Breusysi 18 - An Bibel Kernewek 20234 (Kernewek Kemmyn)

Dan a Hwila Tir

¹ Y'n dydhyow na nyns esa myghtern yn Ysrael. Hag y'n dydhyow na loeth an Danysi a hwila eretons ragdho y honan dhe driga ynno, rag bys y'n termyn na ny via tir rynnys dhedha dre goelbrenn yn mysk loethow Ysrael.

² Ytho an Danysi a dhannvonas pymp gour kolonnek yn-mes a'ga niver kowal, dhiworth Sora ha dhiworth Eshtaol rag aspia an tir ha'y hwithra; hag yn-medhons dhedha, ‘Kewgh, hwithrewgh an tir.’ Pan dheuthons dhe vro venydhyek Efraym, dhe ji Mika, i a spenas an nos ena.

³ Pan esons yn chi Mika i a aswonnis lev an Levyas yowynk; ytho i a dreylyas ha govynn orto, ‘Piw a'th tros omma? Pandr'a wredh y'n tyller ma? Pyth yw dha negys omma?’

⁴ Ev a leveris dhedha, ‘Mika a wrug neppyth a'n par ma ragov, hag ev a'm arvethas, ha galsov y oferyas.’

⁵ Ena i a leveris dhodho, ‘Govynn orth Duw, rag may hwodhvyn mar pydh sewen an negys a wren.’

⁶ An oferyas a worthybis, ‘Kewgh yn kres. Yma an negys a wrewgh a-rag an Arloedh.’

⁷ An pymp gour eth yn-rag, ha pan dheuthons dhe Laish, i a welas an bobel esa ena ow pewa gans diagha herwydh gis tus Sidon, kosel ha digeudh, heb edhomm a dravyth war an norvys, ha dhedha rychys. Pell vons a dus Sidon, ha ny's teva kevrenn gans denvyth.

⁸ Pan dheuthons dh'aga breder yn Sora hag Eshtaol,

⁹ i a leveris dhedha, ‘Pyth yw agas derivadow?’ Yn-medhons, ‘Deun yn-bann er aga fynn; rag ni re welas an tir ha fest da ywa. A wrewgh travyth? Na vedhewgh lent ow mos, mes entrewgh ynno hag eritewgh an tir.

¹⁰ Pan ewgh, hwi a dheu dhe bobel dhigeudh. Ledan yw an tir – yn hwir Duw re'n ros yn agas diwleuv – tyller ma nag eus fowt a dravyth war an norvys.’

¹¹ Hwegh kans gour a loeth an Danysi, ervys gans arvow a vresel eth yn-mes a Sora hag a Eshtaol,

¹² hag i eth yn-bann ha kampya yn Kiryath-yearim yn Yuda. Rag hemma henwys yw an tyller na Mahane-dan bys y'n jydh ma; yma hi a'n howlsedhes dhe Kiryath-yearim.

¹³ Alena i a dremenas dhe vro venydhyek Efraym, hag a dheuth dhe ji Mika.

¹⁴ Ena an pymp gour a via gyllys dhe aspia an tir (henn yw Laish) a leveris dh'aga breder, ‘A wodhowgh hwi bos yn chiow ma efod, terafim hag imaj? Lemmyn ytho ombrederewgh pandr'a wrewgh.’

¹⁵ Yndella i a dreylyas dhe'n tu na hag a dheuth dhe ji an Levyas yowynk, hag a'n salusis.

¹⁶ Y'n kettermyn yth esa an hwegh kans gour a'n Danysi, gans aga arvow a vresel, ow sevel orth entrans an yet.

¹⁷ An pymp gour a via gyllys dhe aspia an tir a entras hag a gemmeras an imaj, an efod ha'n terafim. Yth esa an oferyas ow sevel orth entrans an yet gans an hwegh kans gour o ervys gans arvow a vresel.

¹⁸ Pan entras an wer yn chi Mika hag a gemmeras an imaj, an efod ha'n terafim, an oferyas a leveris dhedha, ‘Pyth esowgh hwi ow kul?’

¹⁹ I a leveris dhodho, ‘Taw! Gorr dha leuv war dha anow, ha deus genen ha bydh tas dhyn ni hag oferyas. Yw gwell bos oferyas yn chi unn gour, po bos oferyas dhe loeth ha dhe gordh yn Ysrael?’

²⁰ Yth esa an oferyas pes da. Ev a gemmeras an efod, an terafim ha'n imaj, hag ev eth yn mysk an bobel.

²¹ Ytho i a dreylyas ha mos yn-kerdh, ow korra an re vyghan, an chatel ha'n pythow a-ragdha.

²² Pan esens pell dhiworth chi Mika, an wer esa trigys y'n chiow ogas dhe ji Mika a veu gelwys yn-mes hag i a dremenas dres an Danysi.

²³ I a armas dhe'n Danysi, hag i a dreylyas a-dro hag a leveris dhe Mika, ‘Pandr'a hwer dhis, ha ty ow gelwel dha wer yn-mes?’

²⁴ Ev a worthybis, ‘Hwi a gemmeras an duwow a wrug vy, ha'n oferyas, ha mos dhe-ves, ha pyth yw gesys dhymm? Ytho fatell yllowgh hwi govynn orthiv, “Pandr'a hwer dhis?” ’

²⁵ An Danysi a worthybis, ‘Gwell vydh dhis na vo klewys dha lev yn agan mysk, poken gwer toemm aga sorr a omsett warnas, ha ty a gyll dha vewnans ha bewnans dha diogeth.’

²⁶ Ena an Danysi eth war aga fordh. Pan welas Mika i dhe vos re grev ragdho, ev a dreylyas ha dehweles dh'y ji.

An Danysi a Gemmer Laish

²⁷ An Danysi a gemmeras an pyth a wrussa Mika, war-barth ha'n oferyas o dhodho, hag i a dheuth dhe Laish, dhe bobel gosel ha digeudh, hag i a's weskis gans an kledha hag a loskas an sita.

²⁸ Nyns esa delivrer, drefenn hy bos pell a Sidon ha ny's teva kevrenn gans denvyth. Yth esa an sita yn nans ogas dhe Beth-rehob. I a dhastrehevis an sita, ha triga ynni.

²⁹ I a henwis an sita Dan war-lergh aga thas Dan, onan a vebyon Ysrael; mes hanow an sita a vedha Laish kyns.

³⁰ Ena an Danysi a dhrehevis an imaj ragdha aga honan. Yonathan mab Gershom, mab Moyses, ha'y vebyon o oferysi rag loeth an Danysi bys y'n prys kethneth an tir.

³¹ Yndella i a dhrehevis ragdha aga honan an imaj re wrussa Mika, hag y feu ena oll an termyn may feu chi Duw yn Shilo.