro dhe'n eledh y lever, ‘Neb a wra y eledh spyrysyon, ha'y venysters flammow tan.’

⁸ Mes a-dro dhe'n Mab y lever, ‘Dha dron, a Dhuw, yw bys vykken ha bynnari; gwelenn wiryon yw gwelenn dha wlaskor.

⁹ Ty re garas ewnder ha kasa anlaghedh; yndella Duw, dha Dhuw, re'th untyas gans oyl lowender dres dha geskowetha.’

¹⁰ Ha, ‘Ty, Arloedh, y'n dalleth, a fondyas an nor, ha'n nevow yw ober dha dhiwleuv;

¹¹ i a dhe goll, mes ty a bes; i oll a gothha avel dillasenn;

¹² avel mantell ty a wra aga rolya war-barth, hag avel dillasenn i a vydh chanjys. Mes ty yw an keth, ha dha vlydhynyow ny wrons fyllel.’

¹³ Mes dhe by onan a'n eledh y leveris bythkweth, ‘Esedh orth ow leuv dhyghow erna wrylliv a'th eskerens skavell rag dha dreys’?

¹⁴ A nyns yns i oll spyrysyon menystra dannvenys rag gonis, a-barth an re a wra erita selwyans?