Breusysi 3 - An Bibel Kernewek 20234 (Kernewek Kemmyn)

Kenedhlow Gesys y'n Tir

¹ Lemmyn an re ma yw an kenedhlow a wrug an Arloedh aga gasa rag previ oll an re yn Ysrael na's tevo aswonnvos a vresel vytholl yn Kanan

² (ny wrug ev henna marnas dhe dhyski dhe henedhow mebyon Ysrael batalyas, an re na'n dhys'sa kyns).

³ Pymp gwahalyeth an Filistysi, hag oll an Kananysi ha'n Sidonysi, ha'n Hivysi esa trigys war venydh Lebanon, dhiworth menydh Baal-hermon, bys Lebo-hamath.

⁴ An re ma o rag previ Ysrael, rag godhvos mar pens i gostydh dhe worhemmynnow an Arloedh a worhemmynnis dh'aga thasow dre Moyses.

⁵ Ytho yth esa mebyon Ysrael trigys yn mysk an Kananysi, an Hyttysi, an Amorysi, an Perizzysi, an Hivysi, ha'n Yebusysi;

⁶ hag i a gemmeri aga myrghes rag aga gwragedh, ha'ga myrghes a rens dh'aga mebyon; hag i a wordhyens aga duwow.

⁷ Mebyon Ysrael a wrug arta an pyth o drog yn golok an Arloedh, owth ankevi an Arloedh aga Duw, hag ow kordhya an Baalim ha'n Asheroth.

⁸ Ytho sorr an Arloedh a loskas erbynn Ysrael, hag ev a's gwerthas yn leuv Kushan-rishathaym myghtern Aram Naharaym; ha mebyon Ysrael a servya Kushan-rishathaym eth blydhen.

⁹ Mes pan grias mebyon Ysrael dhe'n Arloedh, an Arloedh a dhrehevis delivrer rag mebyon Ysrael, neb a's delivras, Othniel mab Kenaz, broder yowynka Kaleb.

¹⁰ Spyrys an Arloedh a dheuth warnodho, hag ev a vreusi Ysrael; ev eth dhe vresel, ha'n Arloedh a ros Kushan-rishathaym myghtern Aram yn y leuv; ha'y leuv a's tevo maystri war Kushan-rishathaym.

¹¹ Ytho an tir a'n jevo powes dew-ugens blydhen. Ena Othniel mab Kenaz a verwis.

Ehud

¹² Ena mebyon Ysrael a wrug arta an pyth o drog yn golok an Arloedh, ha'n Arloedh a grevhas Eglon myghtern Moab erbynn Ysrael drefenn i dhe wul an pyth o drog yn golok an Arloedh.

¹³ Ev a guntellas dhodho an Ammonysi ha'n Amalekysi, ha mos ha fetha Ysrael; hag i a gemmeras sita an palmwydh.

¹⁴ Ytho mebyon Ysrael a servya Eglon myghtern Moab etek blydhen.

¹⁵ Mes pan grias mebyon Ysrael dhe'n Arloedh, an ARLOEDH a dhrehevis ragdha delivrer, Ehud mab Gera, Benyaminyas, gour kledhek. Mebyon Ysrael a dhannvonas trubyt dhodho der Eglon myghtern Moab.

¹⁶ Ehud a wrug ragdho y honan kledha dewvinyek, unn kevelin y hirder, hag ev a'n fastyas orth y vordhos dhyghow yn-dann y dhillas.

¹⁷ Ena ev a brofyas trubyt dhe Eglon myghtern Moab. Eglon o gour fest tewl.

¹⁸ Pan dhiwedhas Ehud ow profya an trubyt ev a dhannvonas dhe-ves an re esa ow toen an trubyt.

¹⁹ Mes ev y honan a dreylyas war-dhelergh orth an meyn kervys ogas dhe Gilgal, hag yn-medh ev, ‘Yma genev messaj kevrinek ragos, A vyghtern’. Ytho an myghtern a leveris, ‘Taw!’ hag oll y servysi eth yn-mes dhiworto.

²⁰ Ehud a dheuth dhodho hag ev owth esedha y honan yn stevell an soler, hag yn-medh ev, ‘Yma genev messaj dhiworth Duw ragos.’ Ytho ev a sevis a'y esedhva.

²¹ Ena Ehud a ystynnas y dhorn gledh, hag a gemmeras an kledha a'y vordhos dhyghow ha'y wana yn y dorr;

²² an dornla a entras ynwedh war-lergh an lown, ha'n blonek a dhegeas dres an lown, rag ny dennas an kledha a'y dorr, ha'n lastedhes a dheuth yn-mes.

²³ Ena Ehud eth yn-mes bys y'n portal, hag a dhegeas warnodho darasow stevell an soler hag a's alhwedhas.

²⁴ Wosa ev dhe vos gyllys dhe-ves, an servysi a dheuth, ha pan welsons bos darasow stevell an soler yn-dann alhwedh, i a dybi, ‘Heb dout yma ev kul devnydh a'n kawghti y'n stevell ayrellys.’

²⁵ Ytho i a wortas bys pan ens yn ankombrynsi. Pan na igoras hwath darasow stevell an soler, i a gavas an alhwedh hag a's igoras, hag ottena aga arloedh koedhys war an leur, marow.

²⁶ Ehud a dhienkas hag i ow kortos, hag ev a dremenas dres an meyn kervys, hag a dhienkas dhe Seira.

²⁷ Pan dheuth di, ev a hwythas an hirgorn yn bro venydhyek Efraym, ha mebyon Ysrael eth yn-nans ganso dhiworth an vro venydhyek, hag ev a-ragdha.

²⁸ Ev a leveris dhedha, ‘Holyewgh vy; rag an Arloedh re ros dhywgh agas eskerens an Moabysi yn agas leuv.’ Ytho i eth war-nans war y lergh, hag a synsis rysyow an Yordan erbynn an Moabysi ha lettya na dremenna denvyth dresti.

²⁹ Y'n prys na i a ladhas a-dro dhe dheg mil a wer Moab, i oll nerthek ha krev; ny dhienkas gour vytholl.

³⁰ Ytho Moab a veu fethys y'n jydh na yn-dann leuv Ysrael. Ha'n tir a'n jevo powes peswar-ugens blydhen.

Shamgar

³¹ War y lergh y teuth Shamgar mab Anath neb a ladhas hwegh kans gour a'n Filistysi gans garthow. Ev ynwedh a dhelivras Ysrael.