2 Samuel 19 - An Bibel Kernewek 20234 (Kernewek Kemmyn)

¹ Y feu derivys orth Yoab, ‘Otta, an myghtern a oel ha kyni rag Absalom.’

² Ha'n trygh y'n jydh na a veu treylys yn kynvann rag oll an bobel, rag an bobel a glewas y'n jydh na bos an myghtern ow krevya rag y vab.

³ An bobel a slynkyas a-ji dhe'n sita avel ladron, dell slynk an bobel rag meth, ow fia dhe'n fo y'n vatel.

⁴ An myghtern a gudhas y fas ha garma ughel y lev, ‘A ow mab Absalom! A Absalom, ow mab, ow mab!’

⁵ Ena Yoab a dheuth a-ji dhe'n chi dhe'n myghtern ha leverel, ‘Hedhyw ty re wrug bismer dhe fasow oll dha wesyon re sawyas dha vewnans y'n jydh hedhyw, ha bewnans dha vebyon ha'th vyrghes, ha bewnans dha wragedh, ha bewnans dha iswragedh,

⁶ drefenn ty dhe gara an re a'th kas ha kasa an re a'th kar. Ty re'n gwrug kler hedhyw, nag yw naneyl kaslewydhyon na gwesyon travyth dhis; rag my a dyb ty dhe vos pes da mar pe Absalom yn few hedhyw ha ni oll marow.

⁷ Lemmyn ytho sav, ke yn-rag, ha kows dhe golonn dha wesyon; rag my a de re'n Arloedh, mar nyns edh yn-rag, ny drig gour genes an nos ma; ha hemma a vydh gweth ragos ages oll an drog re goedhas warnas dhiworth dha yowynkneth bys lemmyn.’

⁸ Ytho an myghtern a sevis hag esedha y'n yet. Hag y feu derivys orth oll an bobel, ‘Awotta, yma an myghtern owth esedha y'n yet.’ Hag oll an bobel a dheuth dherag an myghtern. Mes oll Ysrael re fisa pub gour dh'y dylda.

Davydh a Dhehwel dhe Yerusalem

⁹ Hag yth esa oll an dus ow kedrynna der oll loethow Ysrael, ow leverel, ‘An myghtern a'gan delivras yn-mes a leuv agan eskerens, ha'gan sawya dhiworth leuv an Filistysi; ha lemmyn ev re fias yn-mes a'n pow drefenn Absalom,

¹⁰ hag Absalom, neb a untsyn warnan, yw marow yn batel. Ytho prag na leverowgh ger vyth a-dro dhe dhri an myghtern dhe-dre?’

¹¹ Myghtern Davydh a dhannvonas dhe Sadok hag Abiathar an oferysi, ha leverel, ‘Leverewgh dhe henavogyon Yuda, “Prag y fydhowgh an diwettha dhe dhri an myghtern dhe-dre dh'y ji? Rag kows oll Ysrael re dheuth dhe'n myghtern, hwath dh'y ji.

¹² Ow breder owgh hwi, ow askorn ha'm kig owgh hwi. Ytho prag y fydhowgh an diwettha dhe dhri an myghtern dhe-dre?”

¹³ Ha leverewgh dhe Amasa, “A nyns osta ow askorn ha'm hig? Re wrello Duw dhymm, ha moy ynwedh, mar ny vydhydh kaslewydh ow lu a-ragov prest yn le Yoab.” ’

¹⁴ Ev a dreylyas kolonn pub gour Yuda avel unn gour, hag i a dhannvonas ger dhe'n myghtern, ‘Dehwel, ty hag oll dha wer.’

¹⁵ Ytho an myghtern a dhehwelis, ha dos dhe'n Yordan. Ha Yuda a dheuth dhe Gilgal, rag mones dhe vetya an myghtern ha'y dhri dres an Yordan.

¹⁶ Shimei mab Gera, an Benyaminyas dhiworth Bahurim, a fistenas ha dos yn-nans gans gwer Yuda dhe vetya myghtern Davydh.

¹⁷ Ganso yth esa mil wour a Benyamin, war-barth gans Siba, gwas chi Sowl, ha'y bymthek mab ha'y ugens gwas. I a fyskas dhe'n Yordan dherag an myghtern.

¹⁸ Yth esa kowbal ow treusi dhe dhoen mayni an myghtern dres an avon, ha gul y blesour. Pan dremenas Shimei mab Gera dres an Yordan, ev a goedhas dhe'n dor a-dherag an myghtern

Davydh a Dhiskwa Mersi dhe Shimei

¹⁹ ha leverel dhe'n myghtern, ‘Na wres ow arloedh rekna an blam er ow fynn, na perthi kov a'n kammweyth a wrug dha was y'n jydh mayth eth ow arloedh an myghtern yn-mes a Yerusalem. Na wres an myghtern y gemmeres dh'y golonn.

²⁰ Rag my dha was a woer my dhe begha, hag otta devedhys ov hedhyw, an kynsa dhiworth oll chi Yosep dhe dhos yn-nans dhe vetya ow arloedh an myghtern.’

²¹ Mes Abishay mab Seruya a worthybis, ‘A ny vydh Shimei gorrys dhe'n mernans rakhemma, drefenn ev dhe vollethi untys an Arloedh?’

