2 Peder 1 - An Bibel Kernewek 20234 (Kernewek Kemmyn)

Salusyans

¹ Simon Peder, gwas hag abostol Yesu Krist, Dhe'n re re gavas fydh drudh kehaval dh'agan fydh ni, yn ewnder agan Duw ha'gan Selwyas Yesu Krist:

² Gras dhywgh hwi ha kres re bo palshes yn aswonnvos Duw ha'gan Arloedh Yesu.

Galow an Kristyon ha'y Dhewisyans

³ Galloes Duw re ros dhyn pup-tra kevrennys gans bewnans ha sansoleth, der aswonnvos a neb a'gan gelwis dh'y splannder ev ha'y vertu.

⁴ Dredha ev re ros dhyn ambosow drudh ha pur vras, may hyllowgh dredha kevrenna yn natur Duw, wosa diank dhiworth an plosedhes usi y'n bys dre dhrog hwansow.

⁵ Ha rag an keth tra ma, strivewgh gwella gyllowgh dhe worra yn agas fydh vertu, hag yn vertu godhvos,

⁶ hag yn godhvos omrewl, hag yn omrewl perthyans, hag yn perthyans sansoleth,

⁷ hag yn sansoleth kuvder dhe vreder, hag yn kuvder dhe vreder kerensa.

⁸ Mars usi an taklow ma ynnowgh hag ow palshe, i a'gas gwith rag bos euver na heb frut yn aswonnvos agan Arloedh Yesu Krist.

⁹ Rag mar nyns usi an re ma gans nebonan, dall yw ha berr y wolok, heb perthi kov y feu glanhes a'y beghosow koth.

¹⁰ Rakhenna, a vreder, bedhewgh dhe voy diwysyk dhe fastya agas galow ha'gas dewis; rag mar kwrewgh an taklow ma, ny wrewgh trebuchya bynitha.

¹¹ Rag yndella, y fydh grontys dhywgh hwi yn rych dhe entra dhe wlaskor heb diwedh agan Arloedh ha'gan Selwyas Yesu Krist.

¹² Rakhenna, my a vynn pup-prys dri an taklow ma dh'agas kov, kyn hwrewgh aga godhvos, ha synsowgh yn krev an gwir usi genowgh.

¹³ My a dyb y vos gwiw, hedre viv y'n tylda ma, gul dhywgh difuna, orth agas kovhe,

¹⁴ ow kodhvos my dhe worra dhe-ves yn skon ow thylda dell dhiskwedhas dhymm dhe wir agan Arloedh Yesu Krist,

¹⁵ Ha my a striv gwella gylliv dhe surhe hwi dhe berthi kov pup-prys a'n taklow ma wosa ow thremenyans.

Golewder Krist ha'n Ger a Brofoesans

¹⁶ Ny siwsen hwedhlow gwrys yn konnyk ha ny ow terivas dhywgh galloes ha devedhyans agan Arloedh Yesu Krist, mes ny re welas y vraster gans agan dewlagas ni.

¹⁷ Rag ev a dhegemmeras enor ha splannder dhiworth Duw an Tas, pan veu dres dhodho lev a'n par ma gans an splannder bryntin, ‘Hemm yw ow Mab karadow, mayth usi ynno ow delit.’

¹⁸ Ha ni agan honan a glewas an lev ma degys dhiworth nev, ha ni ganso ev war an menydh sans.

¹⁹ Ha ni a'gan beus an ger profoesek moy sur. Hwi a wra yn ta ow kul vri anodho, kepar ha lugarn ow kolowi yn tyller tewl erna dartho an jydh hag erna dhrehaffo Borlowenn yn agas kolonnow.

²⁰ Godhvydhewgh hemma kyns oll, nag yw profoesans vyth a'n skryptor mater a styryans priva.

²¹ Rag ny dheuth profoesans bythkweth dre volonjedh mab-den, mes tus movyes gans an Spyrys Sans a gewsis a-dhiworth Duw.