Dewteronomi 9 - An Bibel Kernewek 20234 (Kernewek Kemmyn)

¹ Klew, Ysrael: ty a dreus an Yordan hedhyw dhe vos a-bervedh dhe erita kenedhlow brassa ha kreffa agesos, sitys bras, kerys bys y'n ebron,

² pobel vras ha hir, mebyon an Anakim a aswonnydh, ha ty re'n klewas bos leverys, ‘Piw a yll sevel a-rag mebyon Anak?’

³ Godhvydh ytho hedhyw, yth yw an Arloedh dha Dhuw neb a dreus a-ragos avel tan ow tevorya. Ev a's distru hag ev a's uvelha a-ragos. Ty a gemmer aga eretons ha'ga distrui toeth da kepar dell gewsis dhis an Arloedh.

⁴ Na lavar y'th kolonn, pan wra an Arloedh dha Dhuw aga fesya a-ragos, ‘Yth yw drefenn ow ewnder y hwrug an Arloedh ow dri dhe erita an tir ma.’ Yth yw drefenn sherewynsi an kenedhlow ma y hwra an Arloedh aga fesya a-ragos.

⁵ Nyns yw drefenn dha ewnder, na drefenn ewnhynseth dha golonn, yth esos ow tos dhe erita aga thir; mes yth yw drefenn sherewynsi an kenedhlow ma y hwra an Arloedh dha Dhuw aga fesya a-ragos, rag may fastyo an ger a dos an Arloedh dhe'th tasow, dhe Abraham, dhe Ysak, ha dhe Yakob.

An Leugh Owrek

⁶ Godhvydh ytho nag yw drefenn dha ewnder y hwra an Arloedh dha Dhuw ri dhis an tir da ma dh'y erita, rag ty yw pobel kales dha gilbenn.

⁷ Porth kov, na ankov, fatell serrsys an Arloedh dha Dhuw y'n gwylvos. A-dhia'n jydh may teuth yn-mes a bow Ejyp bys may teuthewgh bys y'n tyller ma, hwi re beu ow rebellya erbynn an Arloedh.

⁸ Orth Horeb hwi a sorras an Arloedh, ha'n Arloedh a veu serrys lowr orthowgh, dh'agas distrui.

⁹ Pan yskynnis dhe'n menydh dhe dhegemmeres an leghennow a ven, leghennow an kevambos a wrug an Arloedh genowgh, my a wortas y'n menydh dewgens dydh ha dewgens nos; ny dhybris bara nag eva dowr.

¹⁰ An Arloedh a ros dhymm an dhiw leghenn a ven skrifys dre vys Duw, ha warnedha oll an geryow a gewsis an Arloedh genowgh y'n menydh yn-mes a gres an tan yn dydh an kuntellyans.

¹¹ Dhe benn dew-ugens dydh ha dew-ugens nos an Arloedh a ros dhymm an dhiw leghenn a ven, leghennow an kevambos.

¹² Ena an Arloedh a leveris dhymm, ‘Sav, diyskynn uskis a'n tyller ma; rag dha bobel hag a dhresys yn-mes a Ejyp, re omdhefolas; i re dreylyas toeth da dhiworth an fordh a worhemmynnis dhedha; i re wrug ragdha aga honan imaj teudh.’

¹³ An Arloedh a gewsis dhymm keffrys, ow leverel, ‘My re welas an bobel ma, hag otta, pobel kales hy hilbenn yw.

¹⁴ Gas vy ow honan, ma's distruiv ha defendya dhe-ves aga hanow a-dhann an ebron; ha my a'th wra kenedhel vrassa ha kreffa agesso.’

¹⁵ Ytho my a dreylyas ha diyskynna dhiworth an menydh, ha'n menydh ow tewi gans tan, ha diw leghenn an kevambos y'm diwleuv.

¹⁶ My a viras, hag otta, hwi re wrussa pegha erbynn an Arloedh agas Duw, ha gul ragowgh leugh teudh; y hwrussewgh treylya toeth da dhiworth an fordh a wrug an Arloedh gorhemmynna dhywgh.

¹⁷ Ena my a gavas dalghenn y'n dhiw leghenn, ha'ga thewlel mes a'm diwleuv, ha'ga therri a-wel dhywgh.

¹⁸ Ena my a goedhas dhe'n dor a-rag an Arloedh avel kyns, dewgens dydh ha dewgens nos; ny dhybris bara nag eva dowr, rag oll agas pegh a beghsowgh, ow kul drog a-wel an Arloedh, dh'y brovokya dhe sorr.

¹⁹ Rag my a borthas own a'n sorr ha'n gonnar may fernewis an Arloedh gansa er agas pynn, dh'agas distrui. Mes an Arloedh a woslowas orthiv y'n eur na ynwedh.

²⁰ Ha'n Arloedh a sorras gans Aron lowr dh'y dhistrui, mes my a bysis rag Aron ynwedh y'n termyn na.

²¹ Ena my a gemmeras agas peghes a wrussowgh, an leugh, ha'y leski y'n tan, orth y vrewi, orth y velyas yn teg bys may feu melys dhe dhoust; ha my a dewlis y dhoust y'n gover esa ow tiyskynna dhiworth an menydh.

²² Orth Tabera ynwedh hag orth Massa hag orth Kibroth-hattaava hwi a brovokyas an Arloedh dhe sorr.

²³ Ha pan y'gas dannvonas an Arloedh dhiworth Kadesh-barnea, ow leverel, ‘Yskynnewgh hag eritewgh an tir a res dhywgh’, hwi a rebellyas erbynn gorhemmynn an Arloedh agas Duw, ha ny gryssowgh dhodho na goslowes orth y lev.

²⁴ Hwi re beu ow rebellya erbynn an Arloedh a-dhia'n kynsa dydh ma'gas aswonnis.

²⁵ Ytho my a goedhas dhe'n dor a-rag an Arloedh dewgens dydh ha dewgens nos, ow krowedha ena a-hys, rag an Arloedh a lavarsa ev dhe vynnes agas distrui.

²⁶ Ena my a bysis war an Arloedh ha leverel, ‘Arloedh Duw, na gowldhistru dha bobel ha'th eretons a dhasprensys y'th veuredh, neb a dhresys yn-mes a Ejyp dre leuv grev.

²⁷ Porth kov a'th servysi Abraham, Ysak, ha Yakob; na vir orth gorthter an bobel ma, nag orth hy hammweyth, nag orth hy fegh,

²⁸ ma na lavarro tus an tir ma'gan dresys dhe-ves dhiworto, “Drefenn na allas an Arloedh aga dri dhe'n tir a ambosas dhedha, ha drefenn ev dh'aga hasa, ev re's dros yn-mes dh'aga ladha y'n gwylvos.”

²⁹ Mes i yw dha bobel ha'th eretons a dhresys yn-mes gans dha nerth bras ha'th vregh ystynnys.’