Breusysi 20 - An Bibel Kernewek 20234 (Kernewek Kemmyn)

An Loethow Erell a Omsett war Benyamin

¹ Ena oll mebyon Ysrael a dheuth yn-mes, dhiworth Dan bys yn Beer-sheba, yn aga mysk pow Gilead, ha'n bobel a omguntellas yn unn bagas a-rag an Arloedh yn Mispa.

² Ledyoryon oll an bobel, oll loethow Ysrael, a dheuth war-barth yn kuntelles, peswar kans mil droesek ow toen kledhedhyow.

³ An Benyaminysi a glewas, galsa mebyon Ysrael yn-bann dhe Mispa. Mebyon Ysrael a leveris, ‘Leverewgh dhyn fatell hwarva an droktra ma?’

⁴ An Levyas, gour an venyn a veu moldrys, a worthybis, ‘My a dheuth dhe Gibea yn Benyamin, my ha'm iswreg dhe spena an nos.

⁵ Gwer Gibea a sevis er ow fynn, hag a gylghyas an chi yn nos, ha'ga thowl o ow ladha, hag i a ravnas ow iswreg bys pan verwis.

⁶ Ena my a gemmeras ow iswreg hag a's troghas yntra rannow, hag a's dannvonas der oll pow eretons Ysrael, rag i re wrussa tra dhivlas yn Ysrael.

⁷ Ytho hwi oll, vebyon Ysrael, rewgh agas avis ha'gas kusul omma.’

⁸ Oll an bobel a sevis gans unn akord, ow leverel, ‘Nyns a denvyth ahanan dh'agan tyldow, na ny dhehwelyn denvyth ahanan dh'agan chiow.

⁹ Mes hemm yw an pyth a wren dhe Gibea; ni a dewl prenn rag an omsettyans er hy fynn.

¹⁰ Ni a gemmer deg gour yn-mes a gans der oll loethow Ysrael, ha kans yn-mes a vil, ha mil yn-mes a dheg mil, rag dri provians rag an bobel, a vydh ow mos rag attyli dhe Gibea yn Benyamin a'n dra dhivlas re wrussons yn Ysrael.’

¹¹ Ytho oll gwer Ysrael a omguntellas erbynn an sita, gans unn akord.

¹² Loethow Ysrael a dhannvonas gwer der oll loeth Benyamin, ow leverel, ‘Pyth yw an droktra ma re beu gwrys yn agas mysk?

¹³ Lemmyn daskorrewgh an dhrogwesyon yn Gibea, rag ma's lytthyn ha kartha an drog yn-mes a Ysrael.’ Mes ny vynna an Benyaminysi goslowes orth aga breder, mebyon Ysrael.

¹⁴ An Benyaminysi a omguntellas war-barth yn-mes a'n trevow dhe Gibea, rag mos yn-mes dhe vatalyas orth mebyon Ysrael.

¹⁵ Y'n jydh na an Benyaminysi a guntellas hwegh mil gledhevor warn ugens a'ga threvow, keffrys ha trigoryon Gibea.

¹⁶ A'n bobel ma yth esa seyth kans gour dewisys o kledhek; pub onan anedha a ylli tewlel men orth blewenn heb fyllel.

¹⁷ An Ysraelysi, heb Benyamin, a guntellas peswar kans mil gledhevor, oll anedha kasoryon.

¹⁸ An Ysraelysi a dhallathas mos yn-bann dhe Bethel, may hwovynnsons a Dhuw, ‘Piw ahanan a yn-bann yn kynsa rag batalyas orth an Benyaminysi?’ Ha'n Arloedh a worthybis, ‘Yuda a yn-bann yn kynsa.’

¹⁹ Ena mebyon Ysrael a sevis y'n myttin hag a gampyas ryb Gibea.

²⁰ An Ysraelysi eth yn-mes dhe vatalyas orth Benyamin; ha'n Ysraelysi a arayas aga honan rag kas er aga fynn yn Gibea.

²¹ An Benyaminysi a dheuth yn-mes a Gibea, hag a weskis dhe'n dor dew vil warn ugens a'n Ysraelysi an jydh na.

²² Mebyon Ysrael a omgrevhas, hag arta i a arayas aga honan rag kas y'n keth tyller mayth araysens an kynsa dydh.

²³ An Ysraelysi eth yn-bann hag a oelas a-rag an Arloedh bys y'n gorthugher; hag a wovynnas a'n Arloedh, ‘A dheun nes arta dhe vatalyas orth agan breder an Benyaminysi?’ Ha'n Arloedh a leveris, ‘Kewgh yn-bann er aga fynn.’

²⁴ Yndella mebyon Ysrael eth yn-rag erbynn an Benyaminysi an nessa dydh.

²⁵ Benyamin eth yn-mes er aga fynn dhiworth Gibea an nessa dydh, hag a weskis dhe'n dor etek mil a vebyon Ysrael, oll anedha gwer ervys.

