Dewteronomi 2 - An Bibel Kernewek 20234 (Kernewek Kemmyn)

Edom

¹ Ni a dreylyas hag omdenna yn-mes war-tu ha'n gwylvos war an fordh dhe'n Mor Rudh, dell leveris an Arloedh dhymm, ha mos a-dro menydh Seir lies dydh.

² Ena an Arloedh a gewsis dhymm, ow leverel,

³ ‘Hwi res eth a-dro an menydh ma termyn lowr; treylyewgh dhe'n gledhbarth.

⁴ Gorhemmynn dhe'n bobel, ow leverel: Yth esowgh ow treusi or agas breder mebyon Esaw usi trigys yn Seir. I a berth own ahanowgh, rakhenna omwithewgh fest.

⁵ Na entrewgh yn kas gansa; rag ny rov dhywgh travyth a'ga thiredh, hwath lowr rag trettya godhen troes, rag my re ros menydh Seir dhe Esaw avel eretons.

⁶ Hwi a bren boes anedha a arghans ha dybri, hag ynwedh hwi a bren dowr anedha a arghans hag eva.

⁷ Rag an Arloedh dha Dhuw re'th vennigas yn pub ober a'th leuv. Ev a woer dha gerdh dre'n gwylvos bras ma. An dew-ugens blydhen ma an Arloedh dha Dhuw re beu genes, ha ny fyllsys a dravyth.’

Moab

⁸ Ytho ni a dremenas dres agan breder mebyon Esaw usi trigys yn Seir, dhiworth fordh an Araba, dhiworth Elath hag Esyon-geber, ha treylya ha tremena dre fordh gwylvos Moab.

⁹ Ena an Arloedh a leveris dhymm, ‘Na omladh erbynn Moab ha na enter yn kas gansa, rag ny rov dhis travyth a'ga thiredh avel eretons, rag my re ros Ar dhe vebyon Lot avel eretons.’

¹⁰ (An Emim esa trigys ynni kyns, pobel vras, lies ha hir avel an Anakim.

¹¹ Ynwedh i o tybys dhe vos Refaim, kepar ha'n Anakim, mes an Moabysi a's henwis Emim.

¹² Hag yn Seir an Horysi esa trigys kyns, ha mebyon Esaw a's fesyas, hag i a's distruis a-dheragdha ha triga yn aga le, kepar dell wrug Ysrael dhe dir y eretons a ros an Arloedh dhedha.)

¹³ ‘Lemmyn sevewgh ha treusewgh gover Zered.’ Ytho ni a dreusis gover Zered.

¹⁴ Termyn agan kerdh dhiworth Kadesh-barnea bys pan dreussyn gover Zered o etek blydhen warn ugens; y'n kettermyn, oll henedh gwer an vresel re vawrsa yn-mes a'n kamp, dell dos an Arloedh dhedha.

¹⁵ Ynwedh leuv an Arloedh o er aga fynn, dh'aga leun dhistrui dhiworth an kamp, bys pan ellons dhe goll.

Ammon

¹⁶ Y hwarva, pan worfennas merwel oll gwer an vresel yn-mes a'n bobel,

¹⁷ an Arloedh a gewsis dhymm, ow leverel,

¹⁸ ‘Ty a dreus hedhyw or Moab orth Ar.

¹⁹ Pan dheudh nes dhe vebyon Ammon, na omladh er aga fynn, ha na enter yn kas gansa, rag ny rov travyth a diredh an Ammonysi dhis avel eretons, rag my a'n ros dhe vebyon Lot avel eretons.’

²⁰ (Henna ynwedh o tybys dhe vos tiredh Refaim, neb esa trigys ynni kyns; mes an Ammonysi a's henwis Zamzummim.

²¹ Pobel vras ens, lies ha hir avel an Anakim. An Arloedh a's distruis a-ragdha, hag i a's fesyas ha triga ena yn aga le;

²² dell wrussa rag mebyon Esaw, trigys yn Seir, pan dhistruis an Horysi a-ragdha, hag i a's fesyas ha triga yn aga le bys y'n jydh hedhyw.

²³ Ha'n Avvim, trigys yn godrevow bys yn Gaza, an Kaftorim, neb a dheuth dhiworth Kaftor, a's distruis ha triga yn aga le.)

²⁴ ‘Sevewgh, kewgh yn-kerdh, ha treusewgh nans Arnon: mir, my re ros y'th leuv Sihon an Amoryas myghtern Heshbon, ha'y bow. Dalleth y gemmeres yn perghennogeth, hag entra yn kas ganso.

²⁵ Hedhyw my a dhalleth settya agha ahanas hag own ahanas war an kenedhlow yn-dann an nevow oll, neb a glew derivas ahanas, hag i a gren ha bos yn gloesow a'th wovis.’

Fethans Myghtern Sihon an Amoryas

²⁶ My a dhannvonas kannasow dhiworth gwylvos Kedemoth dhe Sihon myghtern Heshbon, gans ambosow kres, ow leverel,

²⁷ ‘Gas vy dhe dreusi dha dir. Y'n fordh-veur yth av, ny dreylyav dhe'n dyghow na dhe'n kledh.

²⁸ Ty a werth dhymm boes a arghans may typpriv, ha ri dowr dhymm a arghans mayth yffiv, unnweyth gas vy dhe dreusi a-droes,

²⁹ kepar dell wrug dhymm mebyon Esaw usi trigys yn Seir, ha'n Moabysi usi trigys yn Ar, erna dreussiv an Yordan war-tu ha'n tir neb a re dhyn an Arloedh agan Duw.’

³⁰ Mes ny vynnas Sihon myghtern Heshbon agan gasa dhe dreusi, drefenn an Arloedh dha Dhuw dhe avleythi y spyrys ha kaleshe y golonn, rag ma'n rolla y'th leuv, avel an jydh ma.

³¹ Ena an Arloedh a leveris dhymm, ‘Mir, my re dhallathas ri a-ragos Sihon ha'y dir. Dalleth, kemmer yn perghennogeth, rag may hwrylli erita y dir.’

³² Pan dheuth Sihon dhe-ves dh'agan metya yn batel, ev hag oll y bobel, dhe Yahas,

³³ an Arloedh agan Duw a'n ros a-ragon, hag y'n gwesksyn, ha'y vebyon, hag oll y bobel.

³⁴ Ha ni a gemmeras oll y drevow y'n termyn na, ha sakra pub tre dhe dhistruyans, gwer, benynes, ha fleghes; ny essyn denvyth dhe skapya.

³⁵ Saw unnsel an chatel y pyllsyn ragon agan honan, ha preydh an trevow a gemmersyn.

³⁶ Dhiworth Aroer usi ryb amal nans Arnon, ha'n dre usi y'n nans, bys yn Gilead, nyns esa tre re grev ragon. An Arloedh agan Duw a ros pup-tra a-ragon.

³⁷ Mes ny dheuthys nes dhe bow an Ammonysi, oll an rannow a nans Yabbok, na dhe drevow an menydh, na dhe le vytholl a dhifennas an Arloedh agan Duw.