Breusysi 1 - An Bibel Kernewek 20234 (Kernewek Kemmyn)

Ysrael a fyll dhe Fetha Kanan

¹ Wosa mernans Yoshua, mebyon Ysrael a wovynnas orth an Arloedh ow leverel, ‘Piw a yn-bann ragon erbynn an Kananysi yn kynsa, dhe omladh er aga fynn?’

² An Arloedh a worthybis, ‘Yth a Yuda yn-bann; otta, my re ros an tir yn y leuv.’

³ Yn-medh Yuda dhe Simeon y vroder, ‘Deus yn-bann genev y'm rann a dir, may hyllyn omladh erbynn an Kananysi, ha my ynwedh, yth av genes y'th rann tejy.’ Ytho Simeon eth ganso.

⁴ Ena yth eth Yuda war-vann ha'n Arloedh a ros an Kananysi ha'n Perizzysi yn aga leuv, ha'ga gweskel yn Bezek, deg mil wour.

⁵ I a dheuth erbynn Adoni-bezek yn Bezek hag omladh er y bynn ha gweskel an Kananysi ha'n Perizzysi.

⁶ Adoni-bezek a fias dhe'n fo; mes i a jasyas war y lergh ha'y gachya, ha treghi dhe-ves y veusi ha'y vysies-troes bras.

⁷ Yn-medh Adoni-bezek, ‘Deg myghtern ha tri-ugens, aga meusi ha bysies-troes bras treghys dhe-ves, a guntella brewyon yn-dann ow moes; kepar dell wrugavy, yndella Duw re attylis dhymm.’ Hag i a'n dros dhe Yerusalem, hag ev a verwis ena.

⁸ Ytho mebyon Yuda a omladhas erbynn Yerusalem, hag a's kemmeras, ha'y gweskel gans min an kledha, ha settya tan y'n sita.

⁹ Ha wosa henna mebyon Yuda a dhiyskynnas dhe omladh erbynn an Kananysi trigys y'n vro venydhyek, y'n Negeb, hag y'n Shefela.

¹⁰ Yuda eth erbynn an Kananysi trigys yn Hebron (hanow Hebron o Kiryath-arba seuladhydh); hag i a weskis Sheshay, Ahiman ha Talmay.

¹¹ Alena yth ethons erbynn trigoryon Debir. Hanow Debir o Kiryath-sefer seulabrys.

¹² Ha Kaleb a leveris, ‘Ev neb a wysk Kiryath-sefer ha'y hemmeres, my a re dhodho ow myrgh Aksa avel gwreg.’

¹³ Hag Othniel mab Kenaz, broder yowynka Kaleb, a's kemmeras; hag ev a ros dhodho y vyrgh Aksa avel gwreg.

¹⁴ Pan dheuth hi dhodho, hi a ynnias warnodho govynn orth hy thas park; ha hi a dhiyskynnas a'y asen, hag yn-medh Kaleb dhedhi, ‘Pandr'a vynn'ta?’

¹⁵ Yn-medh hi dhodho, ‘Ro dhymm bennath; rag ty dhe'm settya yn tir an Negeb, ro dhymm fentynyow dowr ynwedh.’ Ytho Kaleb a ros dhedhi fentynyow gwartha ha fentynyow isella.

¹⁶ Mebyon an Kenyas, hwegron Moyses, eth yn-bann a sita an palmwydh gans mebyon Yuda dhe wylvos Yuda usi y'n Negeb ryb Arad; hag i eth ha triga yn mysk pobel an vro.

¹⁷ Yuda eth gans Simeon y vroder, hag i a weskis an Kananysi trigys yn Sefath, hag a's kowldhistruis. Ytho hanow an sita na o gelwys Horma.

¹⁸ Yuda a gemmeras Gaza ynwedh gans hy thiredh, hag Ashkelon gans hy thiredh, hag Ekron gans hy thiredh.

¹⁹ Yth esa an Arloedh gans Yuda, hag ev a gemmeras an vro venydhyek; mes ny allas chasya dhe-ves trigoryon an plen drefenn bos dhedha charettow a horn.

²⁰ I a ros Hebron dhe Kaleb, kepar dell lavarsa Moyses, hag ev a jasyas dhe-ves an tri mab a Anak.

²¹ Mes ny wrug mebyon Benyamin chasya dhe-ves an Yebusysi trigys yn Yerusalem; ytho an Yebusysi re beu trigys gans mebyon Benyamin yn Yerusalem bys y'n jydh hedhyw.

²² Chi Yosep ynwedh eth yn-bann erbynn Bethel, hag yth esa an Arloedh gansa.

²³ Chi Yosep a dhannvonas tus dhe aspia war Bethel (ha hanow an sita seuladhydh o Luz).

²⁴ An aspioryon a welas gour ow tos yn-mes a'n sita, hag yn-medhons dhodho, ‘Diskwedh dhyn an fordh dhe entra an sita, ha ni a wra dha dhyghtya yn hegar.’

²⁵ Ytho ev a dhiskwedhas dhedha an fordh dhe entra an sita, hag i a weskis an sita gans min an kledha, mes an gour gans oll y deylu i a gasas mos dhe wari.

²⁶ Ytho an gour eth dhe bow an Hittysi ha drehevel sita, ha'y henwel Luz; henn yw hy hanow bys y'n jydh hedhyw.

²⁷ Ny wrug Manasse chasya dhe-ves trigoryon Beth-shean ha'y threvow, na Taanak ha'y threvow, na trigoryon Dor ha'y threvow, na trigoryon Ybleam ha'y threvow, na trigoryon Megiddo ha'y threvow; byttegyns an Kananysi a withas dalghenn y'n tir na.

²⁸ Pan dheuth Ysrael ha bos krev, i a worras an Kananysi dhe hwel krev, mes ny wrussons aga chasya dhe-ves yn tien.

²⁹ Ha ny wrug Efraym chasya dhe-ves an Kananysi trigys yn Gezer, mes an Kananysi a veu trigys yn aga mysk yn Gezer.

³⁰ Ny wrug Zebulun chasya dhe-ves trigoryon Kitron na trigoryon Nahalol; mes an Kananysi a veu trigys yn aga mysk, hag a veu gorrys dhe hwel krev.

³¹ Ny wrug Asher chasya dhe-ves trigoryon Akko, na trigoryon Sidon, Ahlab, Akzib, Helba, Afik na Rehob;

³² mes an Asherysi a veu trigys yn mysk an Kananysi, trigoryon an tir; drefenn na's chasyons dhe-ves.

³³ Ny wrug Naftali chasya dhe-ves trigoryon Beth-shemesh, na trigoryon Beth-anath, mes yth esons trigys yn mysk an Kananysi, trigoryon an tir; byttegyns trigoryon Beth-shemesh ha Beth-anath a veu gorrys dhe hwel krev ragdha.

³⁴ An Amorysi a herdhyas mebyon Dan war-tu ha'n vro venydhyek, rag ny's assons i dhe dhiyskynna dhe'n plen.

³⁵ An Amorysi a withas dalghenn yn menydh Heres, yn Ayyalon, ha Shaalbim, mes leuv chi Yosep o poes warnedha, hag i a veu gorrys dhe hwel krev.

³⁶ Hag yth esa or an Amorysi a-dhiworth bolgh Akrabbim, dhiworth Sela ha war-vann.