Dewteronomi 32 - An Bibel Kernewek 20234 (Kernewek Kemmyn)

Kan Moyses

¹ Goslow nev, ha my a gews; klew, norvys, geryow ow ganow.

² Ow dyskans a dhropp avel an glaw, ha'm lavar a dhever avel gluth, avel kowasow war aswels, hag avel glawas war losow.

³ Rag my a dhiskler hanow an Arloedh; askrifewgh meuredh dh'agan Duw.

⁴ An Garrek – perfydh yw y ober, rag oll y fordhow yw ewn; Duw a lenduri, heb kammhynseth, gwiryon ha kompes yw ev.

⁵ I re'n dyghtyas yn fals, nyns yns i y vebyon drefenn aga namm; yth yns i henedh gorth ha kamm.

⁶ A attylowgh an Arloedh yndella, pobel goeg ha diboell? A nyns yw ev dha Das, dha Wrier, neb a'th formyas, ha neb a'th fastyas?

⁷ Porth kov a'n dydhyow koth prederewgh an blydhynyow a lies henedh: govynn orth dha das hag ev a'n deriv dhis, orth dha henavogyon hag i a'n lever dhis.

⁸ Pan ros an Ughella aga eretons dhe'n kenedhlow, pan rannas mebyon den, ev a settyas oryon poblow war-lergh niver mebyon Ysrael.

⁹ Rag rann an Arloedh yw y bobel; Yakob yw kevrenn y eretons.

¹⁰ Ev a'n kavas yn tir ynyal, hag yn gwylvos a dhifeythtir gwynsek, orth y gyrghynna, y gara, y witha avel bew y lagas.

¹¹ Avel er hag a dhifun y neyth, ha bargesi a-ugh y ydhnigow, yndella ev a lesas y dhiwaskell, ha'ga hachya, ha'ga doen war bluvennow y eskelli.

¹² An Arloedh y honan a'n hembronka; nyns esa ganso duw estren.

¹³ Ev a wrug dhodho marghogeth war dylleryow ughel an tir, hag ev a dhybris askorr an gwel; ev a wrug dhodho sugna mel yn-mes a'n garrek, hag oyl a ven flynt;

¹⁴ leth kowlys a vughes ha leth a dheves, gans blonek eyn, ha hordhes megys yn Bashan, ha gever, gans an gwella gwaneth, hag a woes grappys ty a evas gwin ewynek.

¹⁵ Yakob a dhybris hag a veu gwalghys, Yeshurun a dheuth ha bos tew hag a botyas; ty a dheuth ha bos tew ha berrik, ha bos gorth; ev a forsakyas Duw neb a'n gwrug, ha despitya Karrek y selwyans.

¹⁶ I a'n gwrug avius dre dhuwow estren; dre daklow kasadow i a'n sorras.

¹⁷ I a sakrifias dhe jevanow a-der dhe Dhuw, duwow na aswonnsons, dhe dhuwow nowydh devedhys degynsow, na wodhva aga thasow travyth anedha.

¹⁸ Ty a dhispresyas an Garrek a'th tineythis, hag ankevi Duw neb a'th tros dhe enesigeth.

¹⁹ Mes an Arloedh a welas ha'ga skonya, serrys gans y vebyon ha'y vyrghes.

²⁰ Ev a leveris, My a gudh ow fas dhiworta, ha my a wel pandr'a vydh aga diwedh; rag yth yns i henedh gorth, mebyon heb lelder ynna.

²¹ I a'm gwrug avius dre neppyth nag yw duw, i a'm sorras gans aga idolys koeg; rakhenna my a's gwra avius dre bobel dhistyr, my a wra aga serri dre genedhel gokki.

²² Rag tan re dhewis dre'm sorr ha leski a wra bys yn downderyow ifarn; ev a dheber an dor ha'y askorr, hag enowi gans tan selyow an menydhyow.

²³ My a worr bern a dhrogow warnedha; oll ow sethow a spenav warnedha.

²⁴ I a vydh gwannhes gans divoetter, ha devorys gans plag ha kleves hwerow; my a dhannvon ynna dyns bestes, gans venim serf ow kramya yn doust.

²⁵ A-ves, an kledha a wra dhe dus bos anvap, hag a-ji, yma euth rag gour yowynk ha gwyrghes, an flogh ow tena, gans an gour a vlew loes.

