2 Timothi 2 - An Bibel Kernewek 20234 (Kernewek Kemmyn)

Souder Da a Grist Yesu

¹ Ty, ow flogh, bydh nerthek gans y'n gras usi yn Krist Yesu;

² ha'n taklow a glewsys dhiworthiv dre lies test, gwra aga gorra yn charj dhe dus lel a vydh gwiw dhe dhyski tus erell ynwedh.

³ Gwra godhevel drog, avel souder da dhe Grist Yesu.

⁴ Souder ny wra omvagla gans negys bewnans kemmyn, may hallo plegya dhe neb re wrug y worra war rol y soudoryon.

⁵ Ha den mar mynn kesstrivya, nyns yw kurunys mar ny gesstriv war-lergh an rewlys.

⁶ Dhe'n tiek ow lavurya y koedh dhodho kavoes an kynsa rann a'n drevas.

⁷ Preder a'n pyth a lavarav; rag an Arloedh a re dhis konvedhes yn pup-tra.

⁸ Porth kov a Yesu Krist drehevys dhiworth an re varow, a has Davydh, war-lergh ow aweyl,

⁹ may hwodhavav drog rygdhi, bys may fiv yn kolmow kepar ha drogoberer; mes nyns yw lavar Duw kelmys.

¹⁰ Rakhenna, pup-tra a borthav rag an re yw dewisys, may kaffons i ynwedh an selwyans usi yn Krist Yesu, gans splannder heb worfenn.

¹¹ Lel yw an ger: Mar merwsyn ganso, ni a wra bewa ganso ynwedh.

¹² Mar kwren ni durya, kesreynya ynwedh ganso a wren; mar skonyn, ev ynwedh a wra agan skonya ni.

¹³ Mar ny grysyn, ev a worta lel, rag ny yll ev omskonya y honan.

Gweythor Kommendys

¹⁴ Gwra aga hovhe a'n taklow ma, ha'ga charjya a-dherag Duw na omlatthons a-dro dhe eryow. Nyns yw dhe les, ha ny wra marnas diswul an woslowysi.

¹⁵ Bydh freth dhe omdhiskwedhes kemmeradow dhe Dhuw, gonisyas heb meth, ow styrya yn ewn an ger a wiryonedh,

¹⁶ Mes skon lavarow gwag hag ansans, rag yma tus a'n par na ow mos yn-rag moy ha moy dhe ansansoleth,

¹⁷ ha'ga ger a wra lesa kepar ha kanker. Yn aga mysk yma Hymeneus ha Filetus;

¹⁸ i re swarvyas dhiworth an gwiryonedh, ow leverel bos an dasserghyans diwedhys seulabrys, hag yth esons ow tomhwel fydh rann a'n bobel.

¹⁹ Byttegyns selven fyrv Duw a sev, ha warnodho an skrif ma: ‘An Arloedh a aswonn an re usi dhodho’, ha, ‘Pubonan a henow hanow an Arloedh, treylys ev dhiworth kammhynseth.’

²⁰ Yn chi bras nyns eus lestri unnsel yn owr hag arghans, mes yn prenn ha pri ynwedh, an re na rag enor ha'n re ma rag disenor.

²¹ Ytho, mar kwra nebonan purjya y honan dhiworth an taklow ma, lester rag enor vydh, sakrys, servabyl dhe'n mester, parys rag pub ober da.

²² Gwra goheles ytho an drokhwansow a yowynkneth, mes siw ewnder, fydh, kerensa, kres gans an re a elow war an Arloedh yn-mes a golonn lan.

²³ Mes skon govynnadow gokki ha diskians, ow kodhvos i dhe dhineythi kedrynna.

²⁴ Ny goedh dhe was an Arloedh kedrynna, mes bos kuv orth pub den, yn dyskador da, meur y berthyans,

²⁵ yn klorder ow tyski an re a sev er y bynn. Y hyll bos, Duw dhe ri edrek dhedha rag godhvos an gwir,

²⁶ ha rag may tehwellons dhe dhivedhowder yn-mes a vaglenn an jowl, maglennys ganso dhe wul y vodh.