2 Samuel 18 - An Bibel Kernewek 20234 (Kernewek Kemmyn)

Mernans Absalom

¹ Ena Davydh a niveras an bobel esa ganso, ha settya warnedha kaptenyon a vilyow, ha kaptenyon a gansow.

² Ha Davydh a dhannvonas yn-rag tressa rann a'n bobel yn-dann leuv Yoab, ha tressa rann yn-dann leuv Abishay mab Seruya, broder Yoab, ha tressa rann yn-dann leuv Ittay an Gittyas. An myghtern a leveris dhe'n bobel, ‘My ow honan a wra mos yn-rag genowgh ynwedh.’

³ Mes an bobel a worthybis, ‘Ny wre'ta mones yn-rag. Rag mar fien ni, ny vynnsens settya aga holonn dhyn. Mar marwa hanter ahanan, ny vynnsens settya aga holonn dhyn; mes dha dalvosogeth yw avel deg mil ahanan; rakhenna y fydh gwell ty dh'agan skoedhya yn-mes a'n sita.’

⁴ Yn-medh an myghtern dhedha, ‘Pypynag a hevel da dhywgh, my a'n gwra.’ Ytho an myghtern a sevis ryb tenewen an yet, hag oll an bobel a dheuth yn-mes yn kansow hag yn milyow.

⁵ A'n myghtern a erghis dhe Yoab hag Abishay hag Ittay, ha leverel, ‘Bedhewgh jentyl a'm govis vy gans an gour yowynk Absalom.’ Hag oll an bobel a glewas pan ros an myghtern arghadowyow dhe oll an gaptenyon a-dro dhe Absalom.

⁶ Ytho an bobel eth yn-mes y'n gwel erbynn Ysrael, hag yth esa an vatel yn koeswik Efraym.

⁷ Pobel Ysrael a veu gweskys ena a-rag gwesyon Davydh, hag yth esa ladhva veur y'n jydh na, ugens mil wour.

⁸ An vatel ena a veu lesys war enep oll an pow, ha'n goeswik a dhevoryas moy pobel y'n jydh na es dell dhevoryas an kledha.

⁹ Lemmyn Absalom a dhyerbynnas gwesyon Davydh. Hag yth esa Absalom ow marghogeth war asen, ha'n asen eth yn-dann skorr tew terebinthenn vras, ha'y benn a veu synsis fast y'n derebinthenn, may feu gesys ow kregi ynter an ebron ha'n dor; ha'n asen re bia yn-danno eth dhe-ves.

¹⁰ Neb unn gour a'n gwelas, ha derivas orth Yoab, ha leverel, ‘Awotta, my a welas Absalom ow kregi yn terebinthenn.’

¹¹ Yoab a worthybis dhe'n gour a dherivas orto, ‘Dar, ty a'n gwelas? Prag na wruss'ta y weskel ena dhe'n leur? Ena my a rosa dhis deg shekel a arghans, hag unn grogys.’

¹² Yn-medh an gour dhe Yoab, ‘Kyn fe mil shekel a arghans poesys y'm leuv, hwath ny vynnsen ystynn ow dorn erbynn mab an myghtern; rag yn agan klewans an myghtern a erghis dhis ha dhe Abishay ha dhe Ittay, ow leverel: “Gwithewgh an gour yowynk Absalom a'm govis vy.”

¹³ Mes, mar kwrellen yn fals erbynn y vewnans (rag nyns eus travyth kudhys dhiworth an myghtern), ena ty a settsa dha honan kontrari dhymm.’

¹⁴ Ena yn-medh Yoab, ‘Ny vynnav gortos yndellma genes.’ Hag ev a gemmeras tri guw yn y dhorn, ha'ga fokya dre golonn Absalom, hag ev hwath yn few y'n derebinthenn.

¹⁵ Ha deg gour yowynk, neb a dhug arvow Yoab, a omsettyas a-dro dhe Absalom, ha'y ladha.

¹⁶ Ena Yoab a hwythas an hirgorn, ha'n bobel a dhehwelis dhiworth helghya war-lergh Ysrael, rag Yoab a lestas an bobel.

¹⁷ I a gemmeras Absalom ha'y dewlel yn pytt bras y'n goeswik, ha drehevel a-ughto kals bras a veyn. Hag oll Ysrael a fias, pubonan dh'y dylda.

