Dewteronomi 1 - An Bibel Kernewek 20234 (Kernewek Kemmyn)

Kynsa Areth Moyses: Daswel a'n Istori

¹ An re ma yw an geryow a gewsis Moyses dhe oll Ysrael dres an Yordan y'n gwylvos, y'n Araba, a-dal Suf, yntra Paran ha Tofel, Laban, Haserot ha Di-zahab.

² Yma kerdh a unnek dydh dhiworth Horeb dre fordh menydh Seir bys yn Kadesh-barnea.

³ Y'n dew-ugensves blydhen, y'n unnegves mis, yn kynsa dydh an mis, Moyses a gewsis orth mebyon Ysrael herwydh pup-tra a wrug an Arloedh y worhemmynna dhedha,

⁴ wosa ev dhe weskel Sihon myghtern an Amorysi trigys yn Heshbon, hag Og myghtern Bashan trigys yn Ashtaroth, yn Edrei.

⁵ Dres an Yordan yn tiredh Moab, Moyses a omgemmeras displegya an lagha ma, ow leverel,

⁶ An Arloedh agan Duw a gewsis dhyn yn Horeb, ow leverel, ‘Hwi re beu trigys orth an menydh ma termyn lowr.

⁷ Treylyewgh ha mos yn-kerdh ha dewgh dhe venydh an Amorysi, dhe oll aga hentrevogyon y'n Araba, y'n menydh hag y'n Shefela, hag y'n Negeb hag y'n arvor, tir an Kananysi, ha Lebanon, bys an avon veur, an avon Ewfrates.

⁸ Mir, my re settyas an tir a-ragowgh. Dewgh hag erita an tir a dos an Arloedh dh'agas tasow, dhe Abraham, dhe Ysak, ha dhe Yakob, dh'y ri dhedha ha dh'aga has war aga lergh.’

⁹ My a gewsis dhywgh y'n termyn na ow leverel, ‘Ny allav agas doen ow honan;

¹⁰ an Arloedh agas Duw re'gas kressyas, hag ottahwi hedhyw avel ster an nev yn palster.

¹¹ Re'gas kressyo an Arloedh, Duw a'gas tasow, milblek moy es dell owgh, ha'gas benniga kepar dell gewsis dhywgh.

¹² Fatell dhegav ow honan poes ha begh agas kedrynnow?

¹³ Dewisewgh dhywgh gwer fur eus dhedha konvedhes, aswonnys dh'agas loethow, hag y's settyav avel agas pennow.’

¹⁴ Ha hwi a'm gorthybis ow leverel, ‘An tra a gewssys jy dhe wul yw da.’

¹⁵ My a gemmeras pennow agas loethow, gwer fur hag aswonnys, ha'ga settya avel pennow warnowgh, kaptenyon a vilyow, kaptenyon a gansow, kaptenyon a hanter-kansow, kaptenyon a dhegow, ha soedhogyon rag agas loethow.

¹⁶ My a worhemmynnis agas breusysi y'n termyn na, ow leverel, ‘Klewewgh an kenyow ynter agas breder, ha breusewgh yn ewnder yntra gour ha'y vroder ha'n alyon trigys ganso.

¹⁷ Na blegyewgh dhe fas neb den yn breus, mes klewewgh kekeffrys byghan ha bras. Na berthewgh own a vejeth denvyth, drefenn an vreus dhe vos dhe Dhuw. An ken hag yw re gales dhywgh, drewgh e dhymm ha my a'n klew.’

¹⁸ My a worhemmynnis dhywgh y'n tor' na oll an taklow a goedh dhywgh aga gul.

An Dewdhek Aspier

¹⁹ Ena ni a omdennas dhiworth Horeb ha mos der oll an difeythtir bras hag euthyk a welsowgh, war an fordh dhe venydh an Amorysi, kepar dell worhemmynnis an Arloedh agan Duw dhyn; ha ni a dheuth bys yn Kadesh-barnea.

²⁰ Ena my a leveris dhywgh, ‘Devedhys owgh bys yn menydh an Amorysi, usi an Arloedh agan Duw ow ri dhyn.

²¹ Mir, an Arloedh dha Dhuw re settyas a-ragos an tir. Yskynn, ha'y gemmeres yn perghennogeth, kepar dell gewsis dhis an Arloedh Duw dha dasow. Na borth own, ha na vydh digolonnek.’

²² Ena hwi oll a dheuth nes dhymm ha leverel, ‘Dannvenyn gwer a-ragon hag yth aspions an tir ragon, ha dri dhe-dre dhyn ger a-dro dhe'n fordh a yskynnyn ynni, ha'n trevow a dheun bys dhedha.’

