Amos 5 - An Bibel Kernewek 20234 (Kernewek Kemmyn)

Galargan war Ysrael

¹ Klewewgh an ger ma a dhrehavav er agas pynn, galargan, A ji Ysrael:

² Koedhys yw, ny sev arta, an wyrghes Ysrael; forsakys war hy thir, heb denvyth dh'y dassevel.

³ Rag yndellma y lever an Arloedh Duw: An sita mayth eth yn-mes anedhi mil a's tevydh kans gesys, ha'n sita mayth eth yn-mes anedhi kans, a's tevydh deg gesys dhe ji Ysrael.

⁴ Rag yndellma y lever an Arloedh dhe ji Ysrael: Hwilewgh vy ha bewa,

⁵ mes na hwilewgh Bethel, ha na gewgh dhe Gilgal na treusi dhe Beer-sheba; rag mos a wra Gilgal yn divroedh ha Bethel ny vydh 'vas dhe dravyth.

⁶ Hwilewgh an Arloedh ha bewa, ma na tartho avel tan yn chi Yosep, dh'y dhevorya, heb denvyth dh'y dhifeudhi yn Bethel.

⁷ A hwi neb a dreyl gwirvreus yn fuelenn, ha tewlel ewnder dhe'n dor!

⁸ Ev neb a wrug an Pleyades hag Orion ha treylya tewlder down yn myttin, ha tewlhe an jydh yn nos; neb a elow war dhowrow an mor, ha'ga diveri war enep an dor: an Arloedh yw y hanow

⁹ neb a wra dhe derroes tardha erbynn an dus krev, ha terroes a dheu dhe'n kastell.

¹⁰ Kasa a wrons an den a geredh y'n yet, hag aborrya an den a gews an gwirder kowal.

¹¹ Rakhenna, drefenn hwi dhe stankya war an boghosek ha kemmeres dhiworto trubyt a ys, kyn trehevsowgh chiow a ven treghys, ny wrewgh triga ynna; hwi re blansas gwinlannow teg, mes ny evowgh aga gwin.

¹² Rag my a woer agas kammweythresow pals, ha'gas peghosow bras, owth arvedh an den gwiryon, ow kemmeres falswober, hag ow treylya a-denewen an edhommogyon y'n yet.

¹³ Rakhenna, tewel a wra an den fur yn termyn a'n par na; rag droktermyn yw.

¹⁴ Hwilewgh dader, a-der droktra, may fewewgh; ena Arloedh an luyow a vydh genowgh, poran kepar dell leversowgh.

¹⁵ Kesewgh droktra, ha kerewgh dader, ha fastyewgh gwirvreus y'n yet; martesen an Arloedh, Duw an luyow, a gemmer truedh a remenant Yosep.

¹⁶ Rakhenna yndellma y lever an Arloedh, Duw an luyow, an Arloedh: Yn plenys oll y fydh oelva, hag y'n stretys oll i a lever ‘Ellas, ellas!’ Gelwel a wrons an tiek dhe gynvann, ha dhe oelva an re a woer kyni.

¹⁷ Hag y'n gwinlannow oll y fydh oelva rag my dhe dremena der an kres ahanowgh, yn-medh an Arloedh.

Dydh an Arloedh

¹⁸ Go-i an re yw hwansek dhe dhydh an Arloedh! Pandr'a vydh dydh an Arloedh dhy'hwi? Tewlder vydh, ny vydh golow;

¹⁹ kepar ha pan fia gour dhiworth lew, hag ors ow tos er y bynn; po mos yn chi ha poesa erbynn an paros gans y dhorn ha bos brethys gans sarf.

²⁰ A nyns yw dydh an Arloedh tewlder a-der golow, ha tewlder heb gwynnder vyth ynno?

²¹ Kasa ha dispresya agas goelyow a wrav, ha ny garav sawer agas kuntellesow solem.

²² Ha kyn offrynnowgh dhymm agas offrynnow kowlleskys ha'gas offrynnow greun, ny vynnav aga degemmeres; hag offrynnow kres a'gas bestes peskys, ny wrav vy mires warnedha.

²³ Kemmerewgh dhiworthiv an tros a'th kanow; orth ton dha delynnow ny woslowav.

²⁴ Re wrello ewnder frosa yn-nans avel dowrow, ha gwiryonedh kepar hag avon prest ow resek.

²⁵ A dhresowgh dhymm sakrifisow hag offrynnow dew-ugens blydhen y'n difeyth, A ji Ysrael?

²⁶ Doen a wrussowgh agas imajys, Sakkuth agas myghtern, ha Kaywan agas duw-sterenn, hag a wrussowgh dh'agas honan.

²⁷ Ytho my agas deg yn divroedh dres Damaskus, yn-medh an Arloedh, Duw an luyow y hanow.