²⁶ My a leveris: My a's defend dhe-ves; my a dhile aga hovadh dhiworth densys;

²⁷ na ve my dhe berthi own a sorr an eskar, ma na wrella y envi kammgonvedhes, ma na lavarrens, ‘Agan leuv yw ughel; ny veu an Arloedh neb a wrug oll hemma.’

²⁸ Rag i yw kenedhel na amont kusul dhedha, ha nyns eus konvedhes ynna.

²⁹ Unnweyth a pens fur ha konvedhes hemma, ha dissernya aga fin!

³⁰ Fatell allsa unn den chasya mil, po dew fesya deg mil, mar ny's gwerthas aga Harrek, ha'n Arloedh a's daskorras.

³¹ Rag nyns yw aga harrek i haval dh'agan Karrek ni, dell yll agan eskerens aga honan breusi.

³² Aga gwinbrenn yw dhiworth gwinbrenn Sodom, ha dhiworth gwinlannow Gomorra. Aga grappys yw grappys gwenon, yma dhedha bagasow a rappys hwerow.

³³ Aga gwin yw venim serf, ha venim nadres fell.

³⁴ A nyns yw hemma gwithys genev, selys y'm gwithvaow?

³⁵ Dial yw dhymm, hag attal, yn termyn may hwra aga throes trebuchya; rag ogas yw dydh aga therroes, ha'ga thenkys a fisten dhedha.

³⁶ Rag an Arloedh a vreus y bobel, ha kemmeres pita a'y servysi, pan wel aga nerth dhe vos gyllys, ha nag eus nagonan gesys, keth na rydh.

³⁷ Ena y lever, Ple'ma aga duwow, an garrek may hwilsons skovva ynni,

³⁸ neb a dhybris blonek aga sakrifisow, hag eva gwin aga offrynnow diwes? Sevens dh'agas gweres, ha bos skovva ragowgh.

³⁹ Gwelewgh lemmyn, my, my yw ev, ha nyns eus duw marnas vy. My a ladh, ha my a vewha; my a vrew ha my a yaghha, ha nyns eus nagonan a yll delivra dhiworth ow leuv.

⁴⁰ Rag my a dhrehav ow leuv dhe nev, ha leverel: Dell vewav bynitha,

⁴¹ pan lymmav lughes ow kledha, ha'm leuv a sett dalghenn ynno yn breus, my a dal dial war ow eskerens, hag attyli an re a'm kas.

⁴² My a wra dhe'm sethow bos medhow gans goes, ha'm kledha a dheber kig – gans goes an re ledhys ha'n gethyon, dhiworth pennow ledyoryon an eskar.

⁴³ Germewgh yn lowen, kenedhlow, gans y bobel, rag ev a gemmer dial war woes y servysi, ha tewlel dial war y eskerens, ha dasprena tir y bobel.

⁴⁴ Moyses a dheuth ha kewsel oll geryow an gan ma yn diwskovarn an bobel, ev ha Yoshua mab Nun.

⁴⁵ Pan gowlwruk Moyses kewsel oll an geryow ma dhe oll Ysrael,

⁴⁶ ev a leveris dhedha, ‘Settyewgh agas kolonn war oll an geryow esov orth aga desta dhywgh hedhyw, a wredh aga gorhemmynna dh'agas mebyon, ow kwaytyas gul oll geryow an lagha ma.

⁴⁷ Rag nyns yw hemma tra drufel ragowgh, mes agas bewnans yw; ha der an dra ma hwi a hirha agas dydhyow war an tir mayth esowgh ow treusi an Yordan di dh'y erita.’

Mernans Moyses Darleverys

⁴⁸ Ha'n Arloedh a gewsis dhe Moyses y'n keth jydh na, ow leverel,

⁴⁹ ‘Yskynn dhe venydh an Abarim ma, dhe venydh Nebo usi yn pow Moab, a-dal Yeriko, ha gwel pow Kanan, a rov dhe vebyon Ysrael yn perghennogeth,

⁵⁰ ha marw war an menydh mayth esos owth yskynna di, ha bydh kuntellys dhe'th pobel, kepar dell verwis Aron dha vroder war venydh Hor, hag y feu kuntellys dh'y bobel;

⁵¹ drefenn agas bos dislel dhymm yn mysk mebyon Ysrael orth dowrow Meriba-kadesh yn gwylvos Sin; drefenn na wrussowgh ow sanshe yn mysk mebyon Ysrael.

⁵² Rag ty a wel an tir a-ragos, mes ny edh dhe'n tir a rov dhe vebyon Ysrael.’