Diskwedhyans 19 - An Bibel Kernewek 20234 (Kernewek Kemmyn)

¹ Wosa an taklow ma, my a glewas kepar ha pan ve lev bras lies den yn nev ow leverel, ‘Alleluya; selwyans, ha gordhyans, ha galloes dh'agan Duw:

² rag gwir hag ewn yw y vreusow; rag ev re vreusis an hora vras a legris an nor gans hy fornikasyon, hag ev re dhiallas goes y wesyon warnedhi.’

³ Hag arta i a leveris, ‘Alleluya; ha'y mog a yskynn trank heb worfenn.’

⁴ Ha'n peswar henavek warn ugens ha'n peswar kreatur bew a goedhas ha gordhya Duw owth esedha war an tron, ow leverel, ‘Amen, Alleluya!’

Goel Demmedhyans an Oen

⁵ Ha lev a dheuth yn-mes a'n tron, ow leverel, ‘Gormelewgh agan Duw, oll y wesyon ha'n re a'n own, byghan ha bras.’

⁶ Ha my a glewas kepar ha pan ve lev routh veur, ha son lies dowr, ha lev taran veur ow leverel, ‘Alleluya; rag an Arloedh agan Duw, an Ollgalloesek, a reyn.

⁷ Gwren lowenhe ha heudhhe, ha ri gordhyans dhodho; rag dydh demmedhyans an Oen a dheuva, ha'y wreg re ombareusis.

⁸ Ha res veu dhedhi hi bos gwiskys yn sendal, splann ha pur’ – rag an sendal yw oberow gwiryon an syns.

⁹ Hag ev a leveris dhymm, ‘Skrif: Gwynn aga bys an re gelwys dhe woel demmedhyans an Oen.’ Hag ev a leveris dhymm, ‘An re ma yw gwir lavarow Duw.’

¹⁰ Ha my a goedhas orth y dreys rag y wordhya. Hag ev a leveris dhymm, ‘Na wra henna. My yw dha geskethwas, ha keskethwas dha vreder a's teves dustuni Yesu. Gwra gordhya Duw, rag dustuni Yesu yw an spyrys a brofoesans.’

An Marghek war an Margh Gwynn

¹¹ Ha my a welas nev igerys, hag otta, margh gwynn hag ev neb o esedhys warnodho o henwys Len ha Gwir, hag yn ewnder ev a vreus ha gwerrya.

¹² Ha'y dhewlagas o kepar ha tan ow flammya, ha war y benn yth esa lies diadem; ha hanow skrifys a'n jevo na wodhya denvyth marnas ev y honan.

¹³ Ha gwiskys o yn mantell troghys yn goes: ha gelwys yw y hanow, ‘Ger Duw.’

¹⁴ Ha'n luyow esa yn nev a'n siwyas war vergh gwynn, gwiskys yn sendal, gwynn ha glan.

¹⁵ Ha kledha lymm a yn-mes a'y anow, may hwasko an kenedhlow ganso, hag ev a wra aga rewlya gans gwelenn horn, hag ev a drett gwinwask konnar sorr Duw Ollgalloesek.

¹⁶ Ha war y vantell ha war y vordhos, hanow yw skrifys: Myghtern myghternedh, hag Arloedh arlydhi.

¹⁷ Ha my a welas unn el ow sevel y'n howl; hag ev a armas, ughel y lev, ow leverel dhe oll an ydhyn ow nija yn kres nev, ‘Dewgh, omguntellewgh war-barth dhe'n goen vras a Dhuw,

¹⁸ may tepprowgh kig myghternedh, ha kig pennhembrenkysi-luyow, ha kig tus nerthek, ha kig mergh ha'ga marghogyon, ha kig pub den ha rydh ha keth, ha byghan ha bras.’

¹⁹ Ha my a welas an best ha myghternedh an norvys ha'ga luyow kuntellys war-barth dhe werrya erbynn neb o esedhys war an margh hag erbynn y lu.

²⁰ Ha'n best a veu kemmerys, ha ganso an fals profoes a wrug sinys a-dheragdho, may toellas neb re dhegemmersa merk an best ha neb a wordhya y imaj. An dhew ma a veu tewlys, bew, yn lynn tan ow leski gans loskven.

²¹ Ha'n re erell a veu ledhys gans an kledha a dheuth dhiworth an ganow a neb esa owth esedha war an margh, an kledha a dheuth dhiworth y anow; hag oll an ydhyn a veu lenwys a'ga hig.