²² Davydh a leveris, ‘Pyth eus yntra my ha hwi, hwi mebyon Seruya, may teuvewgh ha bos hedhyw eskerens dhymm? A vydh denvyth gorrys dhe'n mernans hedhyw yn Ysrael? A ny wonn vy y'n jydh hedhyw ow bos myghtern war Ysrael?’

²³ Ytho yn-medh an myghtern dhe Shimei, ‘Ny verwydh.’ Ha'n myghtern a dos dhodho.

Davydh ha Mefibosheth a Vet

²⁴ Mefibosheth mab-wynn Sowl a dheuth yn-nans dhe vetya an myghtern. Ny wrussa kemmeres gwith a'y dreys, na treghi y varv, na golghi y dhillas, a-dhia'n jydh may tibarthas an myghtern bys y'n jydh may teuth arta yn kres.

²⁵ Pan dheuth ev dhiworth Yerusalem dhe vetya an myghtern, an myghtern a leveris dhodho, ‘Prag nag ythys genev, Mefibosheth?’

²⁶ Ev a worthybis, ‘Ow arloedh, A vyghtern, ow gwas a'm traytas; rag dha was a leveris dhodho, “My a dhiber an asen ragov, may hallav marghogeth warnedhi ha mones gans an myghtern.” Drefenn dha was yw klof.

²⁷ Ev re sklandras dha was dhe'm arloedh an myghtern. Mes ow arloedh an myghtern yw avel el Duw; ytho gwra an pyth yw da y'th wolok.

²⁸ Rag oll chi ow thas a veu gwer ow tervynn an mernans dherag ow arloedh; hwath ty a settyas dha was yn mysk an re a dheber orth dha voes. Ytho py reyth eus dhymm kria moy dhe'n myghtern?’

²⁹ An myghtern a leveris dhodho, ‘Prag y kewsydh moy? My re leveris, ty ha Siba a wra kevrenna an gwel.’

³⁰ Ha Mefibosheth a leveris dhe'n myghtern, ‘Kemmeres ev pup-tra, a-ban dheuva ow arloedh an myghtern arta yn kres dh'y ji.’

Davydh a Dhiskwa Kuvder dhe Barzillay

³¹ Lemmyn Barzillay an Gileadyas a dheuth yn-nans dhiworth Rogelim dhe dremena dres an Yordan gans an myghtern, ha'y dhannvon war y fordh alena.

³² Lemmyn Barzillay o pur goth, peswar ugens bloedh. Ev re brovisa sosten dhe'n myghtern dres y dermyn yn Mahanaym, rag ev o gour pur vras.

³³ An myghtern a leveris dhe Barzillay, ‘Treus genev, ha my a brovi ragos yn Yerusalem genev.’

³⁴ Mes Barzillay a worthybis dhe'n myghtern ha leverel, ‘Py lies blydhen moy a vewav, may hwrav mos yn-bann gans an myghtern dhe Yerusalem?

³⁵ Peswar ugens bloedh ov hedhyw; a allav vy dissernya yntra da ha drog? A yll dha was blasa an pyth a dheber po eva? A allav vy hwath klewes lev kanoryon po kanoresow? Ytho prag y koedh dhe'th was bos begh arall dhe'm arloedh an myghtern?

³⁶ Dha was a wra mos pols dres an Yordan gans an myghtern, mes prag y tegoedh dhe'n myghtern ri pewas a'n par na dhymm?

³⁷ My a'th pys, gas dha was dhe dreylya dhe-dre, may hallav merwel a-ji dhe'm sita ow honan, nes dhe vedh ow thas ha mamm. Mes awotta dha was Kimham; gas ev dhe dreusi gans ow arloedh an myghtern; ha gul ragdho pypynag a hevel da y'th tewlagas.’

³⁸ An myghtern a worthybis, ‘Kimham a dreus genev, ha my a wra ragdho pypynag a hevel da dhis; ha pup-tra a vynni ahanav my a'n gwra ragos.’

³⁹ Ytho oll an bobel a dreusis dres an Yordan, ha'n myghtern a dreusis; an myghtern a ammas dhe Barzillay ha'y venniga, hag ev a dhehwelis dh'y ji.

⁴⁰ Ena an myghtern eth yn-rag dhe Gilgal, ha Kimham eth yn-rag ganso; hag oll pobel Yuda, hag ynwedh hanter pobel Ysrael, a dhros an myghtern war y fordh.

⁴¹ Ena oll gwer Ysrael a dheuth dhe'n myghtern ha leverel dhodho, ‘Prag y hwrug agan breder, gwer Yuda, dha ladra dhe-ves ha dri an myghtern ha'y vayni dres an Yordan, hag oll gwer Davydh ganso?’

⁴² Hag oll gwer Yuda a worthybis gwer Ysrael, ‘Drefenn bos an myghtern neshevin dhyn. Ytho prag yth owgh serrys a-dro dhe'n mater ma? A dhyb'syn ni vyth orth kost an myghtern, po a ros ev dhyn neb ro?’

⁴³ Ha gwer Ysrael a worthybis gwer Yuda ha leverel, ‘Yma dhyn deg rann y'n myghtern, hag yn Davydh ynwedh yma dhyn moy titel agesowgh. Ytho prag y'gan dispresowgh? A nyns en ni an kynsa dhe gewsel a-dro dhe dhri dhe-dre agan myghtern?’ Mes geryow pobel Ysrael o moy fers ages geryow pobel Ysrael.