Daniel 6 - An Bibel Kernewek 20234 (Kernewek Kemmyn)

An Bras erbynn Daniel

¹ Da o gans Darius settya war an ruvaneth hwegh-ugens gwahalyeth, rag may fens der an ruvaneth oll,

² hag a-ughta tri lewydh, ha Daniel o onan anedha. Dhedha yth o res dhe'n wahalyethow ri derivas, rag na'n jeffa an myghtern koll.

³ Ena an Daniel ma a dheuth ha bos meur y vri dres an lewydhyon erell, ha dres an wahalyethow, drefenn bos ynno spyrys bryntin; ha'n myghtern a dybis y settya war an ruvaneth oll.

⁴ Ena an lewydhyon ha'n wahalyethow a hwilas skila rag krodhvol war Daniel a-dro dhe'n ruvaneth; mes ny yllens kavoes skila rag krodhvol, na kammwul vyth, rag y vos len; ha ny veu kevys ynno na fowt na kammwul.

⁵ Ena y leveris an wesyon na, ‘Ny wren kavoes skila rag krodhvol war Daniel, marnas ni dh'y havoes ow tochya lagha y Dhuw.’

⁶ Ena an lewydhyon ha'n wahalyethow ma eth yn routh dhe'n myghtern, hag a leveris dhodho, ‘A vyghtern Darius, re vewi bys vykken!

⁷ Oll lewydhyon an ruvaneth, an bennternedh ha'n wahalyethow, an gusulyadoryon ha'n wovernours, re omgusulyas may hwrello an myghtern dyllo ordenans ha gweythresa difenn krev: piwpynag a wrello pysadow dhe dhuw po dhe dhen a-ji deg dydhweyth warn ugens, marnas dhiso jy, A vyghtern, dhe vos tewlys yn fow a lewyon.

⁸ Lemmyn, A vyghtern, dyllo an difenn ha sin an skrifenn, rag na allo bos chanjys, herwydh lagha an Medys ha'n Persianys, na yll bos daskelwys.’

⁹ Rakhenna, myghtern Darius a sinas an skrifenn ha'n difenn.

Daniel yn Fow an lewyon

¹⁰ Pan wodhva Daniel bos sinys an skrifenn, yth eth dh'y ji. Y feu ynno fenestri y'n soler igor war-tu Yerusalem. Teyrgweyth pub dydh yth esa ev ow mos war benn-dewlin rag gul pysadow ha gormola a-rag y Dhuw, dell wrussa seuladhydh.

¹¹ Ena an wesyon na a dheuth yn routh ha kavoes Daniel ow kul pysadow ha govynnadow a-rag y Dhuw.

¹² I a dheuth nes, ha kewsel a-rag an myghtern a-dro dhe'n difenn ryel, ‘A ny wrussys sina difenn, piwpynag a wrello pysadow dhe dhuw po dhe dhen a-ji dhe dheg dydhweyth warn ugens, marnas dhiso jy, A vyghtern, dhe vos tewlys yn fow a lewyon?’ An myghtern a worthybis, ‘An mater a sev, herwydh lagha an Medys ha'n Persianys, na yll bos daskelwys.’

¹³ Ena i a worthybis ow leverel dhe'n myghtern, ‘Daniel, neb yw onan an dhivresow a Yuda, ny wra vri orthis, A vyghtern, nag orth an difenn sinys genes, mes ev a wra y bysadow teyrgweyth pub dydh.’

¹⁴ Pan glewas an geryow ma, an myghtern a veu troblys meur, hag ervira delivra Daniel; ha bys pan sedhas an howl y hwila y sawya.

¹⁵ Ena an wer na a dheuth yn routh dhe'n myghtern, ha leverel dhodho, ‘Godhvydh, A vyghtern, bos lagha an Medys ha'n Persianys, na yll difenn na ordenans dyllys gans an myghtern bos daskelwys.’

¹⁶ Ena an myghtern a worhemmynnis, hag i a dhros Daniel ha'y dewlel yn fow an lewyon. Yn-medh an myghtern dhe Daniel, ‘Re wrello dha Dhuw, neb a servydh prest, dha dhelivra!’

¹⁷ Ha men a veu kyrghys, ha gorrys orth ganow an fow, ha'n myghtern a'n selyas gans y vysow-selya y honan, keffrys gans bysow-selya y arlydhi, rag na ve travyth chanjys ow tochya Daniel.

¹⁸ 19 Ena yth eth an myghtern dh'y balys, ha tremena an nosweyth heb dybri; nyns esa didhenyow dres a-dheragdho, ha kosk a deghas dhiworto.

Daniel Kemmerys Mes a'n Fow.

¹⁹ Ena orth tardh an jydh, an myghtern a sevis ha mos toeth da dhe fow an lewyon.

²⁰ Pan dheuth nes dhe'n fow, ev a armas dhe Daniel gans lev troblys, ha leverel dhe Daniel, ‘A Daniel, gwas an Duw bew, a allas dha Dhuw, neb a servydh prest, dha dhelivra a'n lewyon?’

²¹ Ena y leveris Daniel dhe'n myghtern, ‘A vyghtern, re vewi bys vykken!

²² Ow Duw a dhannvonas y el ha degea ganow an lewyon, ha ny wrens ow shyndya, drefenn ow bos kevys divlam a-ragdho; hag ynwedh a-ragos, A vyghtern, ny wrug drog vyth.’

²³ Ena yth o an myghtern lowen dres eghenn ragdho, hag ev a worhemmynnis may fe Daniel tennys dhiworth an fow. Ytho Daniel a veu tennys dhiworth an fow, ha ny veu kevys pystik vyth warnodho, rag ev dhe drestya yn y Dhuw.

²⁴ Ha'n myghtern a erghis, ha'n wesyon na re guhudhsa Daniel a veu kyrghys ha tewlys yn fow an lewyon – i, aga mebyon, ha'ga gwragedh; ha kyns i dhe dhrehedhes dhe woeles an fow, an lewyon a's fethas ha terri oll aga eskern dhe demmyn.

²⁵ Ena myghtern Darius a skrifas dhe oll an poblow, kenedhlow ha tavosow trigys y'n norvys oll: ‘Pals re bo agas kres!

²⁶ Ordenans a wrav, yn pub arloetteth a'm ruvaneth, may hwrello tus krena ha kavoes own a-rag Duw Daniel, Rag ev yw an Duw bew, neb a dhur bys vykken; nevra ny vydh y wlaskor distruys, ha'y roweth a vydh bys y'n diwedh.

²⁷ Delivra ha sawya a wra, ev a wra toknys hag anethow yn nev hag yn nor; ev re sawyas Daniel dhiworth galloes an lewyon.’

²⁸ Ytho an Daniel ma a sewenis yn-dann reyn Darius ha reyn Kyrus an Persian.