2 Timothi 4 - An Bibel Kernewek 20234 (Kernewek Kemmyn)

¹ A-dherag Duw ha Krist Yesu neb a wra breusi an re yw bew ha'n re yw marow, my a re charj dhis, ha der y omdhiskwedhyans ha'y wlaskor:

² pregoth an ger; bydh ter, da po drog kyn fo an seson; gwra keredhi, keski hag ynnia gans pub hirwodhevyans ha dyskas.

³ Rag an termyn a dheu ma na berthons dyskas yagh, mes war-lergh aga hwansow, kuntell dyskadoryon ragdha aga honan a wrons i, ow kosa aga diwskovarn,

⁴ hag i a dreyl aga diwskovarn dhe-ves dhiworth an gwir hag i a dreyl war-tu ha hwedhlow.

⁵ Mes ty bydh sad yn pup-tra, godhav drog, gwra ober aweyler, kollanw dha venystri.

⁶ Rag yth esov vy ow pos diverys seulabrys avel offrynn diwes, ha devedhys yw termyn ow dibarth.

⁷ My re strivyas an strivyans da ha kowlwul an resegva. My re withas an fydh.

⁸ Alemma rag, ragov vy parys yw an gurun a ewnder a re an Arloedh, an breusydh ewn, dhymmo vy y'n jydh na, ha nyns yw ragov vy yn unnsel, mes rag pubonan re garas y omdhiskwedhyans.

Arghadowyow Personel

⁹ Gwra assaya dhe dhos dhymmo yn skon;

¹⁰ rag Demas a'm gasas, ow kara an bys ma, ha mos dhe Thessalonika, Kreskens dhe Galatia, Titus dhe Dalmatia.

¹¹ Yma Luk yn unnsel genev. Kemmer Mark ha doroy ev genes, rag ev yw dhe les dhymmo rag gonis.

¹² Tyghikus re dhannvenis dhe Efesus.

¹³ An klok a esis yn Troas gans Karpus, doro ev pan dhyffi, ha'n rol-skrifow, ha dres oll an parcheminennow.

¹⁴ Aleksander an gweythor kober a wrug meur dhrog dhymmo; an Arloedh a re dhodho war-lergh y wriansow.

¹⁵ Ty ynwedh bydh war anodho, rag ev a sevis yn feur erbynn agan lavarow.

¹⁶ Pan wrugavy defens yn kynsa, nyns esa denvyth ow sevel rybov, mes pub den a'm gasas; na vedhes gorrys dh'aga reken.

¹⁷ Mes an Arloedh a sevis rybov ha ri nerth dhymmo, may fe an pregoth kowlwrys dredhov ha ma'n klewva oll an Jentilys. Ha sawys veuv yn-mes a anow an lew.

¹⁸ An Arloedh a wra ow delivra dhiworth pub drogober hag ow sawya rag y wlaskor nevek. Dhodho ev re bo gordhyans trank heb worfenn. Amen.

Salusyans Diwettha

¹⁹ Salus Priska hag Akwila ha teylu Onesiforus.

²⁰ Erastus a wortas yn Korinth mes my a asas Trofimus klav yn Miletus.

²¹ Gwra assaya dhe dhos kyns gwav. Ewbulus ha Pudens ha Linus ha Klawdia ha'n vreder oll a'th tynnergh.

²² An Arloedh re bo gans dha spyrys. Gras genowgh hwi.