Diskwedhyans 21 - An Bibel Kernewek 20234 (Kernewek Kemmyn)

¹ Ha my a welas nev nowydh ha nor nowydh: rag an kynsa nev ha'n kynsa nor re dremensa dhe-ves, ha nyns esa mor namoy.

² Ha my a welas an sita sans, Yerusalem nowydh, ow tiyskynna yn-mes a nev dhiworth Duw, parys kepar ha benyn bries afinys rag hy gour.

³ Ha my a glewas lev bras yn-mes a'n tron ow leverel, ‘Otta, yma tabernakel Duw gans mab-den, hag ev a drig gansa, hag i a vydh y bobel, ha Duw y honan a vydh gansa.

⁴ Hag ev a sygh pub dagrenn dhiworth aga dewlagas, ha ny vydh ankow namoy, na ny vydh keudh, nag oela, nag anken namoy, rag bos an kynsa taklow tremenys.’

⁵ Ha neb esa owth esedha war an tron a leveris, ‘Otta, nowydh a wrav pup-tra oll.’ Hag ev a leveris dhymm, ‘Skrif, rag len ha gwir yw an geryow ma.’

⁶ Hag ev a leveris dhymm, ‘Gwrys yw. Alfa hag Omega ov vy, an dalleth ha'n diwedh. My a re dhe neb a'n jeves syghes a fenten an dowr a vewnans heb kost.

⁷ Neb a feth a wra erita an taklow ma; ha my a vydh y Dhuw, hag ev a vydh ow mab.

⁸ Mes an ownogyon, ha'n dhiskryjygyon, ha'n re gasadow, ha denledhysi, ha'n re a wra fornikasyon, ha pystrioryon ha gordhyoryon idolys, ha pub gowleveryas a's teves aga rann y'n lynn a lesk gans tan ha loskven, hag yw an nessa mernans.’

An Yerusalem Nowydh

⁹ Hag onan a'n seyth el neb a's tevo an seyth fiol lenwys a'n seyth pla diwettha a dheuth dhymm ha kewsel orthiv ow leverel, ‘Deus, ha my a vynn diskwedhes dhis an venyn bries, gwreg an Oen.’

¹⁰ Hag ev a'm dug dhe-ves y'n spyrys dhe venydh bras hag ughel, ha diskwedhes dhymm an sita sans, Yerusalem, ow tiyskynna yn-mes a nev dhiworth Duw,

¹¹ ha gensi golewder Duw, ha'y golow kepar ha men a'n moyha drudh, kepar ha men yasper, mar lan avel gwrys.

¹² Ha gensi yth esa fos vras hag ughel, ha dewdhek yet, hag orth an yetys dewdhek el, ha henwyn skrifys warnedha, yw a'n dewdhek loeth a vebyon Ysrael.

¹³ Orth an howldrevel yma teyr yet, orth an kledh teyr yet, orth an dyghow teyr yet, hag orth an howlsedhes teyr yet.

¹⁴ Ha fos an sita a's tevo dewdhek sel, hag ynna henwyn dewdhek abostol an Oen.

¹⁵ Ha neb a gewsis genev a'n jevo korsenn owrek dhe vusura an sita, ha'y yetys, ha'y fos.

¹⁶ Ha'n sita a wrowedh pedrek ha'y hys yw kemmys ha'y les; hag ev a vusuras an sita gans an gorsenn, dewdhek mil erowhys. Hy hys ha'y les ha'y ughelder yw kehaval.

¹⁷ Hag ev a vusuras hy fos, peswar kevelin ha seyth ugens, musur mab-den, henn yw a'n el.

¹⁸ Ha'y fos o drehevys yn yasper: ha'n sita o owr glan, kepar ha gweder glan.

¹⁹ Selyow fos an sita o tekhes gans meyn drudh a bub eghenn. An kynsa sel o yasper, an nessa saffir; an tressa kalsedon, an peswora gwyrven,

²⁰ an pympes sardonyks, an hweghves sardius, an seythves krysolithus, an ethves beryl, an nawves topaz, an degves krysopras, an unnegves hyakinth, an dewdhegves amethyst.

²¹ Ha'n dewdhek yet o dewdhek perl, pub yet o gwrys dhiworth unn perl, ha plen an sita o owr glan, kepar ha pan ve gweder boll.

²² Ha tempel ny welis ynni, rag bos an Arloedh Duw Ollgalloesek ha'n Oen hy thempel.

²³ Ha dhe'n sita nyns esa edhomm a'n howl nag a'n loer dhe splanna ynni, rag splannder Duw a's golowi, ha'n Oen yw hy lugarn.

²⁴ Ha'n kenedhlow a wra kerdhes yn hy golow, ha myghternedh an norvys a wra dri aga gordhyans ha'ga enor a-bervedh ynni hi.

²⁵ Ha'y yetys ny vydh deges mann der an jydh, rag ny vydh nos ena.

²⁶ Hag i a wra dri gordhyans hag enor an kenedhlow ynni hi.

²⁷ Ha ny wra entra ynni travyth y'n bys a vo avlan, na neb a wra tra gasadow, po gowleverel, marnas seul yw skrifys yn lyver bewnans an Oen.