2 Samuel 1 - An Bibel Kernewek 20234 (Kernewek Kemmyn)

Davydh a Gyn rag Sowl ha Yonathan

¹ Wosa mernans Sowl, pan dhehwelis Davydh dhiworth ladhva an Amalekysi, Davydh a wortas dew dhydh yn Siklag.

² Y'n tressa dydh, gour a dheuth yn-mes a gamp Sowl gans y dhillas skwardys, ha gans dor war y benn. Pan dheuth dhe Davydh, ev a goedhas dhe'n leur hag omblegya.

³ Yn-medh Davydh dhodho, ‘A-ble osta devedhys?’ Ev a worthybis, ‘My re dhienkas yn-mes a gamp Ysrael.’

⁴ Ha Davydh a wovynnas orto, ‘Pandr'a hwarva? My a'th pys, lavar dhymm.’ Ev a worthybis, ‘An bobel a fias dhiworth an vatel, hag ynwedh lies anedha a goedhas ha merwel; ha Sowl ha'y vab Yonathan ynwedh a verwis.’

⁵ Ena Davydh a wovynnas orth an gour yowynk neb a dherivas orto, ‘Fatell wodhes Sowl ha'y vab Yonathan dhe verwel?’

⁶ Ha'n gour yowynk neb a dherivas orto a leveris, ‘Par happ yth esen war venydh Gilboa, hag ottena Sowl ow poesa war y wuw, ha'n charettow ha'n varghogyon ow tos nes dhodho.

⁷ Pan dreylyas a-dro, ev a'm gwelas, ha gelwel dhymm, ha my a worthybis, “Ottavy syrra.”

⁸ Yn-medh ev dhymm, “Piw osta?” Ha my a worthybis dhodho, “Amalekyas ov.”

⁹ Hag ev a leveris dhymm, “Sav a-ughov my a'th pys, ha ladh vy; rag penn-dro re'm dalghennas, kynth usi ow bewnans hwath ynnov.”

¹⁰ Ytho my a sevis a-ughto, ha'y ladha, drefenn ow bos sur na ylli bewa wosa ev dhe goedha. My a gemmeras an gurun esa war y benn, ha'n breghellik esa war y vregh, ha my re's dros omma dhe'm arloedh.’

¹¹ Ena Davydh a settyas dalghenn yn y dhillas, ha'ga skwardya; hag oll an wer esa ganso a wrug yn kettella.

¹² I a gynis hag oela ha penys bys gorthugher rag Sowl ha rag y vab Yonathan, ha rag pobel an Arloedh, ha rag chi Ysrael, drefenn i dhe goedha der an kledha.

¹³ Davydh a leveris dhe'n gour yowynk a dherivas orto, ‘A-ble os?’ Hag ev a worthybis, ‘My yw mab alyon, Amalekyas.’

¹⁴ Ha Davydh a leveris dhodho, ‘A ny berthsys own a ystynn dha dhorn dhe dhistrui untys an Arloedh?’

¹⁵ Ena Davydh a elwis dhe onan a'n wer yowynk ha leverel, ‘Deus omma ha koedh warnodho.’ Ytho ev a'n gweskis dhe'n leur hag ev a verwis.

¹⁶ Yn-medh Davydh dhodho, ‘Bedhes dha woes war dha benn dha honan; rag dha anow re dhustunias er dha bynn, ow leverel, “My re ladhas untys an Arloedh.” ’

¹⁷ Ha Davydh a gynis gans an kynvann ma war Sowl ha war y vab Yonathan.

¹⁸ Ev a worhemmynnis may fo dyskys dhe vebyon Yuda; awotta, skrifys yw yn lyver Yashar:

¹⁹ Dha splannder, a Ysrael yw ledhys war dha dylleryow ughel: ass yw an gasoryon koedhys!

²⁰ Na wrewgh y leverel yn Gath, na wra y dhyllo yn stretow Ashkelon; ma na lowenhaho myrghes an Filistysi, ma na heudhhaho myrghes an re antrodreghys.

²¹ A venydhyow Gilboa, na vedhes naneyl gluth na glaw warnowgh, na gwelyow a offrynnow! rag ena skoes an gasoryon a veu defolys, skoes Sowl – nyns yw untys gans oyl namoy.

²² Dhiworth goes an re ledhys, dhiworth blonek an gasoryon, ny wrug gwarak Yonathan treylya dhe-ves, na ny dhehwelis kledha Sowl gwag.

²³ Sowl ha Yonathan, yn aga bewnans meurgerys ha jentyl, hag yn mernans nyns ens rynnys; skaffa es eryon ens, kreffa es lewyon ens.

²⁴ A vyrghes Ysrael, oelewgh rag Sowl, neb a'gas dillesas gans pann kogh, gans taklow fethus, hag a worras tegennow a owr war agas dillas.

²⁵ Ass yw dha gasoryon koedhys yn kres an vatel! Yonathan yw koedhys war dha dylleryow ughel, ledhys.

²⁶ Grevys ov ragos, ow broder Yonathan; meurgerys genev es'ta; marthys o dha gerensa dhymm, moy es kerensa benynes.

²⁷ Ass yw dha gasoryon koedhys, hag arvow bresel distruys!