2 Samuel 4 - An Bibel Kernewek 20234 (Kernewek Kemmyn)

Moldrans Ish-bosheth

¹ Pan glewas mab Sowl bos Abner marow yn Hebron, y golonn a fyllis, hag oll Ysrael a grenas.

² Hag yth esa dhe vab Sowl dew wour neb o kaptenyon a vagasow; hanow a'n eyl o Baana, ha hanow y gila Rekab. Mebyon Rimmon a Beeroth ens, dhiworth mebyon Benyamin – Beeroth ynwedh yw reknys dhe Benyamin,

³ rag an Beerothysi re fisa dhe Gittaym, ha re beu trigys ena avel alyons bys y'n jydh hedhyw.

⁴ Yth esa dhe Yonathan mab Sowl mab neb o evredhek yn y dhewdroes. Ev o pymp bloedh pan dheuth an nowodhow a-dro dhe Sowl ha Yonathan yn-mes a Yezreel. Y vagores a'n kemmeras yn-bann ha fia; hag y hwarva, pan fistenas dhe fia, ev dhe goedha ha dos ha bos klof. Ha'y hanow o Mefibosheth.

⁵ Lemmyn mebyon Rimmon a Beeroth, Rekab ha Baana, eth, ha dos a-dro dhe doemmder an jydh dhe ji Ish-bosheth, hag ev ow krowedha war y weli y'n hanter-dydh.

⁶ Hag otta, porthores an chi re bia ow klanhe gwaneth, mes hi eth ha bos hunyek ha koska; ytho Rekab ha Baana y vroder a slynkyas a-ji.

⁷ Pan dheuthons a-bervedh y'n chi hag ev ow krowedha war y weli yn y jambour, i a'n gweskis, ha'y ladha, ha'y dhibenna. Ena i a gemmeras y benn ha mones dre fordh an Araba oll an nos.

⁸ Hag i a ros penn Ish-bosheth dhe Davydh yn Hebron, ha leverel dhe'n myghtern, ‘Awotta penn Ish-bosheth mab Sowl, dha eskar, neb a hwila dha vewnans; an Arloedh re wrontyas dial dhe'm arloedh an myghtern an jydh ma war Sowl ha war oll y has.’

⁹ Davydh a worthybis dhe Rekab ha'y vroder Baana, mebyon Rimmon an Beerothyas, ha leverel dhedha, ‘Par dell vew an Arloedh, neb re dhelivras ow bewnans dhiworth pub ahwer,

¹⁰ pan dherivas den orthiv ha leverel, “Otta, Sowl yw marow”, par dell ve deger a nowodhow da, my a settyas dalghenn ynno ha'y ladha yn Siklag. Hemm o an pewas a res dhodho rag y nowodhow.

¹¹ Pygemmys moy ytho, pan ladhas tebeles gour gwiryon yn y ji y honan war y weli! A ny wrav vy rakhenna hwilas y woes a'gas leuv, ha'gas remova dhiworth an norvys?’

¹² Ytho Davydh a erghis dhe'n wer yowynk, hag i a'gas ladhas; i a droghas dhe-ves aga diwleuv ha'ga dewdroes, hag i a'ga krogas ryb an poll yn Hebron. Mes i a gemmeras penn Ish-bosheth ha'y ynkleudhyas yn bedh Abner yn Hebron.