2 Myghternedh 11 - An Bibel Kernewek 20234 (Kernewek Kemmyn)

Athalia a Reyn war Yuda

¹ Kettell welas Athalia mamm Ahazia bos marow hy mab, hi a sevis ha distrui oll an teylu ryel.

² Mes Yehosheba, myrgh myghtern Yehoram, hwoer Ahazia, a gemmeras Yoash mab Ahazia, ha'y ladra dhiworth kres mebyon an myghtern esa ow pos ledhys; hi a'n gorras, ev ha'y vammeth, yn chambour gweli, kudhys a-dhiworth Athalia ma na ve ledhys.

³ Ha kudhys veu war-barth gensi yn chi an Arloedh dres hwegh blydhen, hag Athalia ow reynya war an pow.

Untyans Yoash

⁴ Y'n seythves blydhen Yehoyada a elwis kaptenyon an kansow, Karysi ha korfwythysi, ha'ga dri dhodho yn chi an Arloedh, ha gul kevambos gansa, ha'ga gorra yn-dann di yn chi an Arloedh, ha diskwedhes dhedha mab an myghtern.

⁵ Yehoyada a worhemmynnis dhedha, ‘Ottomma an pyth a wrewgh; unn tressa rann ahanowgh, an re may teu aga thorn dhe witha y'n sabot, a with chi an myghtern;

⁶ an dhiw rann arall a vydh ow kwitha yn chi an Arloedh, an nessa rann orth yet Sur, ha'n tressa orth an yet a-dryv an gorfwithysi;

⁷ ha'gas diw rann nag yw aga thorn dhe witha y'n sabot a witha chi an Arloedh ha'n myghtern.

⁸ I a gyrghynn an myghtern, pub huni gans arvow yn y leuv; ha piwpynag a dheffo nes dhe'n renkow a vydh ledhys. Bedhewgh gans an myghtern plepynag yth ello.’

⁹ Kaptenyon an kansow a wrug herwydh pup-tra a worhemmynnis Yehoyada an oferyas; i a dhros aga wer, an re a dhallathas aga thorn y'n sabot, ha'n re a'n worfennas, hag i a dheuth dhe Yehoyada an oferyas.

¹⁰ An oferyas a dhelivras dhe'n gaptenyon an guwow ha skoesow re bia dhe vyghtern Davydh, esa yn chi an Arloedh;

¹¹ an gorfwithysi a sevis a-dro dhe'n myghtern, pub gour gans y arvow yn y leuv, war bub tu a'n chi a gledhbarth an chi dhe'n dhyghowbarth, a-dro dhe'n alter ha'n chi.

¹² Ena Yehoyada a dhros mab an myghtern yn-rag, ha gorra an gurun warnodho, ha ri dhodho an dustuni. I a'n gwrug myghtern, ha'y untya; hag i a dakyas diwla, ha leverel, ‘Re vewo an myghtern!’

Mernans Athalia

¹³ Pan glewas Athalia tros an gorfwithysi ha'n bobel, hi a dheuth dhe'n bobel yn chi an Arloedh.

¹⁴ Hi a viras, hag otta an myghtern ow sevel ryb an goloven, herwydh usadow. An bennsevigyon ha'n hirgernysi esa ryb an myghtern, hag yth esa oll pobel an pow ow lowenhe, ha seni hirgern. Athalia a skwardyas hy dillas ha kria, ‘Trayturi! Trayturi!’

¹⁵ Ena Yehoyada an oferyas a worhemmynnis an gaptenyon o settys war an lu, ‘Drewgh hi yn-mes ynter an renkow ha ladha gans an kledha an re a dheu war hy lergh.’ Rag an oferyas re lavarsa, ‘Na vedhes hi ledhys yn chi an Arloedh.’

¹⁶ I a settyas dalghenn ynni; hi a dheuth dre Yet an Vergh yn chi an myghtern, hag ena hi a veu ledhys.

¹⁷ Yehoyada a wrug kevambos ynter an Arloedh ha'n myghtern ha'n bobel, may fedhens i pobel an Arloedh; hag ev a wrug kevambos ynter an myghtern ha'n bobel ynwedh.

¹⁸ Oll pobel an pow eth yn chi Baal ha'y derri dhe'n dor; i a vrewis y alteryow ha'y imajys yn temmigow, ha ladha Mattan, oferyas Baal, a-rag an alteryow. Ena Yehoyada an oferyas a settyas gwithysi war ji an Arloedh.

¹⁹ Hag ev a gemmeras kaptenyon an kansow, an Karysi, ha'n gorfwithysi, hag oll pobel an pow; hag i a dhros an myghtern yn-nans dhiworth chi an Arloedh hag a dheuth yn chi an myghtern dre yet an gorfwithysi dhe ji an myghtern. Hag ev a esedhas war dron an myghternedh.

²⁰ Oll pobel an pow a lowenhas, ha kosel o an sita wosa bos Athalia ledhys gans an kledha ryb chi an myghtern.

²¹ Seyth bloedh o Yoash pan dhallathas reynya.