Amos 8 - An Bibel Kernewek 20234 (Kernewek Kemmyn)

Gwelesigeth a Frut an Hav

¹ An Arloedh Duw a dhiskwedhas hemma dhymm, hag otta, kanstellas a frut an hav.

² Hag ev a leveris, ‘Pandr'a welydh, Amos?’ Hag yn-medhav, ‘Kanstellas a frut an hav.’ Ena an Arloedh a leveris dhymm: Devedhys yw gorfenn ow fobel Ysrael; ny wrav aga sparya namoy.

³ Kanow an tempel a dheu ha bos oelva y'n jydh na, yn-medh an Arloedh Duw. Y fydh meur a gorfow marow, tewlys a-dro yn pub le: taw!

Tenkys Ysrael

⁴ Klewewgh hemma, hwi neb a stank war an edhommek ha diswul boghosogyon an tir,

⁵ ow leverel, ‘P'eur fydh tremenys an loer nowydh, may hyllyn gwertha greun? ha'n sabot, may hyllyn igeri marghas an ys’ – ow lehe an efa, ow kressya an shekel, hag ow toella gans fals vantolyow,

⁶ dhe brena boghosogyon a arghans ha'n edhommek a dhiw eskis, ha gwertha us an gwaneth.

⁷ An Arloedh re dos re woeth Yakob: Yn sur, nevra ny ankovav travyth a'ga gweythresow!

⁸ A ny gren an tir rakhemma ha myns eus trigys ynno kyni? Oll an tir a sev kepar ha'n Nil, ha frosa ha koedha arta kepar ha'n Nil yn Ejyp.

⁹ Hag y hwyrvydh y'n jydh na, yn-medh an Arloedh Duw, my a wra an howl dhe sedhi y'n hanter-dydh, ha tewlhe an dor yn lagas an howl.

¹⁰ Treylya a wrav agas goelyow yn kynvann, ha'gas kanow oll yn oelva; my a worr yskar war an dhiwglun oll, ha bloghter war bub penn; my a's gwrav dhe gyni kepar dell ve war-lergh aga unn vab, ha'n gorfenn anodho a vydh kepar ha dydh hwerow.

¹¹ Otta dydhyow ow tos, yn-medh an Arloedh Duw, may tannvonav divoetter war an tir; ny vydh divoetter a vara, na syghes a dhowr, mes a glewes geryow an Arloedh.

¹² Gwandra a wrons a vor dhe vor, hag a'n kledh bys y'n howldrevel; ow kwandra a-dro dhe hwilas ger an Arloedh, mes ny'n kevons.

¹³ Y'n jydh na gwyrghesow teg ha gwer yowynk a glamder gans syghes.

¹⁴ An re a de re'n peghes a Samaria, ha leverel, ‘Dell vew dha dhuw, A Dan!’ ha ‘Dell vew fordh Beer-sheba’, a goedh, ha ny sevons arta.