2 Myghternedh 20 - An Bibel Kernewek 20234 (Kernewek Kemmyn)

Kleves Hezekia

¹ Y'n dydhyow na Hezekia eth ha bos klav bys yn eneworres. An profoes Ysay mab Amos a dheuth dhodho, ha leverel dhodho, ‘Yndellma y lever an ARLOEDH: Kempenn dha ji, rag ty a verow; ny vewydh.’

² Ena ev a dreylyas y fas troha'n fos ha pysi an Arloedh, ow leverel,

³ ‘Porth kov lemmyn, A Arloedh, my a'th pys, a fatell gerdhis a-dherag dhis yn gwiryonedh hag a leun golonn, hag a wrug an pyth yw da y'th wel.’ Hag ev a oelas yn hwerow.

⁴ Kyns Ysay dhe vos yn-mes a'n klos kresel, ger an Arloedh a dheuth dhodho:

⁵ ‘Treyl arta, ha leverel dhe Hezekia, rewler ow fobel, Yndella a lever an Arloedh, Duw dha das Davydh: My re glewas dha bysadow, my re welas dha dhagrow; otta, my a wra dha yaghhe; y'n tressa dydh ty a wra mos yn-bann dhe ji an Arloedh.

⁶ My a geworr dhe'th tydhyow pymthek blydhen; ha my a'th telirv ty ha'n sita ma yn-mes a leuv myghtern Assyria; ha my a vydh skoes dhe'n an sita ma a-barth dhymm, hag a-barth Davydh ow gwas.’

⁷ Hag Ysay a leveris, ‘Drewgh powltis a figys. Hag i a'n kemmeras ha'y worra war an ynflammyans, may yaghhaho.’

⁸ Hezekia a leveris dhe Ysay, ‘Pandr'a vydh an tokyn ma'm yaghha an Arloedh, ha may hwrav mos yn-bann yn chi an Arloedh an tressa dydh?’

⁹ Ysay a leveris, ‘An tokyn ma a' fydh dhiworth an Arloedh, may hwra an Arloedh an pyth re ambosas: a wra an skeus mos yn-rag deg kamm po mos war-lergh deg kamm?’

¹⁰ Hezekia a worthybis, ‘Es yw rag an skeus hirhe deg kamm; mes gwra dhe'n skeus dehweles war-dhelergh deg kamm.’

¹¹ An profoes Ysay a grias dhe'n Arloedh; hag ev a dhros an skeus war-dhelergh an deg kamm, war an grisyow re dhiyskynnsa an howl yn-nans, war risyow Ahaz.

¹² Y'n termyn na myghtern Merodak-baladan mab Baladan a Babylon a dhannvonas kannasow gans lytherow ha ro dhe Hezekia, drefenn ev dhe glewes y vos klav.

¹³ Hezekia a's wolkommas, ha diskwedhes dhedha oll y dresorva, an arghans, an owr, an spisyow, an oyl drudh, y arvji, pup-tra a veu kevys yn y withvaow; nyns esa travyth yn y ji po yn y wlaskor oll na dhiskwedhas Hezekia dhedha.

¹⁴ Ena an profoes Ysay a dheuth dhe vyghtern Hezekia, ha leverel dhodho, ‘Pandr'a leveris an wer ma? Ple teuthons dhis a-dhiworto?’ Hezekia a worthybis, ‘I re dheuth dhiworth pow pell, dhiworth Babylon.’

¹⁵ Ev a leveris, ‘Pandr'a welsons y'th chi?’ Hezekia a worthybis, ‘I re welas pub tra usi y'm chi; nyns eus travyth y'm gwithvaow na dhiskwedhis dhedha.’

¹⁶ Ena Ysay a leveris dhe Hezekia, ‘Klew ger an ARLOEDH:

¹⁷ Otta, yma dydhyow ow tos pan vydh pub tra usi y'th chi, ha pub tra re withas dha dasow bys y'n jydh ma, degys dhe Babylon; travyth ny vydh gesys, a lever an Arloedh.

¹⁸ Re a'th vebyon dha honan a vydh kemmerys dhe-ves; i a vydh spadhesigyon yn palys myghtern Babylon.’

¹⁹ Ena Hezekia a leveris dhe Ysay, ‘Da yw ger an Arloedh re gewssys.’ Rag yth esa ow prederi, ‘Prag na? Dhe'n lyha y fydh kres ha sawder y'm dydhyow.’

Mernans Hezekia

²⁰ Gweythresow erell Hezekia, oll y nerth, fatell wrug ev an poll ha'n dowrbons ha dri dowr a-berth y'n sita, a nyns yns i skrifys yn lyver kovadhow myghternedh Yuda?

²¹ Hezekia a goskas gans y dasow; ha'y vab Manasse a reynyas yn y le.