Breusysi 14 - An Bibel Kernewek 20234 (Kernewek Kemmyn)

Demmedhyans Samson

¹ Samson eth yn-nans dhe Timna, hag yn Timna ev a welas benyn, Filistyades.

² Ena ev a dheuth yn-bann hag a dherivas dh'y das ha dh'y vamm, ‘My re welas Filistyades yn Timna; lemmyn kevewgh hi ragov avel gwreg.’

³ Mes y das ha'y vamm a leveris dhodho, ‘A nyns eus benyn yn mysk dha gerens, po yn mysk oll agan pobel, bys may tegoedh dhis kavoes gwreg dhiworth an Filistysi antrodreghys?’ Mes Samson a leveris dh'y das, ‘Kav hi ragov, drefenn hi a'm ples.’

⁴ Ny wodhya y das na'y vamm bos hemma dhiworth an Arloedh, rag yth esa ow hwilas acheson dhe oberi erbynn an Filistysi. Yn termyn na an Filistysi a's tevo maystri war Ysrael.

⁵ Ena Samson eth yn-nans gans y das ha'y vamm dhe Timna. Pan dheuth dhe winlannow Timna distowgh lew yowynk a usas orto.

⁶ Spyrys an Arloedh a fyskas warnodho hag ev a'n torras dhe demmyn heb travyth yn y dhiwdhorn, dell derrir gevrik dhe demmyn. Mes ny dherivas naneyl dh'y das na dh'y vamm an pyth re wrug ev.

⁷ Ena ev eth yn-nans hag a geskewsis gans an venyn, ha hi a'n plesyas.

⁸ Wosa pols ev a dhehwelis rag demmedhi an venyn, hag ev a dreylyas a-denewen rag gweles korf an lew, hag yth esa hes a wennennow ynno, ha mel.

⁹ Ev a'n kravas yn-mes yn y dhiwdhorn, hag ev eth yn-rag, ow tybri hag ev ow mos. Pan dheuth dh'y das ha dh'y vamm, ev a ros neppyth anodho dhedha, hag i a'n dybris. Mes ny dherivas dhedha y kemmersa an mel dhiworth korf an lew.

¹⁰ Y das eth yn-nans dhe'n venyn, ha Samson a wrug kevewi ena dell wre an wer yowynk.

¹¹ Pan y'n gwelas an dus i a dhros deg koweth warn ugens dhe vos ganso.

¹² Samson a leveris dhedha, ‘Gas vy dhe worra a-ragowgh govynn koynt. Mar kodhowgh y dhisplegya a-ji dhe'n seyth dydh a'n kevewi, ha'y dhysmygi, ena y rov dhywgh deg lien warn ugens ha deg dillasenn warn ugens

¹³ Mes mar ny wodhowgh y dhisplegya, ena hwi a re dhymm deg lien warn ugens ha deg dillasenn.’ Ytho i a leveris dhodho, ‘Govynn dha wovynn koynt, gas ni dh'y glewes.’

¹⁴ Ev leveris dhedha, ‘Yn-mes a'n dybrer y teuth boes, hag yn-mes a'n krev y teuth hwekter.’ Tri dydh ny wodhyens displegya an govynn koynt.

¹⁵ An peswora dydh y lavarsons dhe wreg Samson, ‘Dyn dha wour rag may tisplekkyo an govynn koynt po ni a'th lesk ha chi dha das gans tan. A'gan gelwsowgh hwi rag agan gul boghosek?’

¹⁶ Yndella gwreg Samson a oelas a-ragdho, ow leverel, ‘Ty a'm kas, ny'm kerydh yn hwir. Ty re wovynnas govynn koynt a'm pobel, mes ny'n displegsys dhymm.’ Ev a leveris dhedhi, ‘Mir, ny dherivis hemma naneyl dhe'm tas na dhe'm mamm, Prag y tegoedh dhymm y dherivas dhis?’

¹⁷ Hi a oela warnodho oll seyth dydh; ha drefenn hi dh'y annia, an seythves dydh ev a'n derivas dhedhi. Ena hi a'n displegyas dh'y fobel.

¹⁸ Gwer an dre a leveris dhodho dhe'n seythves dydh kyns an howl dhe sedhi, ‘Pyth yw hwekka es mel? Pyth yw kreffa es lew?’ Hag ev a leveris dhedha, ‘Mar ny arrewgh gans ow denewes, Ny dhisplegsewgh ow govynn koynt.’

¹⁹ Ena spyrys an Arloedh a fyskas warnodho, hag ev eth yn-nans dhe Ashkelon. Ev a ladhas deg gour warn ugens a'n dre, hag a gemmeras aga freydh, hag a ros an dillasennow dhe'n re re a dhisplegsa an govynn koynt. Yn sorr poeth ev a dhehwelis dhe ji y das.

²⁰ Ha gwreg Samson a veu res dh'y goweth re bia y gar y'n demmedhyans.