2 Timothi 1 - An Bibel Kernewek 20234 (Kernewek Kemmyn)

Salusyans

¹ Powl, abostol Krist Yesu dre vynnas Duw war-lergh ambos bewnans yn Krist Yesu,

² Dhe Timothi flogh karadow: Gras, tregeredh, kres dhiworth Duw an Tas ha Krist Yesu agan Arloedh.

Lelduri dhe'n Aweyl

³ Gras a wonn dhe Dhuw a wordhyav dell wrug ow thasow, divlam ow howses, ow perthi kov ahanas heb hedhi y'm pysadow dydh ha nos,

⁴ hwansek dhe'th weles, hag ow perthi kov a dha dhagrow, may fiv lenwys a lowena,

⁵ ow perthi kov a'th fydh heb toell na gil a re beu kyns y'th vamm-wynn Lois hag y'th vamm Ewnike hag a drig ynnos jy, sur ov vy.

⁶ Rakhenna, y kovhav dhis may hwytthi flamm ro Duw, usi ynnos dre worra ow diwla.

⁷ Rag ny ros Duw dhyn spyrys ownek mes spyrys a alloes, a gerensa hag a omrewl.

⁸ Ytho, na gemmer meth a dhustuni agan Arloedh, nag ahanav vy, y brisner, mes bydh kevrenner yn godhevyans rag an aweyl war-lergh galloes Duw,

⁹ a wrug agan selwel ha gelwel gans galow sans, a-der herwydh agan gwriansow agan honan, mes war-lergh y dowl ha'y ras ev a veu res dhyn yn Krist Yesu kyns termyn heb worfenn,

¹⁰ mes diskwedhys lemmyn der omdhiskwedhyans agan Selwador Krist Yesu a wrug diswul ankow ha dri dhe wolow bewnans hag anvarwoleth der an aweyl,

¹¹ rygdhi may feuv vy gwrys herot hag abostol ha dyskador.

¹² Rakhenna y hwodhavav an taklow ma; mes ny borthav meth, rag my a woer neb re grysis ynno ha sur ov vy ev dhe alloes gwitha an pyth re beu gorrys y'm charj, bys y'n jydh na.

¹³ Gwith an patron a lavarow yagh a glewsys dhiworthiv y'n fydh ha'n kerensa esa yn Krist Yesu.

¹⁴ Gwith an charj teg der an Spyrys Sans a drig ynnon.

¹⁵ Ty a woer an re oll yn Asia dhe dreylya dhiworthiv, Fygelus ha Hermojenes yn aga mysk.

¹⁶ Re dhiskwettho an Arloedh tregeredh dhe deylu Onesiforus rag ev a'm cheryas yn fenowgh ha ny borthas meth a'm kargharow,

¹⁷ mes pan dheuth dhe Rom ev a'm hwilas yn tiwysyk ha'm kavoes.

¹⁸ Re wrontyo an Arloedh dhodho may kaffo tregeredh dhiworth an Arloedh y'n jydh na. Ty a woer yn ta an gonis a wrug yn Efesus.