²⁶ Ena oll mebyon Ysrael, an lu dien, a dhehwelis dhe Bethel, hag a oelas, owth esedha ena a-rag an Arloedh, ow penys an jydh na bys y'n gorthugher. Ena i a offrynnas offrynnow leskys hag offrynnow kres a-rag an Arloedh.

²⁷ Ha mebyon Ysrael a wovynnas orth an Arloedh (rag y fedha argh an kevambos ena y'n dydhyow na

²⁸ ha Finehas mab Eleazar mab Aron, a servya a-ragdha y'n dydhyow na) ow leverel, ‘A wren ni mos yn-mes unnweyth arta rag batalyas orth agan breder, an Benyaminysi, po a wren ni hedhi?’ An Arloedh a worthybis, ‘Kewgh yn-bann rag a-vorow my a's re yn agas leuv.’

²⁹ Ytho Ysrael a settyas gwer yn kontrewaytyans a-dro dhe Gibea.

³⁰ Ena mebyon Ysrael eth yn-bann erbynn an Benyaminysi an tressa dydh, hag a arayas aga honan erbynn Gibea, avel kyns.

³¹ Pan eth an Benyaminysi yn-mes erbynn an bobel, tennys ens dhiworth an sita. Avel kyns, i a dhallathas shyndya an gasoryon war an fordhow meur, may led onan anedha a dhe Bethel, ha'y gila dhe Gibea, keffrys hag y'n mes igor, ow ladha deg gour warn ugens a Ysrael.

³² An Benyaminysi a dybi, ‘Fethys yns a-ragon avel kyns.’ Mes mebyon Ysrael a leveris, ‘Omdennyn ha'ga thenna dhiworth an sita war-tu ha'n fordhow.’

³³ Oll an Ysraelysi a sevis dhiworth aga thyller, hag i a arayas aga honan yn Baal-tamar, ha'n re esa y'n kontrewaytyans a dardhas a'ga le a'n howlsedhes dhe Geba.

³⁴ Erbynn Gibea y teuth deg mil wour dewisys a oll Ysrael, ha'n vatel o fell. Mes ny wodhya an Benyaminysi bos terroesa ow tos warnedha.

³⁵ An Arloedh a fethas Benyamin a-rag Ysrael; ha mebyon Ysrael a dhiswrug pymp mil warn ugens ha kans a wer Benyamin y'n jydh na, oll anedha ervys gans kledhedhyow.

³⁶ Ena an Benyaminysi a wodhya i dhe vos fethys. Mebyon Ysrael a hepkorras tir dhe Benyamin, drefenn i dhe drestya dhe'n kontrewaytyans re settsens erbynn Gibea.

³⁷ An wer yn kontrewaytyans a boenyas yn skav erbynn Gibea. Ena i a weskis oll an sita gans an kledha.

³⁸ Re bia tokyn gwrys ynter an Ysraelysi ha'n re y'n kontrewaytyans, pan dhannvonens yn-bann kommolenn a vog dhiworth an sita,

³⁹ y treylya an Ysraelysi yn batel. Mes Benyamin re dhallathsa shyndya mebyon Ysrael, ow ladha a-dro dhe dheg warn ugens anedha; yndella i a dybi, ‘Yn surredi i yw fethys a-ragon, dell o y'n kynsa batel.’

⁴⁰ Mes pan dhallathas an gommolenn, koloven a vog, yskynna a'n sita, an Benyaminysi a viras war-dhelergh – hag otta mog an sita oll owth yskynna war-tu ha'n ebron.

⁴¹ Ena an Ysraelysi a dreylyas ha'n Benyaminysi a borthas own, rag i a wodhya terroesa dhe dhos warnedha.

⁴² Ytho i a dreylyas dhiworth an Ysraelysi war-tu ha'n gwylvos, mes an vatel a dremenas dresta hag yth esa an re a dheuth yn-mes a'n sita orth aga ladha ena.

⁴³ I a geas an Benyaminysi a-ji ha'ga chasya heb hedhi, ha'ga threttya yn-dann droes bys tyller a'n est dhe Gibea.

⁴⁴ Etek mil Benyaminyas a goedhas, oll anedha kasoryon alloesek.

⁴⁵ Pan dreylsons ha fia dhe'n gwylvos dhe garrek Rimmon, pymp mil wour a veu treghys dhe'n dor war an fordhow meur, hag i a veu chasys bys Gidom, ha dew vil wour anedha a veu ledhys.

⁴⁶ Ytho oll hag a goedhas y'n jydh na a Benyamin o pymp mil warn ugens kasor ow toen kledhedhyow, oll anedha gwer krev.

⁴⁷ Mes hwegh kans anedha a dreylyas hag a fias war-tu ha'n gwylvos dhe garrek Rimmon, hag a wortas ryb garrek Rimmon peswar mis.

⁴⁸ Ena an Ysraelysi a dreylyas war-lergh erbynn an Benyaminysi hag a's gweskis gans min an kledha - an sita, an bobel, an enyvales, hag oll a veu gesys. Dres henna i a loskas oll an trevow erell.