Breusysi 21 - An Bibel Kernewek 20234 (Kernewek Kemmyn)

An Benyaminysi Sawys a Dhiswrians

¹ An Ysraelysi re dosa yn Mispa, ‘Ny re nagonan ahanan y vyrgh yn demmedhyans dhe Benyamin.’

² Ha'n bobel a dheuth dhe Bethel, hag a esedhas ena bys y'n gorthugher a-rag Duw, hag i a sevis aga lev hag a oelas yn hwerow,

³ I a leveris, ‘A Arloedh prag y hwarva y fyll hedhyw unn loeth yn Ysrael?’

⁴ Ternos a-varr an bobel a sevis, hag a dhrehevis alter ena, hag a offrynnas offrynnow leskys hag offrynnow kres.

⁵ Ena mebyon Ysrael a leveris, ‘Piw yn-mes a oll loethow Ysrael na dheuth yn-bann dhe'n kuntelles dhe'n Arloedh?’ Rag ti solem re bia gwrys a-dro dhe biwpynag na dheffa yn-bann dhe'n Arloedh dhe Mispa, ow leverel, ‘An den na a vydh gorrys dhe'n mernans.’

⁶ Mes mebyon Ysrael a gemmeras truedh war Benyamin, aga breder, hag a leveris, ‘Unn loeth yw treghys dhiworth Ysrael hedhyw.

⁷ Pandr'a wren rag gwragedh rag an re yw gesys, drefenn ni dhe di re an Arloedh, na ren dhedha onan vytholl a'gan myrghes avel gwragedh?’

⁸ Ena i a leveris, ‘Eus nebonan a loethow Ysrael na dheuth yn-bann dhe'n Arloedh dhe Mispa?’ Y hwarva na dhothya nagonan a Yabesh-gilead dhe'n kamp, dhe'n kuntelles.

⁹ Rag pan veu lennys an rol yn mysk an bobel, nyns esa denvyth a drigoryon Yabesh-gilead ena.

¹⁰ Ytho an kuntelles a dhannvonas dewdhek mil gasor di hag a's erghis, ‘Kewgh, gweskewgh trigoryon Yabesh-gilead gans min an kledha, keffrys an benynes ha'n fleghes.

¹¹ Hemm yw an pyth a wrewgh; pub gour ha pub benyn a wrowedhas gans gour, hwi a saker dhe dhistruans leun.’

¹² Hag i a gavas yn mysk trigoryon Yabesh-gilead peswar kans gwyrghes yowynk na gosksons gans gour hag i a's dros dhe'n kamp yn Shilo, usi yn pow Kanan.

¹³ Ena an kuntelles oll a dhannvonas ger dhe'n Benyaminysi esa orth garrek Rimmon, hag a elwis kres dhedha.

¹⁴ Benyamin a dhehwelis y'n termyn na, hag i a ros dhedha an benynes re withsons yn few a venynes Yabesh-gilead, mes nyns ens an re na lowr ragdha.

¹⁵ An bobel a gemmeras truedh war Benyamin, rag an Arloedh a wrussa aswa yn loethow Ysrael.

¹⁶ Ytho henavogyon an bobel a leveris, ‘Pandr'a wren rag kavoes gwragedh rag an re yw gesys, drefenn nag eus benynes gesys yn Benyamin?’

¹⁷ Hag i a leveris, ‘Y tegoedh may fo heryon rag an re yw gesys a Benyamin, rag ma na vo loeth defendys dhiworth Ysrael.

¹⁸ Byttegyns ny yllyn ri onan a'gan myrghes dhedha avel gwragedh.’ Rag mebyon Ysrael re dosa, ‘Milliges re bo neb a re gwreg dhe Benyamin.’

¹⁹ Ytho i a leveris, ‘Mirewgh, goel blydhenyek an Arloedh a hwyrvydh yn Shilo, usi a'n gledhbarth dhe Bethel, a'n est dhe'n fordh-veur a Bethel dhe Shekem, hag a'n dhyghowbarth a Lebona.’

²⁰ Hag i a erghis dhe'n Benyaminysi, ow leverel, ‘Kewgh hag omgelewgh y'n gwinlannow,

²¹ ha goelyewgh; pan dheu an benynes yowynk yn-mes dhe gemmeres rann yn donsyow, ena dewgh yn-mes a'n gwinlannow, ha pub huni synses gwreg ragdho y honan a venynes yowynk Shilo, ha kewgh yn pow Benyamin.

²² Ena mar teu aga thasow po aga breder rag krodhvolas warnan, ni a lever dhedha, “Bedhewgh hegar ha gesewgh ni dh'aga havoes; rag ny yllsyn kemmeres gwragedh yn batel rag pub gour. Ha ny beghsowgh erbynn an ti ow ri agas myrgh dhedha.” ’

²³ An Benyaminysi a wrug yndella; i a gemmeras gwragedh rag pub huni anedha a'n donsyoresow a synsons. Ena i eth ha dehweles dh'aga eretons, hag a dhastrehevis an trevow ha triga ynna.

²⁴ Ytho mebyon Ysrael eth alena y'n termyn na, loeth ha loeth ha teylu ha teylu, hag i eth yn-mes alena dh'aga eretons aga honan.

²⁵ Y'n dydhyow na, nyns esa myghtern yn Ysrael; oll an bobel a wre an pyth o ewn yn aga dewlagas aga honan.