Dewteronomi 10 - An Bibel Kernewek 20234 (Kernewek Kemmyn)

An Nessa Diw Leghenn

¹ Y'n termyn na an Arloedh a leveris dhymm, ‘Fols dhis diw leghenn a ven haval dhe'n kynsa hag yskynn dhymm war-tu ha'n menydh, ha gwra dhis argh a brenn.

² Ha my a skrif war an leghennow an geryow esa war an kynsa leghennow a derrsys. Ena ty a's gorr y'n argh.’

³ Ytho my a wrug argh prenn shittim ha folsa diw leghenn a ven haval dhe'n kynsa hag yth yskynnis war-tu ha'n menydh ha'n dhiw leghenn y'm dorn.

⁴ Hag ev a skrifas war an leghennow avel an kynsa skrif, an deg ger a gewsis an Arloedh dhywgh war an menydh yn-mes a gres an tan yn dydh an kuntellyans; ha'n Arloedh a's ros dhymm.

⁵ Ena my a dreylyas ha diyskynna dhiworth an menydh ha gorra an leghennow y'n argh a wrug vy, hag yth esons ena kepar dell worhemmynnis an Arloedh dhymm.

⁶ (Mebyon Ysrael a omdennas dhiworth puthow Bene-yaakan dhe Mosera. Ena Aron a verwis hag y feu ynkleudhys ena, hag Eleazar y vab a servyas avel oferyas yn y le.

⁷ Alena i eth yn-kerdh war-tu ha'n Gudgod, ha dhiworth an Gudgod war-tu ha Yotbatha, tir goverow dowr.

⁸ Y'n termyn na an Arloedh a dhibarthas loeth Levi dhe dhegi argh kevambos an Arloedh, dhe sevel a-rag an Arloedh dh'y servya ha dhe venniga yn y hanow bys y'n jydh hedhyw.

⁹ Rakhenna ny veu dhe Levi rann nag eretons gans y vreder; an Arloedh yw y eretons kepar dell gewsis an Arloedh dha Dhuw dhodho.)

¹⁰ My a sevis war an menydh avel an kynsa dew-ugens dydh ha dew-ugens nos, ha'n Arloedh a woslowas orthiv an weyth na ynwedh, ha ny vynnas an Arloedh dha dhistrui.

¹¹ Ena an Arloedh a leveris dhymm, ‘Sav ha ke y'th kerdh a-rag an bobel, rag mayth ellons hag erita an tir a des dh'aga thasow y ri dhedha.’

Own an Arloedh

¹² Ha lemmyn Ysrael, pandr'a wovynn an Arloedh orthis marnas perthi own a'n Arloedh dha Dhuw, kerdhes yn oll y fordhow, ha'y gara, ha servya an Arloedh dha Dhuw gans oll dha golonn ha gans oll dha enev,

¹³ gwitha gorhemmynnow an Arloedh, ha'y ordenansow esov ow korhemmynna dhis hedhyw rag may fo yn ta dhis?

¹⁴ Otta, an nev ha nev an nevow yw dhe'n Arloedh dha Dhuw, an norvys ha pup-tra eus ynno.

¹⁵ Saw unnsel war dha dasow an Arloedh a settyas y gerensa, dh'aga hara, hag ev a dhewisas aga has war aga lergh, hwi a-ugh oll an poblow, kepar hag y'n jydh hedhyw.

¹⁶ Trodreghewgh ytho kudhgenn agas kolonn, na vedhewgh kales agas kilbenn namoy.

¹⁷ Rag an Arloedh agas Duw yw Duw a'n duwow hag Arloedh a'n arlydhi, an Duw bras ha krev hag euthyk, nag eus dhodho faverans, ha na gemmer falswober;

¹⁸ ow kul gwirvreus dhe'n omdhivas ha'n wedhwes, hag ow kara an alyon, ow ri dhodho bara ha dillas.

¹⁹ Kerewgh an alyon; rag hwi a veu alyons yn pow Ejyp.

²⁰ Porth own a'n Arloedh dha Dhuw ha gwra y servya. Glen orto, ha to ren y hanow.

²¹ Ev yw dha wormel, hag ev yw dha Dhuw a wrug ragos an taklow bras hag euthyk ma a welas dha dhewlagas.

²² Dha dasow eth yn-nans dhe Ejyp, deg ha tri-ugens enev; ha lemmyn an Arloedh dha Dhuw a'th settyas avel an ster a nev yn palster.