2 Samuel 22 - An Bibel Kernewek 20234 (Kernewek Kemmyn)

Kan Delivrans Davydh

¹ Davydh a gewsis geryow an gan ma dhe'n Arloedh y'n jydh ma'n selwis an Arloedh dhiworth leuv y eskerens oll, ha dhiworth leuv Sowl;

² hag ev a gewsis, An Arloedh yw ow harrek, ha'm kastell, ha'm delivrer,

³ Duw ow harrek may hwilav skovva ynno, ow skoes, ha korn ow selwyans, ow dinas ha'm skovva, ow selwador; ty a'm saw dhiworth freudh.

⁴ My a elow war an Arloedh, neb yw gwiw dhe vos gormelys, ytho my a vydh selwys a'm eskerens.

⁵ Rag yth esa tonnow ankow a-dro dhymm, frosow sherewynsi a wrug euth dhymm;

⁶ yth esa kerdyn ifarn a-dro dhymm; antylli ankow esa a-dheragov.

⁷ Y'm anken my a elwis war an Arloedh, ha dhe'm Duw y helwis vy. Ev a glewas ow lev yn-mes a'n tempel, ha'm kri a dheuth bys yn y dhiwskovarn.

⁸ An nor a grenas ha kryghylli; selyow an nevow a grysyas; i a grenas, rag y vos serrys.

⁹ Mog a yskynnas mes a'y dhewfrik, ha tan a'y anow, ow tevorya; kolennow a dardhas yn flammow a-dhiworto.

¹⁰ Ev a blegyas an nevow, hag a dheuth yn-nans; yth esa tewolgow yn-dann y dreys.

¹¹ Ev a varghogas war jerub ha nija; ev a veu gwelys war eskelli an gwyns.

¹² Ev a wrug tewlder pabellow a-dro dhodho, kommol tew a dhowr y'n ebron.

¹³ Dhiworth an golewder a-ragdho kolennow tan a dardhas yn flammow.

¹⁴ An Arloedh a darennas y'n nevow, ha'n Ughella a ros y lev.

¹⁵ Ev a dhellos sethow ha'ga skattra, lughes, ha'ga gorra yn deray.

¹⁶ Ena yth omdhiskwedhas leuryow an mor, selyow an norvys a veu diskudhys, orth keredh an Arloedh, orth hwyth anall y dhewfrik.

¹⁷ Ev a dhannvonas dhiworth an ughelder ha'm kemmeres, ev a'm tennas yn-mes a dhowrow pals.

¹⁸ Ev a'm delivras dhiworth ow eskar galloesek, dhiworth an re a'm kas; rag yth ens i re grev ragov.

¹⁹ I a dheuth er ow fynn yn dydh ow therroes; mes an Arloedh re beu skoedhyans dhymm.

²⁰ Ev a'm dros yn-mes dhe dyller ledan; ev a'm delivras, drefenn bos dhodho delit ynnov.

²¹ An Arloedh re'm gobras war-lergh ow ewnder; war-lergh glander ow diwleuv yth attylis ev dhymm.

²² Rag my re synsis fordhow an Arloedh, ha ny dhiberthis yn trog dhiworth ow Duw.

²³ Rag yth esa oll y vreusow ev a-dheragov, ha'y ordenansow ny dreylis vy dhiworta.

²⁴ Yth en vy divlam a-dheragdho, ha my a omwithas dhiworth ow hammweyth.

²⁵ An Arloedh re attylis dhymm herwydh ow ewnder, herwydh glander ow diwleuv yn y wolok ev.

²⁶ Gans an den lel ty a vydh lel; gans an gour divlam ty a vydh divlam.

²⁷ Gans an den glan ty a vydh glan; ha gans an den kamm ty a vydh gorth.

²⁸ Ty a selow an bobel uvel; mes yma dha dhewlagas war an re woethus, dh'aga dri dhe'n dor.

²⁹ Rag ty yw ow lugarn, Arloedh, ha'n Arloedh a wra dhe'm tewlder splanna.

³⁰ Rag genes jy my a yll poenya erbynn lu; gans Duw my a yll lemmel dres fos.

³¹ Duw – y fordh yw perfydh; lavar an Arloedh yw prevys; skoes yw dhe seul a hwila skovva ynno.

³² Rag piw yw Duw marnas an Arloedh? Ha piw yw karrek marnas agan Duw ni.

³³ Duw re'm grogysas gans nerth, hag ev re wrug ow fordh divlam.

³⁴ Ev a wra ow threys kepar ha treys ewigow, ha'm settya war an tylleryow ughel.

³⁵ Ev a dhysk dhe'm diwleuv gwerrya, ha'm diwvregh a yll plegya gwarak a vrons.

³⁶ Ty re ros dhymm skoes dha selwyans, ha'th weres re'm meurhas.

³⁷ Ty a ros spas ledan rag ow hammow yn-dannov, ha ny drebuchyas ow dewufern.

³⁸ My a helgh ow eskerens ha'ga hachya; ha ny dhehwelav bys pan vons distruys.

³⁹ My a's brew ma na allons sevel; i a goedh yn-dann ow threys.

⁴⁰ Rag ty re worras grogys a nerth a-dro dhymm rag an gas; ty re worras yn-dannov an re a sevis er ow fynn.

⁴¹ Ty re ros dhymm gwarrow ow eskerens, may hallen vy distrui an re a'm kas.

⁴² I a grias, mes nyns esa nagonan dh'aga selwel, war an Arloedh, mes ny worthybis dhedha.

⁴³ My a's brew munys avel doust an dor; my a's trett yn-dann dreys avel leys an stretys.

⁴⁴ Ty a'm delirv dhiworth strifow ow fobel, ha'm settya avel penn an kenedhlow; pobel na aswonnis a wra ow servya.

⁴⁵ Estrenyon a dheu dhymm ow plattya; kettell glewons ahanav, gostydh yns dhymm.

⁴⁶ Estrenyon a gemmer digolonn, i a dheu ow krena yn-mes a'ga heryow.

⁴⁷ An Arloedh a vew, ha benniges yw ow harrek, hag ughelhes vydh Duw, karrek ow selwyans,

⁴⁸ an Duw neb a re dhymm dial hag a worr poblow yn-dannov,

⁴⁹ neb a'm delirv dhiworth ow eskerens, ha'm drehevel a-ugh an re a sev er ow fynn; ty a'm delirv dhiworth an gour garow.

⁵⁰ Rakhenna, my a'th wormel, A Arloedh, yn mysk an kenedhlow, ha kana gormola dhe'th hanow.

⁵¹ Ev a re selwyans meur dh'y vyghtern, ha gul tregeredh dh'y Untys ev, dhe Davydh ha dh'y has bys vykken.