²³ Da o genev an ger, ytho my a gemmeras ahanowgh dewdhek gwer, onan rag pub loeth.

²⁴ Hag i a dreylyas hag yskynna war-tu ha'n menydhyow bys yn nans Eshkol ha'y aspia.

²⁵ Hag i a gemmeras yn aga leuv neppyth a frut an tir, hag y'n drosons yn-nans dhyn ha dri dhe-dre dhyn ger ha leverel, ‘Da yw an tir usi an Arloedh agan Duw ow ri dhyn.’

²⁶ Mes ny vynnewgh yskynna hag yth ewgh hwi gorth dhe worhemmynn an Arloedh agas Duw,

²⁷ ha hwi a grodhvolas yn agas tyldow ha leverel, ‘Drefenn an Arloedh dh'agan kasa, ev re'gan dros yn-mes a bow Ejyp dh'agan ri yn leuv an Amorysi, dh'agan diswul.

²⁸ Ple'th en ni yn-bann? Agan breder re wrug dh'agan kolonn teudhi, ow leverel, “Pobel vrassa ha hirra ageson yns; aga sitys yw bras ha kerys bys y'n ebron, hag ynwedh ni a welas mebyon an Anakim ena.” ’

²⁹ Ha my a leveris dhywgh, ‘Na berthewgh euth nag own anedha.

³⁰ An Arloedh dha Dhuw, usi ow kerdhes a-ragowgh, a omladh ragowgh, kepar dell wrug ragowgh yn Ejyp a-wel dhywgh,

³¹ hag y'n gwylvos, le may hwelsys fatell wrug an Arloedh dha Dhuw dha dhoen, dell dheg den y vab, dres oll an fordh a gerdhsowgh bys pan dheuthewgh y'n tyller ma.

³² Yn despit dhe hemma nyns esowgh ow krysi y'n Arloedh dha Dhuw,

³³ ow kerdhes a-ragowgh y'n fordh dhe hwilas le rag agas kampya, yn tan nosweyth dhe dhiskwedhes dhywgh an fordh a gerdhowgh ynni, hag yn kommol dydhweyth.’

³⁴ Pan glewas an Arloedh son agas geryow, ev a wrug fernewi ha ti, ow leverel,

³⁵ ‘Nagonan a'n dus ma a'n drog henedh ma ny wel an tir da, a des dhe ri dh'agas tasow,

³⁶ marnas Kaleb mab Yefunne; ev a'n gwel, ha dhodho y rov an tir a drettyas ynno, ha dh'y vebyon, drefenn ev dhe holya an Arloedh oll yn tien.’

³⁷ Ynwedh an Arloedh a sorras orthiv a'gas govis, ow leverel, ‘Ty ynwedh, ny dheudh ena.

³⁸ Yoshua mab Nun usi ow sevel a-ragos, ev a dheu ena. Kennerth e, rag ev a wra Ysrael dh'y erita.

³⁹ Agas fleghigyow neb a leversowgh i dhe vos preydh, ha'gas mebyon na aswonnons hedhyw naneyl da na drog, i a dheu ena. My a'n re dhedha, hag i a'n erit.

⁴⁰ Mes hwi, treylyewgh war-dhelergh, hag omdennewgh yn-mes war-tu ha'n gwylvos yn fordh an Mor Rudh.’

⁴¹ Ha hwi a worthybis ha leverel dhymm, ‘Re beghsyn erbynn an Arloedh; ni a yskynn hag omladh war-lergh pup-tra a worhemmynnis an Arloedh aga Duw.’ Ena peub a omwrogysas gans y arvow bel, ha tybi y fedha es mos yn-bann dhe'n menydh.

⁴² Mes an Arloedh a leveris dhymm, ‘Lavar dhedha, Na yskynnewgh nag omladh rag nyns esov yn agas mysk, ma na vydhowgh fethys a-rag agas eskerens.’

⁴³ Ytho my a gewsis dhywgh, mes ny vynnsowgh klewes. Hwi a rebellyas erbynn gorhemmynn an Arloedh, ha hwi a lavasas mos yn-bann dhe'n menydh.

⁴⁴ Ha'n Amorysi, esa trigys y'n menydh na, a dheuth yn-mes dh'agas metya ha'gas chasya kepar ha hes gwenen ha'gas terri dhe demmyn yn Seir bys yn Horma.

⁴⁵ Ha hwi a dhehwelis hag oela a-rag an Arloedh, mes an Arloedh ny woslowas orth agas lev na'gas klewes.

⁴⁶ Ytho yth esewgh trigys yn Kadesh lies dydh, oll an dydhyow a drigsowgh ena.