¹⁸ Lemmyn Absalom a gemmersa ha drehevel peulven ragdho y honan, hag ev hwath yn few, usi yn Nans an Myghtern, rag yn-medh ev, ‘Ny'm beus mab vyth dhe witha ow hanow yn kovadh’; ev a henwis an peulven war-lergh y hanow y honan, ha gelwys yw bys y'n jydh hedhyw, men-kov Absalom.

Davydh a Glew a Vernans Absalom

¹⁹ Ena yn-medh Ahimaas mab Sadok, ‘Gas vy dhe boenya, ha doen dhe'n myghtern an nowodhow an Arloedh dh'y dhelivra dhiworth leuv y eskerens.’

²⁰ Yoab a leveris dhodho, ‘Ny dhegedh an nowodhow hedhyw; ty a yll doen nowodhow yn dydh arall, mes hedhyw ny dhegedh nowodhow vyth, drefenn bos mab an myghtern marow.’

²¹ Ena Yoab a leveris dhe'n Kushyas, ‘Ke ha deriv orth an myghtern an pyth re welsys.’ Ha'n Kushyas a omblegyas dherag Yoab ha poenya.

²² Ena yn-medh Ahimaas mab Sadok arta dhe Yoab, ‘Pypynag oll a hwarvo, my a'th pys, gas vy ynwedh dhe boenya war-lergh an Kushyas.’ Ha Yoab a worthybis, ‘Prag y fynnydh poenya, ow mab? ny gevydh pewas vyth rag an nowodhow?’

²³ ‘Pypynag oll a hwarvo’, yn-medh ev, ‘My a vynn poenya.’ Hag ev a leveris dhodho, ‘Poen!’ Ena Ahimaas a boenyas dre fordh an plen, ha tremena dres an Kushyas.

²⁴ Yth esa Davydh owth esedha ynter an dhiw yet; ha'n goelyador eth yn-bann dhe do an yet ryb an fos, ha drehevel y dhewlagas, ha mires, hag otta yth esa gour ow poenya y honan.

²⁵ An goelyador a armas ha derivas orth an myghtern. Ha'n myghtern a leveris, ‘Mar pydh ev y honan, yma nowodhow yn y anow.’ Hag ev a besyas dos nes.

²⁶ Ena an goelyador a welas gour arall ow poenya, hag ev a elwis dhe withyas an yet ha leverel, ‘Otta, gour arall ow poenya y honan!’ Hag yn-medh an myghtern, ‘Ev ynwedh a dhre nowodhow.’

²⁷ An goelyador a leveris, ‘My a dyb an kynsa gour dhe boenya kepar hag Ahimaas mab Sadok.’ An myghtern a leveris, ‘Ev yw gour da hag ev a dheu gans nowodhow.’

²⁸ Ena Ahimaas a armas dhe'n myghtern, ‘Oll yw da.’ Hag ev a omblegyas dherag an myghtern gans y fas dhe'n dor ha leverel, ‘Benniges re bo an Arloedh dha Dhuw, re dhelivras yn-bann an wer a dhrehevis aga dorn erbynn ow arloedh an myghtern.’

²⁹ Ha'n myghtern a wovynnas, ‘Yw an gour yowynk Absalom saw?’ Hag Ahimaas a worthybis, ‘Pan dhannvonas Yoab gwas an myghtern, my dha was, my a welas tervans meur, mes ny wonn pyth o.’

³⁰ Ha'n myghtern a leveris dhodho, ‘Treyl a-denewen, ha sav omma.’ Ytho ev a dreylyas a-denewen, ha sevel.

³¹ Hag otta, an Kushyas a dheuth; ha'n Kushyas a leveris, ‘Klew an nowodhow, ow arloedh an myghtern, rag an Arloedh re'th telivras hedhyw dhiworth kemmys a dhrehevis aga dorn er dha bynn.’

³² Ha'n myghtern a leveris dhe'n Kushyas, ‘Yw an gour yowynk Absalom saw?’ Ha'n Kushyas a worthybis, ‘Re bo eskerens ow arloedh an myghtern hag oll a dhrehav dhe wul drog dhis, kepar ha'n gour yowynk na.’

Davydh a Gyn rag Absalom

³³ Ha'n myghtern a veu movyes yn feur, hag ev eth yn-bann dhe'n chambour a-ugh an yet hag oela; hag y leveri, hag ev ow mos, ‘A ow mab Absalom! Ow mab, ow mab Absalom! Unnweyth a marwen yn dha le, A Absalom, ow mab, ow mab!’