An Gan a Ganow 7 - An Bibel Kernewek 20234 (Kernewek Kemmyn)

¹ Ass yw teg dha dhewdroes yn sandalyow, A vyrgh pennsevik! Avel tegennow yw dha dhiwvordhos rond, gweyth diwleuv krefter.

² Dha vegel yw bolla krenn nag eus fowt pyment dhedhi. Dha dorr yw graghell a waneth, settys a-dro gans lili.

³ Dha dhiwvronn yw avel diw elen, gevellyon a ewik.

⁴ Kepar ha tour gwrys a dhans-olifans yw dha gonna, dha dhewlagas avel pollow yn Heshbon, ryb yet Bath-rabbim. Dha droen yw kepar ha tour Lebanon, ow mires war-tu ha Damaskus.

⁵ Dha benn warnas yw avel Karmel, ha'th vlew lows yw avel purpur; hag yma myghtern maglennys y'n kudynnow.

⁶ Ass osta teg ha hegar, A gares, gans dha dhelitys!

⁷ Dha figur yw avel palmwydhenn, ha dha dhiwvronn avel bagasow a rappys.

⁸ Yn-medhav, ‘My a yskynn an palmwydhenn ha settya dalghenn yn hy barrennow.’ A, re bo dha dhiwvronn kepar ha bagasow a'n gwinbrenn, hag ethenn dha anall avel avalow,

⁹ ha'th stevnik kepar ha'n gwin gwella ow mos smodh yn-nans, ow slynkya dres ow diwweus ha'm dyns.

¹⁰ My yw dhe'm karadow, ha warnav yw y dhesir.

¹¹ Deus, ow haradow, gas dhyn ni mos yn-mes dhe'n mesyow, ha growedha dres an nos yn mysk an prysk henna:

¹² Gas dhyn ni mos a-brys dhe'n gwinlannow, ha gweles mars eus eginyow a vleujyow war an gwinbrennyer, mars yw an bleujennow igor ha mars yw an greunavalow yn aga bleujyow. Ena my a re dhis ow herensa.

¹³ An mandragorow a re ethenn, hag orth agan darasow yma frutys an moyha hweg, nowydh hag ynwedh koth, gwithys genev ragos, ow haradow.