2 Samuel 7 - An Bibel Kernewek 20234 (Kernewek Kemmyn)

Kevambos Duw gans Davydh

¹ Lemmyn pan esa an myghtern trigys yn y ji, ha'n Arloedh re rosa dhodho powes dhiworth oll y eskerens a-derdro,

² an myghtern a leveris dhe Nathan an profoes, ‘Mir lemmyn, yth esov trigys yn chi a geder, mes argh Duw a drig a-ji dhe groglennow.’

³ Yn-medh Nathan dhe'n myghtern, ‘Ke, gwra pup-tra eus y'th kolonn; rag yma an Arloedh genes.’

⁴ Mes y'n keth nos na, ger an Arloedh a dheuth dhe Nathan, ow leverel,

⁵ Ke ha lavar dhe'm gwas Davydh: Yndellma y lever an Arloedh: A dhrehevydh ragov chi dhe driga ynno?

⁶ Ny drigis yn chi a-dhia'n jydh may tres mebyon Ysrael yn-bann yn-mes a Ejyp, mes bys y'n jydh hedhyw, my re beu ow kerdhes a-dro yn tylda hag yn tabernakel.

⁷ Yn pub tyller may kerdhis yn mysk oll mebyon Ysrael, a gewsis vy ger orth onan a loethow Ysrael, a erghis dhedha may hwrellens maga ow fobel Ysrael, ow leverel, ‘Prag na dhrehevsowgh ragov chi a geder?’

⁸ Lemmyn lavar yndella dhe'm gwas Davydh: Yndellma y lever Arloedh an luyow: my a'th kemmeras dhiworth an beurva, dhiworth holya an deves, dhe vos rewler war ow fobel, war Ysrael;

⁹ ha my re beu genes plepynag yth ythys, ha my re droghas dhe-ves oll dha eskerens a-dheragos; ha my a wra ragos hanow meur, kepar ha hanow brasyon an norvys.

¹⁰ Ha lemmyn my a apoynt tyller rag ow fobel Ysrael, ha my a wra aga flansa, may hyllons bewa yn aga thyller aga honan, ha ny vydhons ankresys namoy; ha ny wra mebyon sherewneth aga flagya namoy, kepar ha kyns,

¹¹ hag a-dhia'n jydh may settis breusysi war ow fobel Ysrael; ha my a re dhis powes dhiworth oll dha eskerens. Ynwedh an Arloedh a dhiskler dhis an Arloedh dhe vynnes gul chi ragov.

¹² Ha pan vydh dha dhydhyow kollenwys, ha ty a wrowedh gans dha dasow, my a dhrehav dha has war dha lergh, neb a dheu a'th korf, ha my a fast y vyghterneth.

¹³ Ev a dhrehav chi rag ow hanow vy, ha my a fast tron y vyghterneth bys vykken.

¹⁴ My a vydh tas dhodho, hag ev a vydh mab dhymm. Pan wra kammhynseth, my a'n gessydh gans gwelenn gwer, ha gans strokosow mab-den.

¹⁵ Mes ny vydh ow thregeredh kemmerys dhiworto, kepar dell y'n kemmeris dhiworth Sowl, neb a worris dhe-ves a-dheragos.

¹⁶ Dha ji ha'th vyghterneth a vydh fastys bys vykken a-dheragov; dha dron a vydh fastys bys vykken.

¹⁷ Herwydh oll an geryow ma, ha war-lergh oll an welesigeth ma, yndellma y kewsis Nathan dhe Davydh.

Pysadow Davydh

¹⁸ Ena myghtern Davydh eth a-ji hag esedha dherag an Arloedh ha leverel, ‘Piw ov vy, A Arloedh Duw, ha pandr'yw ow chi, ma'm dresys omma?

¹⁹ Hwath tra vyghan o y'th wolok, A Arloedh Duw; ty re gewsis ynwedh a ji dha was rag termyn hir dhe dhos. Yw hemma dha fordh usadow a dhyghtya mab-den, A Arloedh Duw?

²⁰ ‘Ha pandr'a yll Davydh leverel moy dhis? Rag ty a aswonn dha was, A Arloedh Duw.

²¹ A-barth dha er, ha herwydh dha golonn dha honan, ty re wrug oll an traow bras ma, ha'ga gul godhvedhys dhe'th was.

²² Rakhenna meur osta, A Arloedh Duw; rag nyns eus nagonan avelos, ha nyns eus Duw marnas ty, war-lergh pup-tra a glewsyn gans agan diwskovarn.

²³ Piw yw haval dhe'th pobel, haval dhe Ysrael, kenedhel dhibarow y'n norvys, neb eth Duw dh'y dasprena avel pobel ragdho y honan, ha dhe wul hanow ragdho, ha dhe wul ragowgh traow bras hag euthyk, rag dha wlas, a-dherag dha bobel, a dhasprensys ragos dha honan dhiworth Ejyp, a-dhiworth an kenedhlow ha'ga duwow?

²⁴ Ha ty a fastyas dha bobel Ysrael ragos dha honan dhe vos dha bobel bys vykken; ha ty, A Arloedh, eth ha bos aga Duw.

²⁵ ‘Ha lemmyn, A Arloedh Duw, an ger a gewssys a-dro dhe'th was, hag a-dro dh'y ji, fast e bys vykken, ha gwra kepar dell leversys,

²⁶ may fo dha hanow meurhes bys vykken y'n henlavar, “Arloedh an luyow yw Duw war Ysrael”; ha chi dha was Davydh a vydh fastys dheragos.

²⁷ ‘Rag ty, A Arloedh an luyow, Duw Ysrael, re dhiskwedhsys hemma dhe'th was, ow leverel, “My a dhrehav chi ragos”; rakhenna dha was re gavas kolonnekter dhe bysi dhis an pysadow ma.

²⁸ Ha lemmyn, A Arloedh Duw, ty yw Duw, ha dha eryow yw gwiryon, ha ty re ambosas an ober da ma dhe'th was;

²⁹ Ha lemmyn bedhes plegadow dhis benniga chi dha was, may hyll pesya bys vykken dheragos; rag ty, A Arloedh Duw, re gewsis, ha gans dha vennath chi dha was a vydh benniges bys vykken.’