Daniel 8 - An Bibel Kernewek 20234 (Kernewek Kemmyn)

Gwelesigeth a Hordh ha Gaver

¹ Y'n tressa blydhen a reyn myghtern Belshassar, yth omdhiskwedhas gwelesigeth dhymm, Daniel, wosa an kynsa hag a omdhiskwedhas dhymm.

² Ha my a welas y'n welesigeth, ha my ow mires, yth esen yn Shushan an bennsita, hag usi yn rannvro Elam. Ha my a welas y'n welesigeth, ow bos ryb an dowrgleudh Ulay.

³ My a dhrehevis ow dewlagas ha mires; hag ottena unn hordh ow sevel war lann an dowrgleudh. Dew gorn a'n jevo, hir aga dew, mes an eyl o hirra ages y gila, ha'n korn hirra a dheuth yn-bann diwettha.

⁴ My a welas an hordh ow kornya war-tu ha'n howlsedhes, an gledhbarth, ha'n dhyghowbarth; ny ylli best vyth sevel er y bynn, ha nyns esa denvyth a ylli delivra a'y dhorn; ev a wre dell vynna hag omvoghhe.

⁵ Ha my ow prederi anodho, otta, y teuth bogh yowynk a'n howlsedhes a-dreus dhe enep an norvys oll, heb tochya an dor; ha'n bogh a'n jevo korn hewel ynter y dhewlagas.

⁶ Ev a dheuth bys y'n hordh dewgornek, re welsen war lann an dowrgleudh, hag a boenyas er y bynn gans konnar y nerth.

⁷ My a'n gwelas ow nesa dhe'n hordh, hag ev a sorras orto, ha gweskel an hordh ha terri y dhewgorn. Ha'n hordh ny'n jevo nerth dhe sevel er y bynn; yndella ev a'n tewlis dhe'n dor ha stankya warnodho; nyns esa denvyth a ylli delivra an hordh a'y nerth.

⁸ Ena an bogh a omvoghhas dres eghenn; mes kettell dheuth ha bos krev, an korn bras a veu terrys, hag yn y le y sevis peswar korn hewel, war-tu ha'n peswar gwyns a nev.

⁹ Ha dhiworth onan anedha y teuth yn-mes korn byghan, a devis dres eghenn war-tu ha'n dhyghowbarth, war-tu ha'n howldrehevel, ha war-tu ha'n tir splann.

¹⁰ Bys yn lu an nev y tevis, hag a wrug dhe dharn an lu, ha dhe dharn an ster koedha dhe'n dor, hag ev a stankyas warnedha.

¹¹ Ev a vostyas erbynn pryns an lu, ha dhiworto y feu kemmerys dhe-ves an offrynn pub-dydhyek, hag y feu domhwelys y dyller sans.

¹² Ha dhe'n lu y feu res an charj war an offrynn pub-dydhyek, drefenn an treuspass; ev a dewlis an wiryonedh dhe'n dor. Ev a oberis, hag a sewenis.

¹³ Ha my a glewas unn sans ow kewsel; ha sans arall a leveris dhodho ev neb a gewsi, ‘Dre bes termyn y fydh an welesigeth a-dro dhe'n offrynn pub-dydhyek, ha'n treuspass a dhifeythyans, hag omrians an tyller sans ha'n lu dhe vos stankys yn-dann dreys?’

¹⁴ Hag y leveris dhodho, ‘Dre dhiw vil ha trihans androweyth ha myttinweyth; ena y fydh an tyller sans daskorrys yn y studh ewn.’

Gabriel a Styr an Welesigeth

¹⁵ Pan welsen vy, Daniel, an welesigeth, my a hwilas hy honvedhes; hag otta, y sevis dheragov onan ha dhodho semlans gour.

¹⁶ Ha my a glewas lev den yntra glannow an Ulay, hag y helwis ow leverel, ‘Gabriel, gwra dhe hemma konvedhes an welesigeth.’

¹⁷ Ytho y teuth ogas dhe'm savla, ha pan dheuth, my a gemmeras own ha koedha war ow fas. Mes y leveris dhymm, ‘Konvedh, A vab-den, bos an welesigeth rag termyn an diwedh.’

¹⁸ Hag ev ow kewsel orthiv, my a goedhas yn klamder, gans ow fas troha'n dor. Mes ev a'm tochyas, ha'm settya a'm sav.

¹⁹ Yn-medh ev, ‘Otta, my a dheriv dhis an pyth a hwyrvydh troha diwedh termyn an sorr, rag an welesigeth yw a-dro dhe brys ordenys an diwedh.

²⁰ An hordh dewgornek a welsys yw myghternedh Media ha Persia.

²¹ An bogh blewek yw myghtern Pow Grek, ha'n korn bras ynter y dhewlagas yw an kynsa myghtern.

²² An korn a veu terrys, hag yn y le y sevis peswar korn arall, yw peder ruvaneth hag a wra sevel a'y genedhel, mes heb y alloes.

²³ Orth diwedh aga rewl, pan dhrehedh an dhrogoberoryon dh'aga ughboynt, y hwra sevel myghtern garow y semlans neb a gonvedh kevrinyow.

²⁴ Y alloes a wra krevhe, mes ny vydh der y nerth y honan. Marthys y hwra ev distrui, ha seweni yn pypynag a wrello. Ev a wra distrui an re grev ha pobel an syns.

²⁵ Der y felder ev a wra dhe doell seweni der y dhorn; balgh vydh yn y golonn. Heb gwarnyans y hwra distrui meur a dus; erbynn Pryns an brynsys y sev; y fydh terrys, mes ny vydh dre leuv den.

²⁶ Gwelesigeth an gorthugher ha'n myttin, re beu leverys, yw an gwiryonedh; mes ty, gwra selya an welesigeth, rag yth yw a-dro dhe lies dydh alemma.’

²⁷ Ha my, Daniel, a glamderas, hag o klav dre nebes dydhyow; ena my a sevis ha gul negys an myghtern. Mes skruth a'm kemmeras drefenn an welesigeth, o dres konvedhes.