2 Myghternedh 15 - An Bibel Kernewek 20234 (Kernewek Kemmyn)

Azaria a Reyn war Yuda

¹ Y'n seythves blydhen warn ugens a Yeroboam myghtern Ysrael, Azaria mab Amasia myghtern Yuda a dhallathas reynya.

² Hwetek bloedh o pan dhallathas reynya, hag ev a reynyas dewdhek blydhen ha dew-ugens yn Yerusalem.

³ Ev a wrug an pyth o ewn yn golok an Arloedh, herwydh pup-tra re wrussa y das Amasia.

⁴ Byttegyns ny veu an tylleryow ughel kemmerys dhe-ves; an bobel a besyas sakrifia ha leski offrynnow y'n tylleryow ughel.

⁵ An Arloedh a weskis an myghtern, mayth o klavorek bys yn dydh y vernans, hag yth esa trigys yn chi diberth. Yotham, mab an myghtern a rewlyas an palas, ow koverna pobel an pow.

⁶ Gweythresow erell Azaria, ha pup-tra a wrug, a nyns yns i skrifys yn lyver kovadhow myghternedh Yuda?

⁷ Azaria a goskas gans y dasow; hag i a'n ynkleudhyas gans y dasow yn sita Davydh; Yotham y vab a reynyas yn y le.

Zekaria a Reyn war Ysrael

⁸ Y'n etegves blydhen warn ugens a Azaria myghtern Yuda, Zekaria mab Yeroboam a reynyas war Ysrael yn Samaria hwegh mis.

⁹ Ev a wrug an pyth o drog yn golok an Arloedh, kepar dell wrug y dasow. Ny dreylyas dhiworth peghosow Yeroboam, mab Nebat, a wrug dhe Ysrael pegha.

¹⁰ Shallum mab Yabesh a vrasas er y bynn, ha'y weskel a-rag an bobel, ha'y ladha, ha reynya yn y le.

¹¹ Gweythresow erell Zekaria, ottensi skrifys yn lyver kovadhow myghternedh Ysrael.

¹² Ambos an Arloedh o hemma, a ros dhe Yehu, ‘Dha vebyon a esedh war dron Ysrael bys y'n peswora henedh.’ Hag yndella y hwarva.

Shallum a Reyn war Ysrael

¹³ Shallum mab Yabesh a dhallathas reynya y'n nownsegves blydhen warn ugens a Uzzia myghtern Yuda; hag ev a reynyas mis leun yn Samaria.

¹⁴ Ena Menahem mab Gadi eth yn-bann dhiworth Tirsa ha dos dhe Samaria, ha gweskel Shallum mab Yabesh yn Samaria, ha'y ladha, ha reynya yn y le.

¹⁵ Gweythresow erell Shallum ha'n brasow a wrug, ottensi skrifys yn lyver kovadhow myghternedh Ysrael.

¹⁶ Ena Menahem a weskis Tifsagh, pubonan esa ynni ha'y thiredh dhiworth Tifsagh yn-rag; drefenn na igorsa an yetys dhodho ev a's gweskis. Ev a skwardyas oll an benynes ynni esa gans flogh.

Menahem a Reyn War Ysrael

¹⁷ Y'n nownsegves blydhen warn ugens a Azaria myghtern Yuda, Menahem mab Gadi a dhallathas reynya war Ysrael; ev a reynyas deg blydhen yn Samaria.

¹⁸ Ev a wrug an pyth o drog yn golok an Arloedh; ny dreylyas dres oll y dhydhyow dhiworth peghosow Yeroboam mab Nebat, a wrug dhe Ysrael pegha.

¹⁹ Ha Pul myghtern Assyria a dheuth erbynn an tir; Menahem a ros dhe Pul deg mil dalent a arghans, may halla ev y weres ow fastya y dhalghenn war a'n ruvaneth.

²⁰ Menahem a gemmeras ardoll dhiworth Ysrael, oll an tus alloesek, hanter-kans shekel a arghans dhiworth pub huni, dh'y ri dhe vyghtern Assyria. Ytho myghtern Assyria a dreylyas war y lergh ha ny drigas ena y'n pow.

²¹ Gweythresow erell Menahem, ha pup-tra a wrug, a nyns yns i skrifys yn kovadhow myghternedh Ysrael?

²² Menahem a goskas gans y dasow, ha Pekahia y vab a reynyas yn y le.

Pekahia a Reyn War Ysrael

²³ Y'n degves blydhen ha dew-ugens a Azaria myghtern Yuda, Pekahia mab Menahem a dhallathas reynya war Ysrael yn Samaria hag a reynyas diw vlydhen.

²⁴ Ev a wrug an pyth o drog yn golok an Arloedh; ny dreylyas dhiworth peghosow Yeroboam, mab Nebat, a wrug dhe Ysrael pegha.

²⁵ Mes Pekagh mab Remalia, y gapten, a vrasas er y bynn, ha'y weskel yn Samaria yn tour chi an myghtern, gans Argob hag Arye, ha ganso hanter-kans Gileadyas. Ev a'n ladhas, ha reynya yn y le.

²⁶ Gweythresow erell Pekahia, ha pup-tra a wrug, skrifys yns yn lyver kovadhow myghternedh Ysrael.

Pekagh a Reyn War Ysrael

²⁷ Y'n dewdhegves blydhen ha dew-ugens a Azaria myghtern Yuda, Pekagh mab Remalia, a dhallathas reynya war Ysrael yn Samaria, hag ev a reynyas ugens blydhen.

²⁸ Ev a wrug an pyth o drog yn golok an Arloedh: ny dreylyas dhiworth peghosow Yeroboam, mab Nebat, a wrug dhe Ysrael pegha.

²⁹ Yn dydhyow Pekagh myghtern Ysrael, y teuth Tiglath-pileser, myghtern Assyria, ha kemmeres Iyon, Abel-beth-maaka, Yanoagh, Kedesh, Hasor, Gilead, ha Galile, oll pow Naftali, ha'ga hemmeres yn keth dhe Assyria.

³⁰ Hoshea mab Ela a wrug bras erbynn Pekagh mab Remalia ha'y weskel, ha'y ladha, ha reynya yn y le, y'n ugensves blydhen a Yotham mab Uzzia.

³¹ Gweythresow erell Pekagh, ha pup-tra a wrug, ottensi skrifys yn lyver kovadhow myghternedh Ysrael.

Yotham a Reyn war Yuda

³² Y'n nessa blydhen a Pekagh mab Remalia myghtern Ysrael, Yotham mab Uzzia myghtern Yuda a dhallathas reynya.

³³ Pymp bloedh warn ugens o pan dhallathas reynya, hag ev a reynyas hwetek blydhen yn Yerusalem. Hanow y vamm o Yerusha myrgh Sadok.

³⁴ Ev a wrug an pyth o ewn yn golok an Arloedh, herwydh pup-tra re wrussa y das Uzzia.

³⁵ Byttegyns ny veu an tylleryow ughel kemmerys dhe-ves; an bobel a besyas sakrifia ha leski offrynnow y'n tylleryow ughel. Ev a dhrehevis yet wartha chi an Arloedh.

³⁶ Gweythresow erell Yotham, ha pup-tra a wrug, a nyns yns i skrifys yn lyver kovadhow myghternedh Yuda?

³⁷ Y'n dydhyow na an Arloedh a dhallathas dannvon Resin myghtern Aram ha Pekagh mab Remalia erbynn Yuda.

³⁸ Yotham a goskas gans y dasow, hag a veu ynkleudhys gans y dasow yn sita Davydh y das; hag Ahaz y vab a reynyas yn y le.