Diskwedhyans 5 - An Bibel Kernewek 20234 (Kernewek Kemmyn)

An Rol-skrifa ha'n Oen

¹ Ha my a welas y'n dhorn dhyghow a neb o esedhys war an tron, rol-skrifa, skrifys warnedhi a-ji ha war an keyn, selys gans seyth sel.

² Ha my welas el nerthek ow karma, ughel y lev, ‘Piw yw gwiw dhe igeri an rol ha terri hy selyow?’

³ Ha denvyth y'n nev, nag y'n nor nag yn-dann an nor ny ylli igeri an rol, na mires orti hi.

⁴ Ha my a oelas yn feur rag na veu denvyth kevys gwiw dhe igeri ha redya an rol, na mires orti hi.

⁵ Hag onan a'n henavogyon a leveris dhymm, ‘Na wra oela. Otta, lew loeth Yuda, Gwreydhenn Davydh, re fethas dhe igeri an rol ha'y seyth sel.’

⁶ Ha my a welas yn mysk an tron ha'n peswar kreatur bew, hag yn mysk an henavogyon, y sevi Oen kepar ha pan ve ledhys, gans seyth korn ha seyth lagas, yw seyth Spyrys Duw dannvenys yn-rag yn oll an norvys.

⁷ Hag ev a dheuth ha kemmeres an rol yn-mes a'n dhorn dhyghow a neb o esedhys war an tron.

⁸ Ha pan gemmeras an rol, an peswar kreatur bew, ha'n peswar henavek warn ugens a goedhas dhe'n dor a-dherag an Oen, pubonan gans telynn ha fiolyow owrek leun a ynkys, yw pysadow an syns.

⁹ Ha kan nowydh a ganons i, ow leverel, ‘Gwiw osta dhe gemmeres an rol, hag igeri an selyow, rag ty a veu ledhys ha re dhasprensys tus dhe Dhuw gans dha woes yn-mes a bub loeth, ha yeth, ha pobel, ha kenedhel;

¹⁰ ha ty a's gwrug gwlaskor hag oferysi dh'agan Duw, hag i a wra reynya war an norvys.’

¹¹ Ha my a viras, ha klewes lev lies el a-dro dhe'n tron, ha'n kreaturs bew ha'n henavogyon; ha'n niver anedha o deg milweyth deg mil, ha milyow a vilyow,

¹² ow leverel, ughel aga lev, ‘Gwiw yw an Oen a veu ledhys dhe dhegemmeres galloes, ha rychys, ha furneth, ha nerth, hag enor, ha gordhyans, ha bennath.’

¹³ Ha pub kreatur y'n nev, ha war an nor, hag yn-dann an nor, hag y'n mor, ha pup-tra oll ynna i, a glewis vy ow leverel, ‘Dhe neb yw esedhys war an tron, ha dhe'n Oen, re bo bennath, hag enor, ha gordhyans ha galloes trank heb worfenn.’

¹⁴ Hag yn-medh an peswar kreatur bew, ‘Amen.’ Ha'n peswar henavek warn ugens a goedhas dhe'n dor ha gordhya.